1 Crónicas 12 - DIOSPA QHELQACHISQ

Davidta yanapajkuna

¹ Cispa churin kamachej Saulmanta ayqekuspa, David Siclagpi kashajtin, uj mashkha wapu soldadokuna chayman rerqanku, Davidta yanapanankupaj ujchakoj.

² Paykunaqa arcoyoj karqanku, sumaj warak'ajkuna ima. Puraj makinkuwan arcowan flechajtaj, warak'ajtaj kanku. Benjamín jatun ayllumanta Saulpa wawqenkuna karqanku:

³ Kamachejninku Ajiezer, Joás ima. Paykunaqa Gabaa llajtamanta Semagáj churinkuna karqanku. Kallarqankutaj Azmavetpata churinkuna Jezielwan, Peletwan, chantá Anatot llajtamanta Beracawan, Jehuwan ima.

⁴ Kallarqataj Gabaonmanta Ismaías. Payqa kinsa chunka wapu soldadokunamanta ujnin karqa, paykunaj kamachejninkutaj. Kallarqankutaj Gederamanta Jeremías, Jahaziel, Johanán, Jozabad,

⁵ Eluzai, Jerimot, Bealías, Semarías, Harufmanta Sefatías,

⁶ Elcana, Isías, Azareel, Joezer, Yasobeanpiwan ima. Paykuna Coréj ayllunmanta karqanku.

⁷ Kallarqankutaj Gedormanta Jeroanpata churinkuna Joelawan, Zebadiaswan ima.

⁸ Gad jatun ayllumanta wakinkunapis Davidman k'askallarqankutaj, ch'innejpi pakakushajtin. Paykunaqa maqanakunapaj sumaj wapu karqanku, sumaj wakichisqataj, escudoyoj, lanzayoj ima. León jina phiña karqanku, orqopitaj taruka jina phawarej kanku.

⁹ Kaykuna karqanku: Ñawpaj kajqa Ezer, iskay kajtaj Abdías, kinsa kajtaj Eliab,

¹⁰ tawa kajtaj Mismana, phishqa kajtaj Jeremías,

¹¹ sojta kajtaj Atay, qanchis kajtaj Eliel,

¹² pusaj kajtaj Johanán, jisq'on kajtaj Elzabad,

¹³ chunka kajtaj Jeremías, chunka ujniyoj kajtaj Macbanay.

¹⁴ Chaykuna Gad jatun ayllumanta soldadokunata kamachejkuna karqanku. Wakin pachaj soldadokunata kamacherqanku, wakintaj waranqa soldadokunata.

¹⁵ Paykuna wata qallariy killapi, Jordán mayu k'uchuy k'uchu junt'a kashajtin chimparqanku, chantá vallepi tukuy tiyakojkunata tukuynejman ayqecherqanku.

¹⁶ Chay jawa Benjamín jatun ayllumanta, jinataj Judá jatun ayllumanta wakinkuna Davidwan tantakoj rillarqankutaj, ch'innejpi pakakushajtin.

¹⁷ Davidtaj paykunata taripaj llojsispa, nerqa: Sichus allin sonqowan yanapanawaykichejpaj jamushankichej chayqa, noqawan ujchakunaykichejta tukuy sonqo munasaj. Sitajchus wasanchaspa, awqayman jaywaykunawaykichejpaj jamushankichej chayrí, ñawpa tatanchejkunaj Diosninku qankunata sinch'ita ñak'arichisonqachej, imaraykuchus noqaqa mana pitapis imata ruwanichu, nispa.

¹⁸ Chaypacha 300 wapu soldadokunaj kamachejninku Amasayman Diospa Espíritun jamuspa, payta jatunmanta parlacherqa: Yeséj churin David, qanpata kayku, qanwanpunitaj kashayku. Allin kawsay qanpaj kachun, qanta yanapasojkunapajpis, imaraykuchus Diosniyki yanapashasunki, nispa. Davidtaj paykunata jap'ispa, soldadokunata kamachinankupaj churarqa.

¹⁹ Manasés jatun ayllumanta wakinkunapis Davidman k'askaporqanku, maypachachus David filisteokunawan khuska Saulpa contranta maqanakunankupaj risharqa, chaypacha. Chaywanpis Davidqa filisteokunata mana yanaparqachu, imajtinchus filisteokunaj kamachejninkuna parlanakuytawan, kachapusqanku: Davidqa noqanchejta wañuchispa, wiraqochin Saulman tijrakaponqa, nispa.

²⁰ David Siclagman ripushajtin, Manasés jatun ayllumanta kajkuna Davidman k'askaporqanku. Chaykunaqa Adnas, Jozabad, Jediaiel, Micael, Jozabad, Eliú, chantá Siletay ima karqanku. Paykuna Manasés jatun ayllumanta soldadokunata kamachejkuna karqanku.

²¹ Paykuna Davidta awqawan maqanakupi yanaparqanku. Tukuyninku maqanakunapaj manchay wapu karqanku, soldadonkunata kamachejmantaj tukorqanku.

²² Sapa p'unchay Davidta yanapanankupaj chayamushallarqankupuni, manchay ashkha kanankukama, Diospa soldadonkuna jina may ashkhapuni karqanku.

Davidpa soldadonkuna

²³ David Hebrón llajtapi kashajtin, maqanakupaj sumaj wakichisqa soldadokuna rerqanku, Tata Diospa nisqanman jina Saulpa cuentanmanta Davidta kuraj kamachej kananpaj churanankupaj. Chayman rejkuna karqanku:

²⁴ Judá jatun ayllumanta 6.800 qharikuna karqanku, paykunataj escudoyoj, lanzayoj maqanakupaj sumaj wakichisqa karqanku.

²⁵ Simeón jatun ayllumanta 7.100 sumaj wapu qharikuna karqanku, maqanakupaj sumaj wakichisqa.

²⁶ Leví jatun ayllumantarí 4.600 karqanku.

²⁷ Chantá 3.700 Aaronpa ayllunmanta karqanku. Joyadataj kamachejninku karqa,

²⁸ Sadocwan ima. Payqa wayna karqa, maqanakunapaj wapu, paytaj ayllunmanta iskay chunka iskayniyoj kamachejkunawan jamorqa.

²⁹ Benjamín jatun ayllumantataj, Saulpa kikin ayllunmanta 3.000 runakuna karqanku. Benjamín jatun ayllumantaqa yaqha tukuyninku Saulman sayasqa karqanku.

³⁰ Efraín jatun ayllumanta 20.800 manchay wapu soldadokuna karqanku. Paykunaqa ayllunkupi manchay uyarisqa karqanku.

³¹ Manasés khuskan jatun ayllumanta 18.000 karqanku. Paykuna Davidta kuraj kamachejta jina churanankupaj kachamusqa karqanku.

³² Isacar jatun ayllumantataj 200 kamachejkuna karqanku, paykunaj makinkupitaj tukuynin ayllunkuna karqanku. Paykunaqa tiempota sumajta rejsiyta yacharqanku, chayrayku israelitakuna imatachus ruwanankuta yacharqanku.

³³ Zabulón jatun ayllumanta 50.000 soldadokuna karqanku, maqanakoj yaykunankupajpacha sumaj wakichisqa. Paykunaqa tukuy imaymana armata jap'iyta yacharqanku, chantapis mana iskayrayaspa maqanakoj yaykunankupaj jina karqanku.

³⁴ Neftalí jatun ayllumanta 1.000 kamachejkuna karqanku, paykunawantaj 37.000 soldadokuna lanzayoj, escudoyoj ima maqanakupaj sumaj wakichisqa karqanku.

³⁵ Dan jatun ayllumantaqa 28.600 soldadokuna karqanku.

³⁶ Aser jatun ayllumantarí, 40.000 maqanakupaj sumaj wakichisqa soldadokuna karqanku.

³⁷ Chay jawa Jordán mayu chimpamanta Rubén jatun ayllumanta, Gad jatun ayllumanta, jinataj Manasés khuskan jatun ayllumantawan 120.000 tukuy imaymana armawan wakichisqa karqanku.

³⁸ Chay tukuy wapu soldadokunaqa Hebronman rerqanku, maqanakuman rinankupaj jina sumaj wakichisqa, Davidta Israel suyupi kuraj kamachej kananpaj churanankupaj. Jinallataj Israel suyumanta tukuy uj sonqolla karqanku, Davidta kuraj kamachejta jina churanankupaj.

³⁹ Hebronpi Davidwan kinsa p'unchayta mikhuspa, ujyaspa qhepakorqanku, llajta masinku chay tukuyta wakichisqankurayku.

⁴⁰ Chay jawaqa muyuyninkupi tiyakojkuna, jinataj Isacar jatun ayllumanta, Zabulonmanta, Neftalí jatun ayllumanta ima burrokunapi, camellokunapi, mulakunapi, bueykunapi ima tukuy imaymana mikhunata apamorqanku: Jak'uta, higomanta t'antata, k'isata, vinota, aceiteta, wakakunata, ovejakunata ima. Israel suyupi jatun kusiy kasqanrayku, ashkhata apamorqanku.