1 Corintios 13 - DIOSPA QHELQACHISQ

Munakoyqa tukuy imamanta nisqa aswan

¹ Sichus noqa kay pachapi kaj chhika parlaykunata parlayta atiyman, angelkunaj parlayninkutapis parlallaymantaj, wajkunatataj mana munakuymanchu chayqa, lataj talán nisqan jinalla kayman, chayrí chhulloj chhulloj waqasqan jinalla.

² Jinallataj manachus wajkunata munakuymanchu chayqa, Diospa simi nisqanta sut'inchasqay, jinataj tukuy pakasqa yachaykunata, chantá kay pachapi tukuy imamanta yachasqay qhasi manakaj kanman. Jinallataj sitajchus noqa orqokunata ithirichinaypaj jina Diospi sinch'ita atinikuyta atiyman, manataj wajkunata munakuymanchu chayqa, noqaqa mana ni imapaj valeymanchu.

³ Sitajchus noqa tukuy tiyapuwasqanta wajchakunaman rak'irayman, ukhuytapis ninaman enqhaykusqa kananpaj jaywaykuyman chayqa, chaymanta jatunchakuyta atiyman. Chaywanpis manachus wajkunata munakuymanchu chayqa, chay ruwasqaywan ni imata tariymanchu.

⁴ Pichus munakuyniyojqa pacienciayoj, k'achataj. Jinallataj mana envidiakunchu, nitaj may kasqanta yuyakunchu, nillataj runaykachanchu.

⁵ Munakuyniyojqa mana ruwanataqa mana ruwanchu, nitaj payllapajchu imatapis mask'an. Chantá mana usqhayllata phiñakunchu, nitaj yuyarikullanpunichu pipis paypa contranta imata ruwasqanmanta.

⁶ Jinallataj munakuyniyoj runaqa millayta ruwajkunamanta mana kusikunchu. Aswanpis cheqanta ruwasqankumanta kusikun.

⁷ Pichus munakuyniyojpataqa tukuy imata awantananpaj kallpan tiyan. Jinataj Diospi atinikuynin, suyakuyniyoj kasqanpis mana tukunkuchu. Chantá imapis kajtin, sinch'ita sayallanpuni.

⁸ Munakuyniyoj runaqa tukuy tiempo munakullanpuni. Uj p'unchay Diospa simi nisqanta sut'inchana tukukaponqa. Waj parlaypi parlanapaj atiypis manaña kanqachu. Diospa pakasqa yachayninta yachanapis manaña necesariochu kanqa.

⁹ Chayqa ajina, imaraykuchus kunan Diosmanta sut'inchasqanchej, chantá imatachus yachasqanchejqa chaykamalla.

¹⁰ Maypachachus allin junt'asqa yachay jamonqa chaypacharí, tukuy chaykuna tukukaponqanku.

¹¹ Noqaqa wawallaraj kashaspa, wawa jina parlaj kani, wawa jina yuyaj kani, wawa jinataj imatapis unanchaj kani. Runayaspañarí, wawa jina ruwanata saqeporqani.

¹² Kunanqa ayphu espejopi jina ayphullata rikunchej. Qhepamantajrí Dioswan uyapurakuspa imatapis maychus kajta yachasunchej. Kunanqa wakillantaraj yachani. Qhepamantajrí allinta yachasaj, imaynatachus Dios noqamanta tukuy imata yachan, ajinata.

¹³ Kunanqa kay kinsa imakunata ruwana tiyan: Diospi atinikuna, Dios nisqanta junt'anantapuni suyana, chantá wajkunata munakuna ima. Chay kinsamanta astawan kurajqa munakuymin.