Salmos 80 - DIOSPA QHELQACHISQAN DEUTEROCANONICAL

(1)

SALMO 80 Tata Dios khuyarikuspa qhawariwayku

(1) (Asafpa ruwasqan takiy)

¹ 1 (2) Israelta michej Dios, uywariwayku. Qanqa José aylluta ovejata jina pusaykachanki, kamachinayki tiyanataj querubinkunaj chawpinkupi kashan.

² 2 (3) Kunan Efrainpa, Benjaminpa, Manasespa ñawpaqenpi ima atiyniykita rikuchiy ari, qhespichejtaj jamuy.

³ 3 (4) Diosniyku, ñawpajta imaynachus kasqaykuman kutichiwayku. Allin ñawiwan qhawariwayku, noqaykutaj qhespichisqa kasqayku.

⁴ 4 (5) Tukuy Atiyniyoj Tata Dios, mayk'ajkamataj phiñasqa kanki, aylluykej mañakusqanta mana uyarinaykipajri?

⁵ 5 (6) Qanqa waqayniykuta mikhuchiwayku, ashkha waqayniykutataj ujyachiwayku.

⁶ 6 (7) Muyuyniykupi kajkunaj ñawpaqenkupi p'enqaypi rikhurichiwayku, awqaykukunataj noqaykumanta alqorakunku.

⁷ 7 (8) Tukuy Atiyniyoj Diosniyku, ñawpajta imaynachus kasqaykuman kutichiwayku. Allin ñawiwan qhawariwayku, noqaykutaj qhespichisqa kasqayku.

⁸ 8 (9) Qanqa uva sach'ata jina Egiptomanta orqhomuwarqayku. Chantá qanta mana yupaychasojkunata wijch'uspa, chayman uvata mallkiykorqanki.

⁹ 9 (10) Uvata mallkinaykipaj jallp'ata picharqanki, chay uva sach'ataj saphichakuspa, tukuy suyuntinman junt'aykorqa.

¹⁰ 10 (11) Orqokunata llanthunwan qhataykorqa, yurantaj cedro sach'akunata p'ampaykorqa.

¹¹ 11 (12) Uva sach'aj yuranqa mama qochakama chayarqa, ijisqantaj Éufrates mayukama.

¹² 12 (13) Kunantajrí imaraykutaj uva huertaj perqanta thuñerqanki, ñan purejkuna poqoyninta p'itinankupajri?

¹³ 13 (14) Monte khuchikunaqa uva huertata chaqoykunku, k'ita animalkunataj q'arallata ruwanku.

¹⁴ 14 (15) Tukuy Atiyniyoj Dios, kutirimuy ari, janaj pachamantapacha qhawarimuspa, kay uva sach'aykimanta khuyarikuy.

¹⁵ 15 (16) Qan kikiyki mallkisqaykita, ijimojkunata sumajta wiñachisqaykita ima qhawariy.

¹⁶ 16 (17) Awqaykukunaqa uva sach'aykita k'utorqanku, ruphaykucherqankutaj. Kunanrí qan k'arajta phiñakuspa, chay jina ruwajkunata chinkachiy ari.

¹⁷ 17 (18) Ajllakusqayki runata yanapariy, sinch'ita sayachisqaykej runaj churinta.

¹⁸ 18 (19) Chantá manaña jayk'ajpis qanmanta karunchakusqaykuchu. Kawsayta qowayku, noqaykutaj qanllatapuni yupaychasqayku.

¹⁹ 19 (20) Tukuy Atiyniyoj Tata Dios, ñawpajta imaynachus kasqaykuman kutichiwayku. Allin ñawiwan qhawariwayku, noqaykutaj qhespichisqa kasqayku.