1 Corintios 14 - DIOSPA QHELQACHISQ

Imachus tukuypaj aswan allin

¹ Munakuyniyoj kayta anchatataj munaychej. Jinallatataj Santo Espíritu ruwanapaj atiyta qon, chaykunata jap'iyta munallaychejtaj, astawanpuneqa Diosmanta sut'inchayta.

² Pichus mana rejsisqa parlaypi parlajqa mana runakunamanchu parlan. Manachayqa Diosllaman parlan, nitaj pipis parlasqanta entiendenchu, Santo Espíritoj parlachisqan pakasqa imakunamanta parlasqanrayku.

³ Diosmanta sut'inchajrí runakunaman parlan yuyayninpiña kanaman chayanankupaj, jinataj kallpachasqa, sonqochasqataj kanankupaj.

⁴ Chantá pichus mana rejsisqa parlaypi parlajqa pay wiñanallanpaj yanapakun. Pichus Diosmanta sut'inchajrí iglesiamanta tukuy kajkuna yuyayninkupiña kanaman chayanankupaj yanapan.

⁵ Noqa munayman tukuyniykichej mana rejsisqa parlaykunapi parlanaykichejta. Chaywanpis astawan munayman Diosmanta sut'inchanaykichejta, imaraykuchus Diosmanta sut'inchanaqa mana rejsisqa parlaypi parlanamanta aswan. Maypachachus mana rejsisqa parlaypi parlasqanta pipis sut'inchajtillan, iglesiamanta kajkuna wiñayta atinankupaj yanapanman.

⁶ Wawqe panakuna, sichus noqa qankunata watukoj jamuspa mana yachasqaykichej parlaypi parlayman chayqa, qankunapaj ima allintaj kanmanri? Aswanpis allinniykichejpaj kanman, sichus Diosmanta sut'inchayman chayqa, chayrí jatun yachaywan parlayman, manachayrí ima yachaytapis yachachiykichejman chayqa, chaypachalla.

⁷ Ajinallataj ima tocanawanpis kashan. Sichus qena, arpapis mana waj jinata waqanman chayqa, imaynatataj yachasunman qenachus, chayrí arpachus waqashasqantari?

⁸ Cornetachus mana sut'ita waqanman chayqa, soldadokuna imaynatataj yachankuman maqanakoj rinankupaj wakichikunankuri?

⁹ Ajinallataj sichus qankunapis mana rejsisqa parlaypi mana entiendenapaj jina parlankichej chayqa, imaynatataj pipis yachanman imatachus niyta munashasqaykichejtari? Ajinaqa mana rejsisqa parlaypi parlasqaykichej wayrallamanpis parlashawajchej jina kanman.

¹⁰ Kay pachapeqa may chhika parlaykuna tiyan, tukuyninkutaj imatachus niyta munasqanta yachanapaj jina kanku.

¹¹ Chaywanpis, sichus noqa mana rejsisqa parlaypi imatachus parlawasqanta mana yachanichu chayqa, chay runapaj waj llajtayoj jina kani, paypis noqapaj jinallataj.

¹² Ajinallataj qankunawanpis kanman. Chayrayku sichus qankuna Santo Espíritu ruwanapaj atiykunata qosunaykichejta munankichejpuni chayqa, astawan munaychej, mayqenkunachus iglesiamanta kajkunata yanapanqa yuyayninkupiña kanaman chayanankupaj, chaykunata.

¹³ Chayrayku pichus mana rejsisqa parlaypi parlajqa Diosmanta atiyta mañakuchun imatachus parlasqanta sut'inchayta atinanpaj.

¹⁴ Sichus noqa mana rejsisqa parlaypi Dioswan parlarikuni chayqa, espiritullay parlashan. Jinapis noqaqa mana ima allintapis tarinichu.

¹⁵ Jina kajtenqa, imatataj ruwasajri? Sichus espirituywan Dioswan parlarikusaj chayqa, imatachus nishasqayta yachaspa parlarikusaj. Sitajchus espirituywan takisaj chayrí, imatachus takishasqaytapis yachallasajtaj.

¹⁶ Qanchus espiritullaykiwan mana rejsisqa parlaypi Diosta yupaychawaj chayqa, imatachus nishasqaykita mana yachajkuna imaynatataj qanwan khuska Diosta jatunchankumanri? Chayrí, sichus imatachus nishasqaykita mana yachankumanchu chayqa, imaynatataj qanwan khuska Diosta pachis ninkuman?

¹⁷ Ichapis Diosta pachis nispa nisqaykeqa sumaj kanman. Jinapis pichus uyarisojkunata yuyayninkupiña kanaman chayanankupaj mana yanapankichu.

¹⁸ Noqaqa Diosta pachis nini, imaraykuchus mana rejsisqa parlaykunata qankunamanta nisqa aswan ashkhata parlani.

¹⁹ Chaywanpis iglesia tantasqa kashajtinku yachachishaspa, noqa astawan munayman phishqa simillata parlayta, entiendenankupaj jina, chunka waranqa simikunata mana rejsisqanku parlaypi parlanaymantaqa.

²⁰ Wawqe panakuna, ama wawa jina yuyaychejchu. Mana allin kajllapaj wawa jina kaychej, imatapis qhawanapirí wiñay tukusqa runa jina kaychej.

²¹ Diospa Qhelqachisqanpi nin: Kay runakunaman mana yachasqanku parlaykunapi parlaykusaj, waj llajtayojkunawan ima parlapayachisaj. Chaywanpis ni ajinapipis kasuwanqankuchu, nispa Tukuyta Kamachej Dios nin.

²² Chayrayku mana rejsisqa parlaykunapi parlayqa Dios atiyniyoj kasqanmanta señal jina Diosman mana kutirikojkunapaj, manari Diosman kutirikojkunapajchu. Diosmanta sut'inchayrí Diosman kutirikojkunaj allinninkupaj, manataj mana Diosman kutirikojkunapajchu.

²³ Nisunman: Iglesia jina tukuy tantasqa kashaspa, tukuyniykichej mana rejsisqa parlaykunapi parlashawajchej. Jinapis sichus chayman yaykumunman Diosmanta pisita yachaj, chayrí Diosman mana kutirikoj chayqa, manachu nisunkichejman: Kaykunaqa mana paykunapichu kashanku, nispa?

²⁴ Chayrí tantasqa kashaspa, sichus tukuyniykichej Diosmanta sut'inchashawajchej. Jinapi sichus Diosman mana kutirikoj runa, chayrí Diosmanta pisita yachaj chayman yaykumunman chayqa, imatachus parlasqaykichejta uyarispa, juchasapa kasqanta reparakonqa, chantá sonqonta qhawarikonqa ima.

²⁵ Ajinamanta sonqon ukhupi pakasqa kaj sut'inchasqa kanqa, paytaj qonqorikuspa, Diosta yupaychanqa: Cheqapuni Dios qankunawan kashan, nispa.

Iglesia jina tantakuspa tukuy imata allinta ruwana

²⁶ Ajinaqa wawqe panakuna, kaykama imatachus parlasqanchejta uj iskay simipi nisunchej. Diosta yupaychanaykichejpaj tantakuspaqa, ujniykichej takiyta atiwajchej, ujniykichejtaj yachachiyta. Jinallataj ujniykichej Dios imatachus sut'inchasqanta sut'inchayta atiwajchej, ujniykichejtaj waj parlaykunapi parlayta, chayrí waj parlaykunapi parlasqankuta sut'inchayta ima. Chaywanpis chay tukuy imata ruwaychej sapa ujniykichej kallpachasqa kanaykichejpaj.

²⁷ Mana rejsisqa parlaypi parlaspaqa, iskay, chayrí kinsakamalla, ujmanta uj parlachunku. Wajtajrí imatachus parlasqankuta sut'inchachun.

²⁸ Mana rejsisqa parlaypi imatachus parlasqankuta mana pipis sut'inchaj kajtenqa, paykuna iglesiapi ch'inlla kakuchunku. Aswanpis sapa ujninku sonqonku ukhullapi Dioswan parlachunku.

²⁹ Ajinallatataj Diosmanta sut'inchajkunapis iskay, chayrí kinsa parlachunku, uyarejkunataj imatachus nisqankuta allinta watuchunku cheqachus manachus kasqanta reparanankupaj.

³⁰ Chaywanpis sichus pipis Diosmanta sut'inchashajtin, wajman Dios imatapis sut'inchanman parlananpaj chayqa, pichus parlashaj ch'inyakuchun.

³¹ Ajinamanta ujmanta uj, tukuyniykichej Diosmanta sut'inchayta atinkichej, Diosmanta astawan yachanaykichejpaj, jinataj sonqoykichejpi kallpachasqa kanaykichejpaj.

³² Chaywanpis Diosmanta sut'inchajqa chay sut'inchanapaj atiywan mana apaykachachikunchu,

³³ imaraykuchus Diosqa mana munanchu imatapis qhollpillata ruwananchejta. Aswanpis pay munan imatapis allinta ruwananchejta. Kaytapis nillaykichejtaj: Imaynachus Diospa ajllakusqankunaj tantakuyninkupi ruwana usu kasqanman jina,

³⁴ warmikunaqa tantakuypi ch'inlla kachunku. Paykuna mana parlanankuchu tiyan, aswanpis kasukoj sonqo kananku tiyan, imaynatachus Moisespa kamachisqanpi nin, ajinata.

³⁵ Warmikuna imatapis yachayta munaspaqa, wasinkupi qosankuta tapukuchunku, imaraykuchus iglesia tantasqa kashajtin warmi parlananqa mana allin qhawasqachu.

³⁶ Wawqe panakuna, Diospa simi nisqanta mana qankunachu rikhuricherqankichej, nillataj qankunallachu Diospa nisqanta jap'ikorqankichej.

³⁷ Sichus pipis Diosmanta sut'inchaj kasqanta yuyakunman, chayrí Santo Espirituta tukuy imapi kasusqanta yuyanman chayqa, yachachun kay qhelqasqayqa Diospa kamachisqanpuni kasqanta.

³⁸ Pichus Diospa kamachisqanta mana kasuta ruwajtarí, Diospis manallataj payta kasuta ruwanqachu.

³⁹ Ajinaqa wawqe panakuna, iglesia jina tantakuspaqa, Diosmanta sut'inchayta munaychej, amataj mana rejsisqa parlaykunapi parlajkunata jark'aychejchu.

⁴⁰ Chaywanpis, tukuy imata allinta ruwaychej, ama imapis kachuntachu.