1 Corintios 15 - DIOSPA QHELQACHISQ

Cristoqa cheqapuni wañusqamanta kawsarimporqa

¹ Kunanqa, wawqe panakuna, Jesusmanta sumaj willayta willasqaymanta yuyarichiykichej. Qankuna chay sumaj willayta jap'ikorqankichej, chaypitaj sinch'ita sayashankichej.

² Chay sumaj willaynejta qhespichisqa kankichej, sichus willasqaymanta jap'ikuspa, sinch'ita sayashankichej chayqa. Mana jina chayrí, sumaj willayta jap'ikusqaykichej qhasillapaj kanman.

³ Ñawpajta yachacherqaykichej imatachus noqapis yachaqakusqayta: Cristo juchanchejrayku wañorqa, Diospa Qhelqachisqanpi nisqanman jina.

⁴ Jinallataj pay p'ampasqa karqa, kawsarimporqataj kinsa p'unchayninman, Diospa Qhelqachisqanpi nisqanman jina.

⁵ Chantá Cristo kawsarimpuspa, Pedroman rikhurerqa, chaymantataj chunka iskayniyoj kuraj kachankunaman.

⁶ Chay qhepata, 500 wawqe panakuna tantasqa kashajtinku, Cristo ujllapi paykunaman rikhurillarqataj. Chay rikojkunamantarí ashkha kawsashankuraj, wakintaj wañupunkuña.

⁷ Chaymanta Santiagoman rikhurillarqataj, chay qhepatataj tukuynin kuraj kachankunaman.

⁸ Tukuymanta qhepatataj Cristo noqamanpis rikhurillawarqataj, manaraj paqarinanpi paqarej wawa jina kashajtiypis.

⁹ Noqaqa Jesuspa kuraj kachankuna ukhupi aswan mana kasu ruwana kani, manataj Jesuspa kuraj kachan nisqa kanaypaj jinachu, ñawpajta Diospa iglesianta chinkachiyta munaspa qhatiykachasqayrayku.

¹⁰ Chaywanpis, Diospa qhasilla k'acha yanapayninrayku Jesuspa kachan kani. Chay k'acha yanapaynintaj noqapaj mana qhasipajchu karqa, imajtinchus tukuy kuraj kachakunamanta nisqaqa noqa astawan Diospaj llank'arqani. Chaywanpis mana kallpallaywanchu llank'arqani, aswanpis Dios noqanejta k'acha yanapayninwan yanapawasqanrayku llank'arqa.

¹¹ Ajinaqa mana imananchu, noqachus willasaj, chayrí paykunachus, imaraykuchus tukuyniyku Jesuspa sumaj willaynillanmanta parlayku. Qankunataj chay willayta jap'ikorqankichej.

Jesusta qhatejkunapis wañusqamanta kawsarichisqa kasunchej

¹² Sichus noqayku Cristo wañusqamanta kawsarimpusqanta willayku chayqa, imaraykutaj qankuna ukhumanta wakin ninku wañojkuna mana kawsarinankutari?

¹³ Sichus wañusqakuna mana kawsarenqankuchu chayqa, nillataj ari Cristopis kawsarimporqachu.

¹⁴ Cristochus mana kawsarimporqa chayrí, willasqaykoqa qhasi manakaj, qhasi manakajllataj paypi atinikusqaykichejpis.

¹⁵ Manachus wañusqakuna kawsarimonqankuchu chayqa, noqayku llulla testigo kaykuman, imaraykuchus willarqayku Diosqa Cristota kawsarichisqanta.

¹⁶ Sichus wañusqakuna mana kawsarimonqankuchu chayqa, Cristopis manallataj kawsarimporqachu.

¹⁷ Cristochus mana kawsarimporqa chayqa, Diospi atinikusqaykichejpis qhasi manakaj. Ajinaqa, manallataj juchaykichej pampachasqarajchu.

¹⁸ Jina chayqa, Cristopi atinikusqankumanta qhepaman wañojkunapis chinkasqallataj kashankuman.

¹⁹ Sichus Cristopi atinikuspa suyakushanchej pay kay kawsayllapi yanapanawanchejta chayqa, tukuy runamanta aswan khuyana kanchej.

²⁰ Chaywanpis Cristo wañusqamanta kawsarimpusqanqa jinapuni. Pay wañojkunamanta ñawpajta kawsarimoj kaspa, yachayta qon qhepanejman wajkunapis kawsarimunallankutataj.

²¹ Imaynatachus uj runanejta wañuy kay pachapi rikhurerqa, ajinallatataj wañusqamanta kawsarimuypis uj runanejllatataj qallarin.

²² Imaynatachus Adán juchallisqanrayku tukuy wañunchej, ajinallatataj Cristonejta tukuy kawsarichisqa kasunchej.

²³ Chaywanpis sapa uj maychus kananpi kawsarimpun: Ñawpajta Cristoraj kawsarimporqa, chaymantataj Cristo kutimojtin, paypata kajkunapis kawsarimpullasunchejtaj.

²⁴ Chaypa qhepanta kay pachaj tukukuynin kanqa. Chaypacha Cristoqa tukuy kamachejkunata, tukuy atiyniyojkunata, chantá tukuy kurajkunata ima chinkarparichenqa. Chaymantataj kamachinapaj atiyta Tata Diosman jaywaponqa, pay kamachinanpaj.

²⁵ Cristo kamachinanpuni tiyan tukuynin awqankuna chakin uraman churasqa kanankukama.

²⁶ Cristoj awqankunamanta qhepa qhepa kaj atipasqan awqarí wañuy kanqa.

²⁷ Diospa Qhelqachisqanpi nin: Diosqa tukuy imata chakin uraman churarqa, nispa. Maypachachus nin Cristoj chakin uraman tukuy imata churasqanta chaypacha, mana niyta munanchu Tata Diosqa Cristoj chakin uraman churasqa kasqanta, imaraykuchus paymin Cristoj chakin uraman tukuy imata churajqa.

²⁸ Chaymanta tukuy ima Cristoj chakin urapiña churasqa kajtin, kikin Churipis Tatanpa kamachiyninman churakonqa, pichus tukuy imata chakin uraman churarqa, chayman. Chaymantapachataj Diosqa tukuy kaj chhikata kamachenqa.

²⁹ Manachus wañusqakuna kawsarimponqanku chayqa, wañusqakunarayku bautizakojkuna imatataj tarenqankuri? Sichus wañusqakuna mana kawsarimonqankuchu chayqa, imaraykutaj paykunarayku bautizakunkuri?

³⁰ Chantá manachus wañusqakuna kawsarimponqanku chayqa, imaraykutaj noqayku ima pachallapis wañuchisqa kanaykupaj jina kashaykuri?

³¹ Wawqe panakuna, noqa Tukuyta Kamachej Jesucristo qankunaj sonqoykichejpi imatachus ruwashasqanmanta jatunchakuni. Jinallataj noqa sapa p'unchay wañuy patapipis kashayman jina kashani.

³² Éfeso llajtapipis runakunawan maqanakullarqanitaj, paykunataj manchay phiña monte animal jina karqanku. Jina kajtenqa, paykunawan maqanakuspa, ima allintataj tarerqaniri? Cheqatapunichus wañusqakuna mana kawsarimonqankuchu chayqa, wajkuna ninku jina noqanchejpis nillasunmantaj: Mikhuna, ujyana, imaraykuchus q'aya wañupusunchej, nispa.

³³ Ajinata nejkunawan ama q'otiyachikuychejchu. Noqanchej niyta yachanchej: Mana allin runakunawan purinki chayqa, paykuna pierdechisonqanku, nispa.

³⁴ Chayrayku qankuna yuyayniykichejman kutiriychej, amañataj juchalliychejchu, imaraykuchus qankunamanta wakin mana maychus kajta Diosmanta yachankichejchu. Chayta nishaykichej qankuna p'enqakunaykichejpaj.

Imaynata wañusqakuna kawsarimonqanku?

³⁵ Ichapis qankunamanta wakin tapukushankichej: Imaynatataj wañusqakuna kawsarimonqankuri? Kawsarimuspa, imayna ukhuyojtaj kanqankuri? nispa.

³⁶ Ajinata tapusqaykichejqa mana yuyayniyojpa tapukusqan. Qhaway má, muju tarpusqayki p'utunanpaj ñawpajta wañunraj, chantá p'utuspa wiñan.

³⁷ Tarpuspaqa, mana kikin mallkitachu tarpunki, manachayqa mujullata, trigopis, chayrí waj mujupis kachun.

³⁸ Chaymantaj Dios munasqanman jina imayna rijch'ayniyojchus kananta nin. Sapa mujutataj imaynachus kananman tukuchin.

³⁹ Jinallataj tukuy imaymana rijch'aj aycha tiyan. Runaj aychanqa waj jina, uywaj aychanpis waj jina. Challwakunajtapis aychankoqa waj jina, p'isqokunajtapis waj jinallataj.

⁴⁰ Chantá janajpi ashkha imakuna tiyan, kay pachapipis. Janajpi kajkunaj jatun kaynenqa uj jina, kay pachapi kajkunajpatataj waj jina.

⁴¹ Intej k'anchaynenqa uj jina, killaj k'anchayninpis waj jina, ch'askakunajtapis waj jinallataj. Chantá uj ch'aska waj ch'askamanta uj jinataj.

⁴² Ajinallataj wañusqamanta kawsarimuna kanqa. Q'etayapoj ayata p'ampanchej, chaywanpis kawsarichisqa kajqa ni jayk'aj ujtawan wañonqañachu.

⁴³ P'ampasqa ukhoqa mana munanapaj jinachu. Kawsarichisqa kajrí maypaj qhawasqa kanqa. P'ampasqa ukhoqa pisi kallpayoj, kawsarichisqa kajrí may atiyniyoj kanqa.

⁴⁴ Runaj ayanta p'ampanchej chayqa, janaj pachapaj wakichisqa ukhuyoj pay kawsarichisqa kanqa. Runaj ukhun tiyan. Tiyallantaj janaj pachapi kawsanapaj jina Santo Espíritoj kawsarichisqan ukhupis.

⁴⁵ Ajinaqa Diospa Qhelqachisqanpi nin: Ñawpaj kaj runa Adanqa kawsaj runa ruwasqa karqa, nispa. Qhepa kaj Adanrí kawsayta qoj Espiritumin karqa.

⁴⁶ Jinallataj Santo Espíritoj qosqan ukhoqa mana ñawpajchu, manachayqa runaj ukhunraj, chaymantataj janaj pachapaj wakichisqa ukhu rikhurin.

⁴⁷ Ñawpaj kaj runaqa kay pachamanta karqa, jallp'amanta ruwasqa. Qhepa kaj runarí, pichus Cristo, janaj pachamanta jamorqa.

⁴⁸ Kay pachapi tukuy runakuna Adán jina ukhuyoj kanchej. Janaj pachapi kawsajkunatajrí, pichus janaj pachapi kashan, chay jina ukhuyoj kanqanku.

⁴⁹ Ajinaqa, imaynatachus noqanchej jallp'amanta ruwasqa ñawpa runaman rijch'akunchej, jinallatataj aswan qhepaman janaj pachamanta jamojmanpis rijch'akusunchej.

⁵⁰ Wawqe panakuna, kayta niykichej: Kay ukhunchejqa Diospa kamachiyninman mana yaykonqachu, imaraykuchus wañoj ukhunchejqa imachus wiñaypaj kajta mana chayaqeta jina jap'iyta atinchu.

⁵¹ Kunanqa uj pakasqa yachayta sut'inchasqaykichej: Mana tukuychu wañusunchej, chaywanpis tukuy waj jinaman tukuchisqa kasunchej.

⁵² Ujllata, uj ñawi ch'irmiypi, qhepa kaj trompeta waqajtin, waj jinaman tukuchisqa kasunchej. Trompeta waqajtin, ñawpajta wañusqakuna kawsarimponqanku mana jayk'aj ujtawan wañunankupaj. Chaymantataj noqanchejpis waj jinaman tukuchisqa kasunchej.

⁵³ Kay q'etayapoj ukhoqa tukupunan tiyan mana jayk'aj q'etayaj ukhuman. Kay wañoj ukhunchejtaj mana jayk'aj wañoj ukhuman tukuchisqa kanan tiyan.

⁵⁴ Maypachachus kay q'etayaj ukhu tukuponqa mana jayk'aj q'etayaj ukhuman, kay wañoj ukhutaj tukuponqa mana jayk'aj wañojman chaypacha, Diospa Qhelqachisqanpi nisqanman jina junt'akonqa: Wañoyqa atipasqaña, chinkachisqataj, nispa.

⁵⁵ Kunanqa wañuypa atiynin atipanawanchejpaj manaña kanchu, nitaj ima mana allintapis ruwayta atiwanchejchu.

⁵⁶ Juchaqa wañuyta apamun, kamachisqakunanejtataj jucha atiyniyoj rikhurin.

⁵⁷ Chaywanpis Diosta pachis ninachej, Tukuyta Kamachej Jesucristonejta juchata, chantá wañuyta ima atipayta yanapawasqanchejrayku.

⁵⁸ Ajina ari, munasqa wawqe panakuna, mana sayk'uspa sinch'ita sayaychej, Tukuypa Kamachejpa ruwananpi astawan astawan llank'aspa, imaraykuchus yachankichej Tukuyta Kamachej Jesuswan ujchasqa llank'asqaykichejqa mana qhasipajchu kananta.