1 Corintios 1 - DIOSPA QHELQACHISQ

Pablo paykunata napaykun

¹ Noqa, Pablo, Dios munasqanrayku Jesucristoj kuraj kachan kanaypaj wajyasqa kani. Noqawan, wawqenchej Sosteneswan ima kay cartata qhelqaspa apachimuyku Corinto llajtapi Diospa iglesianman.

² Qankunaqa Cristo Jesusman ujchasqa kaspa, Diospaj t'aqasqa kankichej, wajyasqataj juchamanta t'aqasqa kanaykichejpaj. Dios Jesucristonejta paypaj t'aqawarqanchej, pikunachus Tukuyta Kamachej Jesucristoj sutinta oqharinku, chaykunatawan khuska. Payqa paykunaj Kuraj Kamachejninku, noqanchejpatapis.

³ Tata Diosninchejmanta, jinataj Tukuyta Kamachej Jesucristomantawan qhasilla k'acha yanapayninku, sonqo tiyaykuyninku ima qankunawan kachun.

Pablo paykunarayku Diosta pachis nin

⁴ Qankunarayku Diosta pachis ninipuni, Jesucristojta kasqaykichejrayku Diosqa qhasilla k'acha yanapayninta qosusqaykichejmanta.

⁵ Jesucristonejta Diosqa qankunata tukuy imapi qhapajyachisunkichej, sumajta parlayta yachanaykichejpaj, yachayniyoj kanaykichejpaj ima.

⁶ Chayqa sut'ita yachayta qon, Cristomanta imatachus willasqayqa cheqapuni kasqanmanta.

⁷ Ajinamanta Dios ruwanapaj atiykunata qosusqaykichejmanta mana imapis pisisunkichejchu, Tukuyta Kamachej Jesucristonchej rikhurimunanta suyashanaykichejkama.

⁸ Diosmin kay tiempo tukukuykama sinch'ita sayachisonqachej, Tukuyta Kamachej Jesucristonchej kutimojtin qankuna mana k'amina kanaykichejpaj.

⁹ Dios imatachus nisqanta junt'anpuni, paytaj Churin Jesucristo Kamachejninchejwan ujchasqa kawsanaykichejpaj wajyasorqachej.

Iglesiapi t'aqanaku

¹⁰ Wawqe panakuna, Tukuyta Kamachej Jesucristonchejpa sutinpi mañakuykichej, tukuyniykichej ujllata parlanaykichejta. Ama qankuna ukhupi t'aqanaku kachunchu. Aswanpis qankunapura k'achata kawsakuychej, uj sonqolla kaspa, ujllata yuyaspa ima.

¹¹ Munasqa wawqe panakuna, chayta nini, imaraykuchus Cloejpa ayllunmanta kajkuna willawarqanku qankuna ukhupi jap'inakuy kasqanta.

¹² Qankunamanta wakin kay jinata nisqankichej: Noqa Pablota qhatini, nispa. Wakintaj: Noqarí Apolosta, nispa. Wakintaj nisqankichej: Noqaqa Cefasta, nispa. Wakintajrí: Noqaqa Cristota qhatikuni, nispa nisqankichej.

¹³ Cristoqa chhikan chhikanpi t'aqasqachuri? Pablochu qankunata qhespichinanpaj cruzpi chakatasqa wañorqa, chayrí Pabloj sutinpichu bautizasqa karqankichej? Mana, icharí?

¹⁴ Diosta pachis nini, imaraykuchus qankunamanta noqa Crispota, Gayollatawan bautizarqani, wajkunatarí mana.

¹⁵ Chayrayku mana pipis niyta atinchu sutiypi bautizasqa kasqanta.

¹⁶ Arí, Estefanaspa ayllunmanta kajkunatapis bautizallarqanitaj, chaymanta jawa wajkunata bautizasqayta mana yuyarikunichu.

¹⁷ Cristoqa mana bautizajtachu kachamuwarqa, manachayqa paymanta sumaj willayta willanaypaj, mana jatun yachayniyoj jina sumajta parlaspachu, Cristo cruzpi wañusqan ama qhasi manakajman tukunanpaj.

Cristonejta Diosqa yachayniyoj kasqanta rejsichin

¹⁸ Wakinkuna yuyanku Cristo cruzpi wañusqanmanta willanaqa mana yuyayniyoj runaj thawtisqan kasqanta. Chaykunarí mana qhespichisqachu kanqanku. Chaywanpis noqanchej qhespichisqa kajkunapaj chay willayqa Diospa atiynin.

¹⁹ Diospa Qhelqachisqanpi nin: Noqaqa yachayniyojkunaj yachayninkuta chinkachisaj, qhesachasajtaj yuyayniyojkunaj yuyayninkuta, nispa.

²⁰ Ajinaqa, maytaj chay yachayniyojri? Maytaj chay yachachejri? Maypitaj kay pachapi kaj imakunamanta churanakoj kashanri? Diosqa payta mana qhatejkunaj yachayninkuta p'enqaypi rikhuricherqa.

²¹ Dios mana saqerqachu runakuna tukuy yachayninkuwan payta rejsinankuta. Manachayqa Jesusmanta sumaj willayta willasqaykuta jap'ikojkunata qhespichinanta nerqa, chay willasqayku wampoj yuyasqanman rijch'akushajtinpis.

²² Judiokuna runaj mana jayk'aj rikusqanta rikuyta munanku, Grecia llajtayojkunataj yachayniyoj kayta mask'anku.

²³ Noqaykurí Cristo cruzpi chakatasqa kasqanmanta willayku. Judiokunata chay willayqa phiñarichin, mana judío kajkunapajtaj wampu runaj thawtisqan jina.

²⁴ Diospa wajyasqankunapajrí, judiokunapis, mana judío kajkunapis kachunku, Diosqa Cristonejta yachayta qon atiyniyoj kasqanta, chantá jatun yachayniyoj kasqanta ima.

²⁵ Ajinaqa, Diospa yachaynin wampu yuyasqanman rijch'akun chaypis, chayqa runaj yachayninmantaqa aswan yachayniyoj. Jinallataj Diospa pisi kallpan rijch'akojpis runaj kallpanmanta nisqaqa aswan kallpayoj.

²⁶ Chayrayku, wawqe panakuna, maypachachus Dios wajyasorqachej chaypacha imaynachus kasqaykichejmanta yuyarikuychej. Runaj qhawasqanman jina qankunamanta pisilla yachayniyoj karqankichej. Manallataj ashkhachu atiyniyoj karqankichej, nitaj jatunpaj qhawasqa ayllumantachu.

²⁷ Diostajrí kay pachapi wampupaj qhawasqa kajkunata ajllakorqa yachayniyojkunata p'enqachinanpaj. Ajllakullarqataj kay pachapi pisi kallpayojkunata p'enqachinanpaj.

²⁸ Jinallataj Dios kay pachamanta mana walej kajta, qhesachasqata, qhasi manakajpaj qhawasqata ima ajllakorqa. Ajinata ruwarqa, runa imatachus aswan kasqanta qhawan, chayta manakajman tukuchinanpaj.

²⁹ Ajinata Dios ruwasqanrayku mana pipis paypa ñawpaqenpi jatunchakuyta atenqachu.

³⁰ Chaywanpis kikin Diosmin qankunata Cristo Jesuswan ujchaykorqasunkichej. Cristowan ujchasqa kasqaykichejraykutaj qankuna yachayniyoj kankichej. Jinallataj Cristo Diospa ñawpaqenpi cheqan runapaj qhawasqa kananchejpaj ruwawarqanchej, jinallataj juchamanta t'aqasqa llimphu, chantá juchamanta kacharichisqa kananchejpaj ima.

³¹ Chayrayku Diospa Qhelqachisqanpi nin: Pillapis jatunchakuyta munajqa Tukuyta Kamachej Jesucristomanta jatunchakun, nispa.