Rut 1 - DIOSPA QHELQACHISQAN DEUTEROCANONICAL

Elimelecpa ayllun Moab suyupi

¹ Juezkuna kamachisharqanku chaypacha, Israel suyupi manchay yarqhay karqa. Chantá Judá jap'iypi Belén llajtamanta uj runa, warminwan churinkunawan ima Moabman rerqanku.

² Chay runaj sutenqa Elimelec karqa, warmintaj Noemí, chantá iskaynin churinkuna Majlón, Quelión ima, paykuna Judá Belenpi karqanku. Chantá Moabman chayaspataj chaypi tiyakorqanku.

³ Chantá Noemíj qosan Elimelec Moabpi wañuporqa, Noemitaj iskaynin churinkunallawanña qhepakorqa.

⁴ Chaymanta mana unayninmanchu chay churinkuna Majlonwan, Quelionwan imaqa Moab suyumanta warmikunawan casarakorqanku. Ujninpa sutenqa Orfa karqa, ujninpatataj Rut. Chunka wata jinaña chaypi tiyakushajtinkutaj,

⁵ Majlón, chantá Quelionpis wañupullarqankutaj, Noemitaj mana qosayoj, nitaj churinkunayoj rikhurerqa.

Noemiwan Rutwan Belenman kutipunku

⁶ Moab suyupi tiyakushaspa, Noemí uyarerqa Tata Diosqa ayllunmanta khuyakuspa, chay yarqhay watakunata tukuchisqantaña.

⁷ Chayrayku Noemiwan, ñojch'ankunawan wakichikorqanku, maypichus tiyakusharqanku, chaymanta Judaman kutipunankupaj. Wakichikuytawantaj, Judaman kutipoj purirerqanku.

⁸ Ñanpi kashajtinkurí, Noemí ñojch'ankunata nerqa: Kutipuychej ari mamaykichejpa wasinman. Chantá Tata Dios qankunamanta khuyakuchunpuni, imaynatachus qankunapis noqamanta, churiykunamantapis khuyakorqankichej, ajinata.

⁹ Jinataj Tata Diosqa munachun ujtawan casarakuspa k'acha kawsayta tarinaykichejta, nispa. Chantá Noemí paykunata much'aykorqa. Paykunatajrí mayta waqarikuspa,

¹⁰ nerqanku: Mana kutipuykumanchu. Noqaykoqa qanwan llajtaykiman ripusqaykupuni, nispa.

¹¹ Jinapis Noemí kuticherqa: Kutipuychej, wawaykuna. Imamanñataj noqawan riwajchejri? Manaña noqajtaqa wawaykuna kanmanñachu qankunawan casarakunankupajqa.

¹² Kutipuychej wasiykichejman ari, imaraykuchus payaña kani ujtawan casarakunaypajqa. Chantá kunan ch'isipacha casarakuspa ashkha wawayoj kayman chaypis,

¹³ qankunaqa wiñanankukama suyawajchejchu, mana piwan casarakuspa? Manapuni, wawaykuna. Tata Diosqa jatun llakiyman churawan. Chaywanpis may jinatarajchus phutikuyman qankunata llakikojta rikuspaqa, nispa.

¹⁴ Chayta uyarispa, Orfawan Rutwan watej khuyayta waqarikullarqankutaj. Chantá Orfaqa suegranta much'aykuytawan, llajtanman kutiporqa. Ruttajrí paywan qhepakaporqa.

¹⁵ Chantá Noemí Rutta nerqa: Ñojch'a masiykeqa llajtanman, diosninkunamantaj kutipun. Qanpis ripullaytaj, wawáy, nispa.

¹⁶ Ruttajrí kuticherqa: Ama niwaychu saqesunayta, nitaj qanmanta t'aqakunayta. Noqa risaj maymanchá rinki, chayman. Kawsamusajtaj maypichá kawsanki, chaypi. Llajtaykeqa llajtay kanqa, Diosniykipis Diosnillaytaj kanqa.

¹⁷ Wañusaj maypichá wañunki chaypi, chayllapitaj p'ampanawankuta munani. Wañuyllamin t'aqawasun. Manachus jina kanman chayrí, Tata Dios sinch'ita jasut'iwachun, nispa.

¹⁸ Noemiqa Rutta paywanpuni ripuyta munasqanta reparaspa, manaña imatapis nerqachu.

¹⁹ Ajinaqa iskayninku Belén llajtaman chayanankukama rillarqankupuni. Belenman chayajtinku, tukuynin llajtapi runakuna mayta qhollpikorqanku paykunata rikuspa. Warmikunataj tapunarikorqanku: Manachu kayqa Noemí? nispa.

²⁰ Noemitajrí kuticherqa: Amaña Noemí niwaychejchu, manachayqa Mara niwaychej, imajtinchus Tukuy Atiyniyoj Diosqa imaymana llakiykunata apachimuwan.

²¹ Kaymantaqa tukuy imayoj llojserqani, Tata Diostajrí ni imayoj kutimpunayta munarqa. Imaraykutaj Noemí niwankichejri, Tukuy Atiyniyoj Tata Diosqa contraypi sayarispa, llakichishawajtinri? nispa.

²² Ajinamin karqa imaynatachus Noemí, jinataj Moab suyumanta Rut ñojch'anwan Israel suyuman kutipusqankoqa. Jinaqa Belenman chayarqanku cebada ruthuy qallariyta.