1 Corintios 8 - DIOSPA QHELQACHISQ

Lantikunaman jaywasqa mikhuna

¹ Kunanqa lantikunaman jaywasqa mikhunamanta tapuwasqaykichejman kutichiyta munani. Tukuyninchej kaymanta yachanchejña. Chaywanpis yachayniyoj kanaqa may kasqanchejta yuyachiwanchej. Munakuyniyoj kanarí iglesiata kallpachan.

² Sichus pipis yuyanman tukuy imataña yachasqanta chayqa, manaraj imatapis maychus kajta yachanchu.

³ Pichus Diosta munakun, chaytaqa Dios paypata kasqanta rejsikapun.

⁴ Chantá, imatataj nisunman lantikunaman jaywasqa mikhunamantari? Yachanchej jina lanteqa mana imachu kay pachapeqa. Yachallanchejtaj uj k'ata Dioslla kasqanta.

⁵ Runakuna ninku janaj pachapi, chantá kay pachapipis ashkha dioskuna kasqanta. Chayrayku paykuna ashkha dioskunata, chantá atiyniyojkunata ima yupaychanku.

⁶ Chaywanpis noqanchejpajqa uj Dioslla tiyan, Tata Dios. Paymanta tukuy ima jamun, noqanchejtaj paypaj kawsanchej. Jinallataj Tukuyta Kamachejqa ujlla tiyan, Jesucristo. Paynejta Dios tukuy ima kaj chhikata ruwarqa, paynejllatataj noqanchejman kawsayta qowanchej.

⁷ Chaywanpis mana Diosta tukuy qhatejkunachu kayta yachanku. Wakinkuna lantikunata yupaychanaman yachasqa kaspa, yuyanku lantikunaqa cheqapuni atiyniyoj kasqankuta. Ajinaqa lantikunaman jaywasqa mikhunata mikhuspa, yuyanku chay lantikunata yupaychashasqankuta. Chayrayku sonqonku pisi kallpa kasqanrayku paykunata juchachan, yuyankutaj juchallisqankuta.

⁸ Yachanchej mana mikhunachu Dioswan aswan allinpaj qhawachiwasqanchejta. Sichus mana mikhunchejchu chayqa, mana pisipaj qhawasqachu kasunman, nitaj mikhusqanchejrayku aswan allinpajchu qhawasqa kasunman.

⁹ Chayta yachaspapis, qankuna allinta qhawakuychej. Ichapis imatapis mikhuyta atisqaykichejrayku pikunachus Cristopi atinikuypi manaraj sinch'ita sayankuchu, chaykunata misk'achiwajchej.

¹⁰ Nisunman: Qan chayta yachashaspa, lanti yupaychana wasipi mikhoj tiyaykurikuwaj. Sichus jinallaman pisi kallpa wawqeyki mikhushajta rikusunkiman chayqa, manachu paypis lantikunaman jaywasqa mikhunata mikhuyta munallanmantaj?

¹¹ Ajinaqa, lantikuna mana imachu kasqankuta yachashaspa qan mikhusqaykirayku, pisi kallpa wawqeyki Diosmanta karunchakunman, piraykuchus Cristo wañorqa, chay.

¹² Ajinamanta qanqa wawqe panakunaj contranpi juchallinki. Chantá Cristopi atinikuypi manaraj sinch'ita sayajpa sonqonta nanachispa, Cristoj contranpipis juchallillankitaj.

¹³ Chayrayku sichus noqa lantikunaman jaywasqa mikhunata mikhusqayrayku Cristota qhatej masiy misk'anman chayqa, noqaqa mana jayk'aj chay aychata mikhusajchu, imajtinchus mana munanichu Diosta qhatej masiyta juchallichiyta.