Proverbios 22 - DIOSPA QHELQACHISQAN DEUTEROCANONICAL

¹ Allinpaj qhawasqa kay, munasqa kay ima aswan allinraj kanku, ashkha qoriyoj, qolqeyoj kanamanta nisqaqa.

² Qhapaj runapis, wajcha runapis uj rejlla kanku, iskayninkuta Tata Dios ruwasqanrayku.

³ Yuyayniyoj runaqa llakiykuna jamushasqanta reparaspa, pakakun. Mana yuyayniyojrí mana kasuta ruwaspa, ñawpajman rillanpuni, llakiyta tarikuspataj ñak'arin.

⁴ Pichus llamp'u sonqowan Tata Diosta kasun, chay runataqa Dios t'inkachenqa qhapaj kaywan, jatunchasqa kaywan, chantá unayta kawsanawan ima.

⁵ Millayta ruwajkunaj purisqankoqa wajkuna urmanankupaj tojlla jina kashan. Sichus allinta qhawarikuspa purinki chayrí, chaykunamanta karunchakunki.

⁶ Wawaykitaqa juch'uymantapacha allinta yachachiy imaynatachus allinta purinanta, machuyaspataj, yachachisqaykita mana qonqanqachu.

⁷ Qhapajkunaqa wajchakunata kamachinku, manukojkunataj pichus manurejpa wata runan kanku.

⁸ Pichus mana allin kajta tarpojqa jatun llakiyllata tarikonqa. Tata Diostaj k'araj ñak'arichiyninwan chay runata chinkachenqa.

⁹ Tata Dios saminchanqa, pichus runa masinta khuyaj sonqowan qhawajta, wajchakunaman mikhunanmanta qorisqanrayku.

¹⁰ Ch'ajwata mask'aj runata wijch'uy, chantá ch'ajwaypis chinkaponqa. Phiñanakuypis, quejanakuypis manaña kanqachu.

¹¹ Kuraj kamachejqa ch'uwa sonqo runata munakun, k'acha parlayniyoj runapis paywan sumajta apanakonqa.

¹² Tata Diosqa yachayniyoj runata sumajta waqaychan, llullakuspa parlajtarí p'enqaypi rikhurichin.

¹³ Qhellaqa mana llank'ananrayku achakita mask'an: León jawapi kashan. Ñanpi jap'iwaspa mitharpariwanman, nispa.

¹⁴ Khuchichakoj warmej simenqa ukhu pujyuman rijch'akun. Tata Diospa maldicisqan runakuna chayman urmaykunku.

¹⁵ Wampu kayqa wawaj sonqonpi kashan. Seq'onarí wawaj wampu kayninta chinkachin.

¹⁶ Pichus qhapajyananrayku wajcha runata ñak'arichin, chayrí qhapajman tiyapuyninmanta qon, chay runaqa wajchaman tukonqa.

Yachayniyojkunaj nisqanku

¹⁷ Yachayniyojkunaj parlasqankuta sumajta uyariy, imatachus yachachisusqaymantaj sonqoykita churay.

¹⁸ Sichus chaykunata sonqoykipi waqaychanki chayqa, misk'irichikunki. Sichus chaykunata sapa kuti kutikipanki chayqa, ima munay kanqa.

¹⁹ Tata Diospi atinikunaykipaj, kunan kay nisqakunata qanman yachachiyki.

²⁰ Kinsa chunka sumaj nisqakunata qanpaj qhelqaporqayki. Chay nisqakunapi yuyaychaykuna, yachaykuna ima tiyan.

²¹ Ajinamanta cheqa kajta rejsinki, kachamusojkunamantaj imachus kasqanta willanki.

-1 -

²² Ama wajcha runamanta wajcha kasqanrayku imantapis qhechuychu. Amallataj juezpa ñawpaqenpi payta ñak'arichinkichu.

²³ Tata Dios wajchakunaman sayakonqa, kapuyninta qhechojkunamantataj Tata Dios kapuyninkuta qhechuspa, mana imayojta saqerparenqa.

-2 -

²⁴ Ama usqhayllata phiñakoj runawan kawsakuychu, nillataj jaya sonqo runawan puriychu.

²⁵ Pajtataj paykuna jina puriyta yachaqakuspa, kawsayniykita wañuy pataman churawaj.

-3 -

²⁶ Ama pimantapis garante jina sayaychu, amataj niychu waj runaj manukusqanta junt'anaykita.

²⁷ Manachus paganaykipaj kanmanchu chayqa, puñunaykitapis qhechuchikuwaj.

-4 -

²⁸ Ama ñawpa tataykikunaj mojón churasqankuta suchuchinkichu.

-5 -

²⁹ Pichus ruwananta k'uchitapuni ruwajqa kuraj kamachejkunaj kamachin kanqa, manataj pisipaj qhawasqa runakunajtachu.