Rut 3 - DIOSPA QHELQACHISQAN DEUTEROCANONICAL

Boozpa k'acha kaynin

¹ Chaymanta qhepaman Noemiqa Rutta nerqa: Wawáy, watej casarakunaykita munayman, aylluyoj kanaykipaj, chantá kusiy kawsayta rikunaykipaj.

² Pejpa sipas kamachinkunawanchus chajmaspa karqanki, chay Boozqa qaylla ayllunchej. Kunan ch'isitaj eraman rispa, cebadata wayrachenqa.

³ Qantajrí kay nisqayta ruway: Mayllarqokuytawan, k'acha q'apashaj jawinawan jawiykukuy. Sumaj p'achaykita churaykukuspataj, eraman riy, maypichus Booz kashan, chayman. Chaywanpis amapuni rikuchikunkichu mikhuyta, ujyayta tukunankama.

⁴ Sumajta qhawanki maypichus puñusqanta. Chantaqa puñojtinkama, chakin chayta qhataraspa, jayt'ananman siriykunki. Chantá pay nisonqa imatachus ruwanaykita, nispa.

⁵ Chantá Rut kuticherqa: Tukuy niwasqaykita ruwasaj, nispa.

⁶ Jinataj Rutqa eraman rispa, Noemíj tukuy nisqanta ruwarqa.

⁷ Boozqa mikhuspa ujyaspataj, mayta kusikorqa. Chaymantataj puñunanpaj era kantupi siriykakaporqa. Chay qhepantataj Rut ch'insitullamanta rispa, chakin chayta qhataraspa, jayt'ananman suskhuykorqa.

⁸ Chawpi tuta jinataj Boozqa puñusqanmanta ujllata rijch'arerqa. Jinapi uj ladoman tijrakuspa, reparasqa jayt'ananpi uj warmi sirishasqanta, jinataj mancharikorqa.

⁹ Chantá Booz taporqa: Pitaj kanki? nispa. Ruttaj kuticherqa: Kamachiyki Rut kani. Qanqa aswan qaylla aylluy kaspa, noqamanta qhawayta atinki. Chayrayku noqawan casarakunaykita munani, nispa.

¹⁰ Chantá Boozqa nerqa: Tata Dios qanta yanapasuchun. Kunan rikuni wañoj qosaykita mana wasanchasqaykita. Qan casarakuyta munaspaqa, mask'akuwaj karqa noqamanta aswan wayna kajta, wajchatapis chayrí qhapajtapis. Jinapis mana chayta ruwarqankichu.

¹¹ Wawáy, ama phutikuychu. Niwasqaykita ruwasaj, imaraykuchus kay llajtapi tukuy yachanku sumaj warmi kasqaykita.

¹² Arí, qaylla aylluyki kani. Chaywanpis noqamanta aswan qaylla aylluyki tiyanraj.

¹³ Kunan ch'isi kaypi qhepakuy. Q'ayataj noqa chay runawan chaymanta parlarimusaj. Sichus pay munanqa qaylla ayllu jina preciota pagaspa kacharichisuyta chayqa, allinmin kanqa. Manachus chayta ruwayta munanman chayrí, Tata Diospa uyarinanta kayta niyki: Noqapuni kacharichisqayki, nispa. Kunanrí sut'iyamunankama kaypi puñukullay ari, nispa.

¹⁴ Ajinata Rut chay tuta Boozpa jayt'ananpi puñukorqa. Q'ayantintaj allin chhapu chhaputa manaraj sut'iyashajtin, Rut jatarerqa, imaraykuchus Booz nisqa: Mana ni pi yachananchu tiyan uj warmi era pataman jamusqanta, nispa.

¹⁵ Chantá Rut manaraj ripushajtin, Booz nerqa: Llijllaykita apamuy sumajta jap'iy, nispa. Jinapi Boozqa tawa chunka kilo kurajta cebadata llijllanman jich'aspa, Rutman q'epiriykucherqa. Ruttaj Belenman kutiporqa.

¹⁶ Rut wasinman chayajtinkama, suegran taporqa: Imaynataj risorqa, wawáy? nispa. Ruttaj willarqa imatachus Booz paypaj ruwasqanta.

¹⁷ Chantá nillarqataj: Kay cebadatawan qowarqa: Ama ni imayoj suegraykiman kutipunkichu, nispa.

¹⁸ Chantá Noemí kuticherqa: Kunanqa, wawáy, suyariy imachus kananta. Chay runaqa mana samarikonqachu chay tukuy imata allinta sut'inchanankama, nispa.