Rut 2 - DIOSPA QHELQACHISQAN DEUTEROCANONICAL

Rutqa Boozpa chajranpi

¹ Noemíj qosan Elimelecpa ayllunmanta uj qhapaj runa karqa manchay respetasqataj. Paypa sutin karqa Booz, paytaj Belenpi tiyakorqa.

² Ujpacha Moabmanta Rutqa Noemita nerqa: Chajra pataman riyta munani. Ichá mayqellanpis cebadata chajmakojta saqewanman, nispa. Suegrantaj kuticherqa: Rillay, wawáy, nispa.

³ Jinataj Rutqa chajra pataman rispa, ruthojkunaj t'akasqanku cebadata chajmakuyta qallarerqa. Chay chajratajrí Elimelecpa ayllun Boozpata kasqa.

⁴ Rut chaypi chajmashajtintaj, Boozqa Belén llajtamanta chajraman chayaykamuspa, ruthojninkunata napaykorqa: Tata Dios qankunawan kachun, nispa. Paykunataj kuticherqanku: Tata Diosqa qantapis yanapasuchun, nispa.

⁵ Chantá Boozqa chay ruthojkunaj kamachejninkuta tapurerqa: Pejpa ususintaj jaqay sipasri? nispa.

⁶ Chay kamachejtaj kuticherqa: Payqa, pichus Moab suyumanta Noemiwan jamusqa, chay sipasmin.

⁷ Chantá pay niwarqa ruthojkunaj t'akasqanku cebadata chajmakunanta. Jinataj mana sayk'uspa paqarinmantapachaña chajmakun. Kunallanraj samarikoj jamun, nispa.

⁸ Chaypacha Boozqa Rutta nerqa: Uyariway, wawáy. Cebadata chajmakojqa ama wajkunaj chajrankuman rinkichu. Kaypi qhepakuy kay sipas kamachiykunawan khuska.

⁹ Chantá qhatillanki, maypichá ruthojkuna ruthushanku, chayman. Ña kamachiniña ruthojniykunata ni imatapis ninasunkuta. Ch'akisojtenqa, jaqay p'uñukunamanta yakutapis ujyarikullanki, nispa.

¹⁰ Ruttaj pampakama k'umuykuspa, Boozta taporqa: Noqa mana Israel llajtayoj kashajtiypis, imaraykutaj mayta khuyakuwankiri, may k'achataj kankiri? nispa.

¹¹ Chantá Booz kuticherqa: Qosaykej wañupusqanmantapacha suegraykiwan imatachus ruwasqaykita uyarerqani. Uyarillarqanitaj aylluykita saqeraspa, mana rejsisqayki llajtaman tiyakoj jampusqaykimantapis.

¹² Israelpa Tata Diosnin, pipichus atinikushanki, paymin suegraykita yanapasqaykimanta kutichipusuchun, allin kajtataj qopusuchun tukuy ruwasqaykimanta, nispa.

¹³ Ruttaj kuticherqa: Wiraqochíy, ancha k'achata parlapayawanki, sonqochawankitaj, noqaqa mana ujnin warmi kamachiyki jinallapischu kashajtiy, nispa.

¹⁴ Aswan qhepaman mikhuna samay kajtin, Boozqa Rutta wajyaspa, nerqa: Jamuy, wawáy, t'antata kay vinagrewan chhapuspa mikhurikunki, nispa. Jinapi Rutqa tiyaykukorqa ruthojkunawan khuska, Booztaj payman jank'ata jaywarqa. Rutqa sajsakunankama mikhorqa, puchurerqaraj chaypis.

¹⁵ Chantá Rut watejmanta cebadata chajmakoj kutirejtin, Boozqa ruthojninkunata kamacherqa: Saqellaychej cebadata chajmakojta. Marq'akuna qayllamanta chajmakojtintaj, ama payta jark'akunkichejchu.

¹⁶ Cebada marq'amanta t'akakojta saqellaychej pay chajmakunanpaj, amataj pipis rimachunchu, nispa.

¹⁷ Chantá Rutqa Boozpa chajranpi ch'isiyanankama chajmakorqa. Chay cebada pallakusqanta iskay chunka kilota jina oqharerqa.

¹⁸ Chayta q'epiriykukuspataj, llajtaman kutiporqa. Maypichus tiyakusharqanku chayman chayaspataj, cebada chajmasqanta suegranman rikucherqa. Q'epinmanta mikhuna puchusqantapis orqhospa, Noemiman jaywarqa.

¹⁹ Chantá Noemí taporqa: Maypitaj kunan chajmamorqankiri? Maypitaj chay chhikata pallarqankiri? Tata Dios saminchachun pichus chay jinatapuni yanapasorqa, chayta, nispa. Ruttaj suegranman willarqa pejpa chajranpichus chajmasqanta: Maypichus chajmarqani, chay chajrayojpa sutenqa Booz, nispa.

²⁰ Noemitaj kuticherqa: Tata Diosqa Boozta khuyachun, imaraykuchus payqa may khuyakuyniyoj noqanchejpaj, jinallataj karqa wañojkunawanpis. Chay runaqa qaylla ayllunchej. Paymin noqanchejta qhespichiyta atinman, nispa.

²¹ Chantá Moabita Rutqa Noemiman willallarqataj: Chay runaqa sipas kamachinkunawan chajmakunallaytapuni niwarqa, ruthuy tukukunankama, nispa.

²² Chaypacha Noemiqa ñojch'an Rutman kuticherqa: Wawáy, walej kanman sipas kamachinkunawan qhepakunaykeqa mana wajpa chajrankunaman rispa, ama piwanpis imatapis nichikushanaykipaj, nispa.

²³ Jinataj Rutqa Boozpa sipas kamachinkunawan khuska trigo ruthuy, chantá cebada ruthuy tukukunankama chajmakullarqapuni. Chaykamarí suegranwan khuskallapuni tiyakusharqa.