1 Corintios 3 - DIOSPA QHELQACHISQ

Diospa ruwananpi yanapakojkuna

¹ Munasqa wawqe panakuna, noqa qankunawan kashaspa, mana Diospa Espiritunpa pusasqan runakunaman jinachu parlarqaykichej, imajtinchus qankuna Diosman manaraj kutirikojkuna jina purinkichej. Chayrayku qankunaman parlarqaykichej, kunallanraj Cristoman kutirikojkunaman jinalla.

² Imaynatachus ñuñushaj wawaman lecheta qonchej, manataj khamuna mikhuytachu, ajinata qankunaman yachacherqaykichej jasallata yachanaykichejpaj jina. Mana yachay atinatarí mana yachacherqaykichejchu, imaraykuchus mana entiendeyta aterqankichejchu. Kunanpis manarajpuni atinkichejchu,

³ imaraykuchus Diosman mana kutirikojkuna imaynatachus purinku, jinallataraj purishankichej. Qankuna ukhupi qhawanakuykuna, churanakuykuna, t'aqanakuykuna ima tiyan. Chaykunata ruwaspaqa, qankuna manapis Diosta qhatejkunachu kawajchej jina ruwashankichej, Diosman mana kutirikojkuna jinataj yuyashankichej.

⁴ Maypachachus qankunapura ninakunkichej: Noqaqa Pablota qhatini, noqarí Apolosta, nispa chaypacha, manachu Diosta mana qhatejkuna jina ruwashankichej?

⁵ Chaywanpis, pitaj Pablori? Pitaj Apolosri? Noqayku Diospa kamachinkunalla kayku, qankunataj noqaykunejta Jesucristopi atinikorqankichej. Chantá sapa ujniyku imatachus Tukuyta Kamachej Jesucristo kamachiwasqaykuman jina ruwarqayku.

⁶ Noqa qankunaman Jesucristomanta sumaj willayta willarqaykichej, Apolostaj yachachisorqachej Jesuspi atinikuspalla imaynatachus purinaykichejta. Chaywanpis Dioslla astawan astawan Cristopi atinikuyta yachanaykichejpaj yanapasorqachej.

⁷ Chayrayku pichus sumaj willayta willaj, jinataj pichus yachachej mana chaykamachu kanku. Aswanqa Dioslla, pichus astawan astawan Cristopi atinikuyta yanapawanchej, chay.

⁸ Sumaj willayta willajwan, chantá pichus yachachejwanqa ujlla kanku. Jinataj sapa ujninku ruwasqankuman jina t'inkankuta jap'enqanku.

⁹ Noqaykutajrí Diospa yanapajninkunalla kayku, qankunataj Diospa chajran jina kankichej, chayrí Diospa sayarichisqan wasi jina.

¹⁰ Dios noqawan k'achapuni kaspa, noqa sumajta yachaj albañil jina cimientota churarqani. Kunantaj wajkuna chaypa patanpi wasichashanku. Chaywanpis, sapa uj allinta qhawachun cimiento churasqapi imaynatachus wasichashasqanta.

¹¹ Manataj pipis cimiento churasqamantaña waj cimientota churayta atinchu, imaraykuchus chay cimientoqa Jesucristo.

¹² Pichus chay cimiento patapi wasichajqa kay jina imakunawan wasichayta atinman: Qoriwan, qolqe metalwan, lliphipirishaj rumiwan, chayrí k'aspiwan, ichhuwan, ch'aki laqhewan ima.

¹³ Chaywanpis sapa uj imaynatachus ruwasqan juicio p'unchaypi sut'inchakonqa. Chay p'unchay Diosqa ninawan jina sapa ujpa ruwasqanta ruphaykuchenqa, imaynachus kasqan yachakunanpaj.

¹⁴ Cimiento patapi pejpa ruwasqanchus mana ruphanqa chayqa, chayman jina pay t'inkanta jap'enqa.

¹⁵ Pejpatachus ruwasqan ruphanqa chayrí, mana ima t'inkatapis jap'enqachu. Chaywanpis, payqa qhespichisqa kanqa, nina ukhumanta ñak'ayllata ayqekoj runa jina.

¹⁶ Manachu yachankichej qankuna tukuyniykichej Diospa templon kasqaykichejta, Diospa Espirituntaj qankunapi tiyakushasqanta?

¹⁷ Sichus pipis Diospa templonta urmachin chayqa, Diospis chay runata urmachillanqataj, imaraykuchus Diospa templonqa payllapaj t'aqasqa. Qankunamin chay templo kankichej.

¹⁸ Ama pipis pay kikinta q'otiyakuchunchu. Sichus yuyankichej runaj qhawasqanman jina yachayniyoj kasqaykichejta chayqa, mana yachayniyojman tukuychej, Diospa ñawpaqenpi cheqapuni yachayniyoj kanaykichejpaj.

¹⁹ Runaj yachaynenqa Diospaj qhasi manakaj. Diospa Qhelqachisqanpi nin: Diosqa yachayniyojkunata yachaynillankupitaj ch'ipaykun, nispa.

²⁰ Nillantaj: Tukuyta Kamachej Diosqa yachayniyojkunaj yuyasqankuta rejsin, yachantaj qhasi manakaj kasqanta, nispa.

²¹ Chayrayku ama pi runatapis qhatisqaykichejrayku runaykachaychejchu, imaraykuchus tukuy ima qankunajta:

²² Pablo kachun, Apolos kachun, Cefas kachun, kay pacha kachun, kawsay kachun, wañuy kachun, kunan p'unchaypis kachun, jamoj p'unchaypis kachun, tukuy chaykunaqa qankunajta.

²³ Qankunataj Cristojta kankichej, Cristotaj Diospata.