1 Crónicas 10 - DIOSPA QHELQACHISQ

Saúl chantá churinkuna ima wañunku

¹ Filisteokunaqa israelitakunawan maqanakorqanku, israelitakunataj paykunaj ñawpaqenkumanta ayqerqanku. Filisetokunataj Gilboa orqopi ashkha israelitakunata wañucherqanku.

² Filisteokunaqa Saulta, churinkunatawan qhatiykuspa, Jonatanta, Abinadabta, chantá Malquisuata ima wañuchillarqankutaj.

³ Chantá filisteo soldadokuna Saulta muyuykushajtinku, arcowan flechaspa, Saulta jap'erparicherqanku.

⁴ Chayrayku Saulqa armanta apaykachapojninta nerqa: Espadaykita orqhokuspa tukuycharpariway, Diosta mana manchachikojkuna wañuchiwaspa ama alqochakunawankupaj, nispa. Yanapajnintajrí mana Saulta wañuchiyta munarqachu, sinch'ita manchachikusqanrayku. Chantá Saulqa espadanta sayachiytawan, patanman choqaykukorqa.

⁵ Saulpa armanta apaykachapojrí Saulta wañusqata rikuspa, paypis espadanpa pataman choqaykukuspa wañullarqataj.

⁶ Ajinata Saúl, kinsantin churinkuna ima wañorqanku, tukuy aylluntaj chinkaporqa.

⁷ Vallepi tiyakoj israelitakunaqa soldadonkukunata ayqeshajta rikuspa, jinataj Saúl, kinsantin churinkuna ima wañusqankuta yachaspa, paykunapis llajtankuta saqespa ayqerikapullarqankutaj. Chantá filisteokuna chayamuspa, chay llajtakunapi tiyakaporqanku.

⁸ Q'ayantin filisteokunaqa wañusqakunaj imankunachus karqa, chaykunata oqharikamoj rispa, Saulta, churinkunatawan Gilboa orqopi wañusqata tarerqanku.

⁹ Chantá Saulpa p'achanta lluch'uspa, umantapis qholuspa, jinataj armantawan ima apakaporqanku. Jinaspataj, Filistea suyupi tukuy runaman, lantinkunamanwan ima willacherqanku.

¹⁰ Chaymantataj Saulpa armanta lantinkoj yupaychana wasinman churarqanku, umantataj Dagón lantita yupaychananku wasiman warkhuykorqanku.

¹¹ Chantá Galaadpi kaj Jabespi tukuy tiyakojkuna, filisteokuna Saulwan imatachus ruwasqankuta uyarerqanku.

¹² Chayrayku tukuy wapu runakuna tantaykukuspa, Saulpa ayanta, jinataj churinkunaj ayantawan orqhospa, Jabés llajtaman aparqanku. Chaypitaj uj sach'a uraman p'ampaykorqanku. Chantá llakikusqankuta rejsichinankupaj qanchis p'unchayta ayunarqanku.

¹³ Ajinata Saúl wañorqa, Tata Diospa kamachisqanta mana kasusqanrayku chantá Tata Diosta tapukunantaqa, uj aysiri warmita tapukoj risqanrayku.

¹⁴ Mana Tata Diosta tapurikorqachu. Chayraykumá Tata Diosqa payta wañuchicherqa, kamachiynintataj Yeséj churin Davidman qoporqa.