1 Crónicas 11 - DIOSPA QHELQACHISQ

David Israelta chantá Judá suyutawan kamachin

¹ Tukuy israelitakuna tantakuspa, Hebronman Davidwan parlaj rerqanku. Chantá nerqanku: Noqaykoqa yawar masiyki kayku.

² Saúl kamachishajtin, qanpuni israelita soldadokunata maqanakuman pusaj kanki. Chay jawataj Tata Diosniyki nisorqa: Qanmin Israel aylluyta michinki, paykunatataj kuraj kamachej jina kamachinki, nispa.

³ Ajinata Israel suyumanta tukuy kurajkuna Hebronman Davidwan parlaj rerqanku, Davidtaj paykunawan Tata Diospa ñawpaqenpi uj tratota ruwarqa. Chantá paykunaqa Davidta aceitewan jawispa, Israel suyupi kuraj kamachej kananpaj churarqanku, Samuelnejta Tata Dios nisqanman jina.

David Jerusalenta jap'in

⁴ Chaymantataj Davidwan, tukuy israelitakunawan, Jebús nisqa Jerusalenman rerqanku. Chay llajtapirí jebuseokuna tiyakusharqanku.

⁵ Paykunataj Davidta nerqanku: Qan mana kayman yaykumuyta atinkichu, nispa. Chaywanpis Davidqa sumaj perqawan muyuykuchisqa Sión llajtata jap'erqa. Kunantaj chay llajtaqa “Davidpa Llajtan” nisqa kashan.

⁶ Davidmin nisqa: Pichus ñawpajta jebuseokunawan maqanakoj rejtaqa soldadoykunata kamachej kananpaj churasaj, nispa. Jebuseokunawan ñawpajta maqanakoj yaykojqa Seruyáj churin Joab karqa. Chantá payqa soldadokunata kamachej kananpaj churasqa karqa.

⁷ Chaymanta Davidqa chay sumaj perqawan muyuykuchisqa llajtapi tiyakorqa. Chayraykutaj “Davidpa Llajtan”, nispa suticharqanku.

⁸ Chantá Davidqa Milomantapacha llajtaj perqankama llajtata jataricherqa. Joabtaj wakin llajtata allincharqa.

⁹ Davidqa aswan atiyniyojman tukusharqa Tukuy Atiyniyoj Tata Dios paywan kasqanrayku.

Davidpa wapu soldadonkuna

¹⁰ Davidpa sumaj wapu soldadonkuna kaykuna karqanku. David kamachishajtin, paykuna sumajta yanaparqanku, tukuy israelitakunawan khuskataj kuraj kamachejninkupaj Davidta churarqanku, Tata Diospa nisqanman jina.

¹¹ Davidpata wapu soldadonkunaj sutinkoqa kay karqa: Jacmoníj churin Yasobeán. Payqa kinsantin aswan wapu soldadokunata kamachej karqa. Uj kuti payqa lanzanwan israelitakunaj awqankumanta 300 soldadokunata wañucherqa.

¹² Paypa qhepantaj ajojita Dodoj churin Eleazar karqa. Payqa kinsa wapu soldadokunamanta ujnin kaj karqa.

¹³ Paytaj Davidwan Pasdamín llajtapi karqa, maypachachus filisteokuna maqanakunankupaj chaypi tantakorqanku, chaypacha. Chaynejpi cebada tarpusqa karqa. Maypachachus israelitakuna filisteokunamanta ayqesharqanku chaypacha,

¹⁴ payqa tarpusqa chawpipi sayaykuytawan, filisteokunawan maqanakuspa atipaykorqa. Ajinata Tata Diosqa filisteokunata atipaykunanpaj yanaparqa.

¹⁵ Uj kuti, kinsa chunka wapu soldadokunamanta kinsalla Adulán chhanka jusk'uman Davidta taripaj rerqanku. Filisteokunamanta soldadokunataj Refayin vallepi jarasqa kasharqanku.

¹⁶ David chhanka jusk'upi kashajtin, filisteokunamanta wakin soldadokuna Belenpi kasharqanku.

¹⁷ Chaypacha Davidqa yakumanta ch'akichikuspa, kay jinata nerqa: Ay, pillapis Belén llajta punkupi chay pujyumanta yakuta aparimpuwanman, nispa.

¹⁸ Chantá chay kinsantin wapu soldadokuna filisteokunaj jarankuman yaykuspa, Belenman yaykuna punkupi pujyumanta yakuta orqhoytawan, Davidman apamorqanku. Davidtajrí mana ujyarqachu, manachayqa Tata Diosman jaywaspa, pampaman jich'arqa.

¹⁹ Chantá nerqa: Kay yakuta ujyanayta Dios ama munachunchu. Ujyayman chayqa, kay runakunaj yawarninkutachari ujyaspa jinayman, imaraykuchus paykunaqa wañuyta mana manchachikuspa yakuta apamorqanku, nispa. Chayrayku Davidqa apamusqanku yakuta mana ujyarqachu. Chay jina t'ukunata chay kinsa wapu soldadokuna ruwarqanku.

²⁰ Joabpa wawqen Abisayqa kinsa chunka wapu soldadokunaj kamachejninku karqa. Uj kuti lanzanwan maqanakuspa 300 soldadokunata wañucherqa. Chayrayku payqa chay kinsa aswan wapu soldadokuna jina manchay uyarisqa karqa.

²¹ Tukuyninkumanta aswan jatunpaj qhawasqa karqa, kamachejninkutaj karqa. Chaywanpis manapuni chay kinsa wapu soldadokuna jinachu karqa.

²² Cabselmanta Joyadáj churin Benaiaspis wapu soldado karqa, paytaj ashkha t'ukuna imakunata ruwarqa. Payqa Moabmanta Arielpa iskaynin churinkunata wañucherqa. Uj kuti rit'imushajtin, uj jusk'uman yaykorqa, chaypitaj uj leonta wañucherqa.

²³ Jinallataj Egipto llajtayoj uj jatunkaray runata wañuchillarqataj. Chay runaqa sayayninman iskay metro khuskanniyoj jina karqa, paytaj lanzan jap'irisqa purej. Lanzanqa awana k'aspi jina rakhu karqa. Benaiastaj uj k'aspillawan maqanakoj sayaykuspa, lanzanta kacharparicherqa, chantá kikin lanzallanwantaj wañurparicherqa.

²⁴ Ajinata Joyadáj churin Benaías ruwarqa, kinsa chunka wapu soldadokuna ukhupitaj manchay uyarisqa karqa.

²⁵ Paykunamanta nisqaqa aswan uyarisqa karqa. Chaywanpis manapuni chay kinsa aswan wapu soldadokuna jinapunichu karqa. Davidqa payta qhawaj soldadokunata kamachinanpaj Benaiasta churarqa.

²⁶ Davidpata chay waj wapu soldadonkuna kaykuna karqanku: Joabpa wawqen Asael, Belenmanta Dodoj churin Eljanán, Harodmanta

²⁷ Samot, Paltimanta Heles,

²⁸ Tecoamanta Iquespa churin Irá, Anatotmanta Abiezer,

²⁹ Husamanta Sibecay, Ajojmanta Ilay,

³⁰ Netofamanta Maray, Banaj churin Jéled ima. Paypis Netofallamantataj karqa.

³¹ Kallarqataj Gabaamanta Ribaypata churin Itay. Gabaa llajtaqa Benjamín jatun aylloj jap'iyninpi kashan. Jinallataj karqanku Piratonmanta Benaías,

³² Gaas mayumanta Juray, Arbamanta Abiel,

³³ Barhummanta Azmavet, Salbonmanta Elijaba,

³⁴ Gizonmanta Jasenpa churinkuna, Aratmanta Sagej churin Jonatán,

³⁵ Sacarpata churin Ajían. Paypis Ararllamantataj karqa. Kallarqankutaj Urpa churin Elifal,

³⁶ Mequeramanta Jéfer, Pelonmanta Ajías,

³⁷ Carmelmanta Hezro, Ezbaypata churin Naray,

³⁸ Natanpa wawqen Joel, Hagríj churin Mibejar,

³⁹ Amón suyumanta Selec, chantá Berotmanta Najaray ima. Paypis wapu soldado kaspa, Seruyáj churin Joabpata armanta apaykachapojnin karqa.

⁴⁰ Jinallataj karqanku Jatirmanta Ira, Jatirllamantataj Gareb.

⁴¹ Jeteokunamanta Urías, Ajlaypata churin Zabad,

⁴² Sizaj churin Adina ima. Payqa Rubén jatun ayllupi kamachej karqa, paywantaj kinsa chunka soldadokuna kallarqankutaj.

⁴³ Jinallataj karqa Macáj churin Janán, Mitnimanta Josafat,

⁴⁴ Astarotmanta Uzías, Aroermanta Jotanpa churinkuna Samá, Yeguiel ima.

⁴⁵ Davidpata wapu soldadonkuna kallarqankutaj Simeríj churinkuna, Jediaelwan chantá Tizi llajtayoj wawqen Yojá ima,

⁴⁶ Mahavimanta Eliel, Elnaampa churinkuna Yerebay, Josaviaswan ima, Moabmanta Itma,

⁴⁷ chantá Sobamanta Eliel, Obed, Jasiel ima.