Salmos 145 - DIOSPA QHELQACHISQAN DEUTEROCANONICAL

1a

SALMO 145 Tukuy runakuna Tata Diosta yupaychachunku

1a (1a) (Davidpa ruwasqan takiy)

¹ (1b) Diosníy, Kuraj Kamachejníy, jatunchasqayki, wiñay wiñaypajtaj sutiykita yupaychasaj.

² Sapa p'unchay yupaychasqayki, wiñay wiñaypajtaj sutiykita jatunchasaj.

³ Tata Diosqa jatunmin, mayta yupaychanapaj jina, jatun kaynintaj mana yachay atina.

⁴ Tata Dios, tukuy p'unchaypi runakuna ruwasqaykirayku jatunchasonqanku, t'ukuna ruwasqaykimantataj parlanqanku.

⁵ Manchay t'ukuna atiyniykimanta tukuy parlanqanku. Noqapis t'ukunata ruwasqaykimanta parlallasajtaj.

⁶ Jatun atiyniykiwan t'ukunata ruwasqaykimanta parlanqanku, noqapis jatun kayniykimanta parlallasajtaj.

⁷ K'acha munakuyniyoj kasqaykimanta yuyarikuspa parlanqanku. Cheqan kasqaykitapis jatunmanta parlaspa willallanqankutaj.

⁸ Tata Diosqa wawa sonqoyoj, khuyakuyniyojtaj. Mana phiñakullanchu, nitaj munakuyninpis tukukunchu.

⁹ Tata Diosqa tukuypajmin k'acha, tukuy ruwasqanmantataj khuyakuywan qhawan.

¹⁰ Tata Dios, tukuy ruwasqaykeqa jatunchasuchun. Qanta qhatisojkunapis yupaychallasuchunkutaj.

¹¹ Kamachiyniyki sumaj kasqanmanta parlachunku, atiyniykiwan ruwasqaykimantataj willachunku.

¹² Jinamanta tukuy runakuna t'ukunata ruwasqaykimanta yachachunku, kamachiyniykej jatun kayninmantawan.

¹³ Kuraj kamachej kasqaykeqa wiñay wiñaypajmin, kamachiyniykitaj miraymanta miraykama.

¹⁴ Tata Diosqa tukuy urmajkunata aysarin, jinallatataj llakiywan ñit'isqa kajkunatapis.

¹⁵ Tukuy qan qhawarisqalla suyanku, qantaj pisichikusqankuman jina mikhunata qonki.

¹⁶ K'acha kasqaykiwan makiykita jaywarispa, tukuy kawsayniyojta ashkha mikhunawan sajsachinki.

¹⁷ Tata Dios tukuy imata cheqanta ruwan, chay ruwasqantaj k'acha sonqowan ruwasqa.

¹⁸ Tata Dios payta wajyakojkunaj qayllanpi kashan, pikunachus tukuy sonqowan payta wajyakojkunaj qayllankupi.

¹⁹ Payqa payta yupaychajkunaj munasqankuta junt'an. Yanapananta mañakojtinkupis, uyarispa yanapan.

²⁰ Tata Dios payta munakojkunata waqaychan, millayta ruwajkunatarí wañurachenqa.

²¹ Simiywan Tata Diosta jatunchasaj. Tukuy runapis may llimphu sutinta yupaychallachunkutaj, kunanmantapacha wiñaypaj wiñaykama.