Proverbios 26 - DIOSPA QHELQACHISQAN DEUTEROCANONICAL

¹ Ruphay mit'api rit'eqa mana allinchu. Manallataj chajra oqharina kashajtin, parananpis allinchu. Ajinallataj wampu jatunchasqa kajtin, mana allinchu.

² Phichitanka kayman jaqayman phawaykachan, para p'isqopis muyuykachan. Ajinallataj pipis mana imallamanta runa masinta maldicejtin, mana chay runaman chayanqachu.

³ Caballotaqa chicotewan mansuyachina, burrotataj jaquimawan. Ajinallatataj wampu runata varawan jasut'ina.

⁴ Wampu runamanqa ama wampu kasqanman jina kutichiychu, qanpis ama pay jina wampu kanaykipaj.

⁵ Wampumanqa mana yuyayniyoj kasqanman jina kutichiy, ama yachayniyoj kasqanta yuyakunanpaj.

⁶ Ama wampu runata kachanachu imatapis willachinanpaj. Paywan willachinaqa ninakun chakita mut'ukuywan, chayrí uma nanayta mask'akuywan.

⁷ Suchu runaj chakenqa ni imapaj walejchu. Ajinallataj yachaywan nisqa wampoj siminpi mana imapaj walejchu.

⁸ Wampu runata jatunchayqa qhasi manakajlla, imaynachus warak'aman rumita watana qhasi manakaj, ajinallataj.

⁹ Wampupaj sumaj yachaywan parlanaqa machasqa runaj makinpi khishka jina.

¹⁰ Pichus wampu runata wasinpi llank'ananpaj mink'akojqa rijch'akun, pichus arcowan flechata mayllamanpis kacharparillan, chayman.

¹¹ Alqoqa lansasqanta watej mikhuykakapun. Ajinallatataj wampu runaqa mana allin yuyaychakuspa imatachus ruwasqanta ujtawan ruwan.

¹² Yachayniyoj kasqanta yuyakoj runata rejsinkichu? Paymanta nisqaqa wampu runamantaraj ima allintapis suyasunman.

¹³ Qhellaqa mana llank'ananrayku achakita mask'an: León jawapi kashan. Ñanpi jap'iwaspa, mitharpariwanman, nispa.

¹⁴ Punkoqa quejonninpi muyun. Ajinallatataj qhella runapis puñunanpi sunt'iykachan.

¹⁵ Qhella runaqa mikhunata makinpi jap'ishaspapis, chayta mana siminman churallanpischu.

¹⁶ Qhella runaqa may yachayniyoj kasqanta yuyakun. Pay jina ni pipis kasqanta yuyan.

¹⁷ Pichus wajkunaj ch'ajwasqankuman sat'ikojqa rijch'akun, pichus phiña alqota ninrinmanta jap'ejman.

¹⁸ Imaynatachus uman t'ojpisqa runa arcowan lawrashaj flechakunata mayllamanpis kacharillan,

¹⁹ ajinallataj pichus kawsaqenta q'otiyaspa, nin: Pujllaspalla ruwarqani, nispa.

²⁰ Mana llant'awan ninaqa wañupun. Ajinallataj simi apaj mana kajtin, ch'ajwapis ch'inyapun.

²¹ Ninata k'ajachinapajqa carbón kanan tiyan, ninata jap'ichinapajtaj llant'a kanan tiyan. Phiñanakuyta jatarichinapajrí ch'ajwa jatarichej runa kanan tiyan.

²² Cuento q'epej parlasqanqa misk'i mikhuna jina. Pichus uyarejpa sonqon ukhumanpuni yaykun.

²³ Qolqe metalwan lluch'isqa t'uru mankaman rijch'akun, pichus millayta yuyaspa misk'ita parlaj runaman.

²⁴ Pichus chejnikojqa parlasqanwan chejnikusqanta pakan, sonqonpitajrí millayta ruwanata wakichin.

²⁵ Sichus misk'i simiwan parlasunki chayqa, ama payta creeychu, imaraykuchus sonqonqa millay yuyaykunawan junt'a kashan.

²⁶ Chejnikuyninta pakashajtinpis, millayta ruwasqanqa tukuypa rikunanta sut'inchakonqapuni.

²⁷ Pichus t'oqota allajqa payllataj chayman urmaykonqa. Jatun rumita tanqajpis payllataj urmaykuspa, chaywan p'altachikonqa.

²⁸ Llulla runaqa cheqa kajta chejnin, llunk'upayaj simitaj mana allin kawsayman apan.