1 Corintios 4 - DIOSPA QHELQACHISQ

Jesuspa kuraj kachankunaj ruwasqanku

¹ Qankunaqa Cristoj kamachinkunata jinalla qhawanawayku tiyan, imaraykuchus noqayku Diospa wakichisqanmanta chay pakasqa yachayta yachachinaykupaj kamachisqa kayku.

² Ajinaqa pichus uj ruwanata jap'ejqa yachayta qonan tiyan pay atinikunapaj jina kasqanta.

³ Noqaqa ruwasqay allinchus manachus kasqanta ninaykichejmanta mana llakikunichu, nillataj wajkuna ninankumantapis. Manataj noqa kikiypis niymanchu ruwasqay allinchus manachus kasqanta.

⁴ Sonqoyqa mana imamantapis juchachawanchu. Chaywanpis chay mana niytachu munan noqa mana juchayojchu kasqayta. Aswanpis Dioslla juzgayta atiwan.

⁵ Chayrayku amaraj imatapis juzgaychejchu manaraj Jesucristo kutimushajtin. Pay kutimuspa, laqhapi pakasqa kajta sut'inchanqa, rikuchenqataj imatachus sapa uj sonqonchejpi yuyasqanchejta. Chaymantataj sapa ujta ruwasqanman jina Dios jatunchanqa.

⁶ Wawqe panakuna, tukuy kaykunata qankunaj allinniykichejpaj parlani. Chantá willarqaykichej noqawan, Apoloswan ima imaynachus kasqaykumanta, qankuna noqaykumanta yachakunaykichejpaj. Sichus qankuna Diospa Qhelqachisqanmanta nisqayta uyarinkichej chayqa, mana mayqenniykichejpis may kasqanta yuyaspa, ujman sayakunkichejchu nitaj ujkunata pisipaj qhawankichejchu.

⁷ Imaraykutaj qan yuyakunki aswan sumaj kasqaykita ujkunamanta nisqari? Chayrí imataj tiyapusunki mana Diospa qosusqan? Paychus qosunki chayrí, imaraykutaj runaykachanki qan kikiykipis tariwaj karqa jinari?

⁸ Qankunajtaqa tukuy imatachus munasqaykichej tiyapusunkichejña, qhapajñataj kankichej, jinataj kuraj kamachejkuna jina mana noqallaykuwan kamachishankichej. Walej kanman cheqapuni kuraj kamachejkuna jina kamachinaykichej, noqaykupis qankunawan khuska kamachinaykupaj.

⁹ Chaywanpis qhawasqayman jina Diosqa noqayku Jesuspa kachankunata qhepa qhepaman churawayku, wañuchinapaj churasqa runata jina. Chayrayku tukuy runaj asikunan kayku, jinallataj angelkunajta.

¹⁰ Cristota kasusqaykurayku runakunaqa mana yuyayniyojta jina qhawawayku. Qankunatatajrí paykuna Cristorayku may yachayniyojkunata jina qhawasunkichej. Noqayku pisi kallpa kayku, qankunatajrí sinch'i kallpayoj kankichej. Qankuna manchay respetowan qhawasqa kankichej, noqaykutajrí pisipaj qhawasqa.

¹¹ Kunankama yarqhachikuspa kashayku, yakumantapis ch'akichikuspa. Jinallataj pisi p'achayoj kayku, maqasqa, manataj wasiykupis kanchu.

¹² Kawsanaykupaj noqayku sayk'uy sayk'uyta imatapis ruwayku. Runakuna maldiciwayku, noqaykutaj saminchaspa kutichiyku. Qhatiykachasqa kaspapis, pacienciawan ñak'ariyku.

¹³ Runa mana allin kajta noqaykumanta parlajtinku, noqaykoqa allin kajwan kutichiyku. Ajinata ruwashajtiykupis, runakuna kunankama kay pachapi q'opapis kaykuman jina qhawawayku, tukuypa wijch'usqan q'opata jina.

¹⁴ Ajinata nispa noqa qhelqamuykichej mana qankunata p'enqachinaypajchu, aswanpis munasqa wawaykunata jina k'amisunaykichejpaj.

¹⁵ Cristomanta yachachisunaykichejpaj 10.000 runapis kachunku, chaywanpis uj k'ata tataykichej tiyan. Chaytaj noqa kani, imaraykuchus Jesucristomanta sumaj willayta willarqaykichej chaypacha, qankuna wawaykunaman tukorqankichej.

¹⁶ Chayrayku mañakuykichej, noqa imatachus ruwasqayta, ajinallatataj qankunapis ruwanaykichejta.

¹⁷ Chayrayku Timoteota kachamorqaykichej. Payqa munasqa waway jina, chantataj Tukuyta Kamachej Jesusta kasukuspa purej. Pay yuyarichisonqachej Cristo Jesusta qhatikuspa imaynatachus purisqaymanta, imaraykuchus ajinata purinata tukuynejpi sapa iglesiapi yachachini.

¹⁸ Qankunamanta wakin mayta wapuykachashankichej, yuyaspa noqa qankunata watukoj manaña kutimunayta.

¹⁹ Chaywanpis sichus Tukuyta Kamachej Jesús munanqa chayqa, qankunata watukoj usqhayta jamusaj. Chaypachataj yachasaj chay may kasqankuta yuyakojkuna parlashallankuchus, chayrí nisqankuta ruwashankuchus manachus, chayta.

²⁰ Pichus Diospa kamachiyninpi kajqa mana parlallanchu, manachayqa ruwasqanwan yachayta qon, Diospata kasqanmanta.

²¹ Imatataj munankichej? Varawan seq'onaytachu munankichej, chayrí munakuywan, llamp'u sonqowan ima jamunaytachu?