1 Juan 1 - DIOSPA QHELQACHISQ

Wiñay kawsayta qoj Simi Nisqa sutiyoj

¹ Tukuy imapis manaraj ruwasqa kashajtin, kawsayta qoj Simi Nisqa sutiyoj karqañapuni. Noqaykutaj payta uyarerqayku, jinataj kikin ñawiykuwan rikorqayku, qhawarqayku, chantá makiykuwan llankharqayku ima.

² Kawsayta qojmin rikuchikorqa, noqaykutaj payta rikorqayku. Kunantaj rikojkuna jina qankunaman chay wiñay kawsaymanta willayku. Payqa Tata Dioswan karqa, noqaykumantaj rejsichikuwarqayku.

³ Ajinaqa imatachus rikusqaykuta, chantá uyarisqaykuta ima qankunaman willayku, qankuna uj sonqolla noqaykuwan kanaykichejpaj, imaynatachus noqaykupis Tata Dioswan, chantá Churin Jesucristowan uj sonqolla kayku, ajinata.

⁴ Kay cartata qhelqaspa, qankunaman apachimuyku noqaykuwan khuska qankuna mayta kusikunaykichejpaj.

K'anchaypi purina

⁵ Jesucristo kay jinata yachachiwasqaykuta qankunaman willayku: Diosqa k'anchay jinamin, manataj paypeqa ni ima laqhayay kanchu.

⁶ Dioswan k'achata kawsakusqanchejta nishaspa, sichus juchallispallapuni purinchej chayqa, llullakushanchej, manataj cheqa kajman jinachu kawsashanchej.

⁷ K'anchaypichus kawsanchej chayqa, imaynatachus Diospis k'anchaypi kashan, ajinata, noqanchejpis ujkuna ujkunawan uj sonqolla kawsanchej, Diospa Churin Jesuspa yawarnintaj tukuy juchamanta llimphuchawanchej.

⁸ Sichus mana juchayoj kasqanchejta ninchej chayqa, noqallanchejtaj q'otiyakushanchej, manataj cheqa kajtachu parlashanchej.

⁹ Juchanchejtachus Diosman rimarinchej chayrí, payqa nisqanta junt'aj, cheqantaj kasqanrayku juchanchejta pampachanqa. Jinallataj payqa tukuy millay ruwasqanchejmantapis llimphuchawasunchej.

¹⁰ Sitajchus mana juchallikusqanchejta ninchej chayqa, Diosta llullata jina rikhurichinchej. Ajinata ruwaspa, simi nisqanta mana tukuy sonqochu jap'ikusqanchejmanta yachayta qoshanchej.