1 Corintios 2 - DIOSPA QHELQACHISQ

Pabloqa Cristo Cruzpi wañusqanmanta willan

¹ Wawqe panakuna, qankunaman jamuspaqa, noqa mana sumaj yachayniyoj jinachu parlarqani, nillataj qankunata t'ukuchinaypaj jinachu Diospa pakasqa wakichisqanmanta parlarqaykichej.

² Manachayqa qankunawan kashaspa, Jesucristollamanta parlanayta nerqani, astawanqa cruzpi wañusqanmanta.

³ Noqaqa qankuna ukhupi pisi kallpayoj karqani, mancha manchalla, kharkatitispataj.

⁴ Jesucristomanta willaspa, chantá parlaspa ima mana sumaj yachayniyoj jinachu parlarqaykichej, nisqayta jap'ikunaykichejpaj jina. Manachayqa noqa munarqani Santo Espíritu atiyninta rikuchinanta, chaynejllata qankuna nisqayta jap'ikunaykichejpaj.

⁵ Ajinata ruwarqani Jesucristopi atinikusqaykichej ama runaj yachasqanpichu sayachisqa kananpaj, manachayqa Diospa atiyninpi.

Dios imatachus wakichisqanta Santo Espiritunejta rejsichin

⁶ Chaywanpis noqayku Diospi atinikuypi wiñay tukusqa kajkunawan yachayniyoj jina parlayku. Mana runakunaj yachayninkuwanchu, nitaj kamachejkunaj yachayninkuwanchu parlayku, imaraykuchus paykuna chinkapunanku kashan.

⁷ Aswanpis Diospa pakasqa yachayninmanta parlayku, mayqenchus manaraj kay pacha ruwasqa kashajtin wakichisqaña karqa Diospa jatun kayninpa k'anchayninpi paywan khuska kananchejpaj, chaymanta.

⁸ Kay pachapi kamachejkunamanta mana pipis Diospa wakichisqanmanta entiendeyta aterqankuchu. Yachankumanchus karqa chayqa, Tukuyta Kamachej may jatunchasqa Cristota mana jayk'ajpis cruzman chakatankumanchu karqa.

⁹ Diospa Qhelqachisqanpi nin: Imatachus ñawi mana rikorqachu, nitaj ninri uyarerqachu, nillataj runa sonqonpi yuyarqachu, chayta Dios wakicherqa payta munakojkunapaj, nispa.

¹⁰ Chaywanpis chaykunata Dios Espiritunnejta noqanchejman rejsichiwarqanchej, imaraykuchus paypa Espíritun tukuy imata allinta watun. Diospa taripay mana atina ukhu yachaynintapis watullanpuni.

¹¹ Pitaj yachayta atinman, imachus runaj sonqonpi kashan, chaytari? Manachu runaj espiritullan chayta yachan? Jinallataj Diospa Espiritullan yachan Diospa tukuy yuyasqanta.

¹² Noqanchejqa Diosman mana kutirikojkunaj yuyasqankuman jinachu yuyanchej, manachayqa Diosmanta jamoj Espíritu noqanchejpi kashan yachananchejpaj imatachus Dios munasqanraykulla qowasqanchejta.

¹³ Noqayku chaykunamanta parlayku, mana runaj yachachisqanman jinachu, aswanpis Santo Espíritu yachachiwasqaykuman jina. Ajinaqa Santo Espiritumanta kaj imakunata sut'inchayku Espíritoj qosqan parlaykunawan.

¹⁴ Diosman mana kutirikoj runarí Diospa Espiritunpa yachachisqanta mana jap'ikuyta atinchu, imaraykuchus paypajqa wampoj thawtisqan jinalla. Chayta mana entiendeyta atinchu, imaraykuchus imatachus niyta munasqanta yachananpajqa Santo Espíritoj yanapasqan kanan tiyan.

¹⁵ Chaywanpis pichus Diospa Espiritunpa yanapasqan kajqa, allinchus manachus kasqanta tukuy imata qhawan. Chaywanpis pikunachus mana Diospa Espiritunniyojchu kanku, chaykuna Diospa Espiritunniyoj kajta mana juzgayta atinkuchu.

¹⁶ Diospa Qhelqachisqanpi nin: Pitaj Tukuyta Kamachej Diospa yuyasqanta yachanmanri? Chayrí, pitaj Diosta yachachiyta atinmanri? nispa. Chaywanpis noqanchej chay imakunata entiendeyta atinchej, imajtinchus Cristo jina yuyayta atinchej.