Proverbios 13 - DIOSPA QHELQACHISQAN DEUTEROCANONICAL

¹ Yachayniyoj chureqa tatanpa yuyaychasqanta jap'ikun, machu machu runarí k'amisqata mana uyarinchu.

² Runaqa allinta parlasqanmanta allin kajta jap'enqa. Wasanchajkunarí millayta ruwanamanta wañurinku.

³ Mana imatapis parlarparejllaqa llakiyta tarikunamanta waqaychakun. Anchata parlajrí uma nanayta tarikun.

⁴ Qhella runaqa mayta munaspapis mana imatapis tarinchu. Llank'aj runarí runayanqa.

⁵ Cheqan runaqa llullakuyta chejnin, millayta ruwaj runarí chejnisqa kanqa, p'enqaypitaj rikhurenqa.

⁶ Cheqanta ruwanaqa allinta purejta waqaychan, mana allin kajta ruwanarí runata chinkachin.

⁷ Wakinkunaqa mana imayoj kashaspapis, qhapajpis kankuman jina kawsanku. Wakinkunatajrí tukuy imayoj kashaspapis, wajchapis kankuman jina kawsanku.

⁸ Qhapaj runaqa payta ama wañuchinankupaj qolqeta pagan. Wajchatarí mana pipis mancharichillanpischu.

⁹ Cheqan runakunaqa lliphipishaj k'anchay jina kanku. Mana allinta ruwaj runakunarí wañushaj mechero jina.

¹⁰ Runaykachajqa ch'ajwallata jatarichin. Yachayniyoj kajrí yuyaychasqata jap'ikun.

¹¹ Mana allinta ruwaspa qhapajyayqa mana unaypajchu. Pichus llank'aspa pisimanta pisi qolqeta tantajqa kapuyninta ashkhayachenqa.

¹² Runaqa imatachus suyakusqan mana junt'akojtin, sonqon llakikun. Ima munasqanpis junt'akojtinrí, sonqon kawsarin.

¹³ Kamachisqata mana kasukoj runaqa waqanqa, kamachisqata kasukojrí t'inkata jap'enqa.

¹⁴ Yachayniyojpa yachachisqanqa mana ch'akej juturi jina. Pichus yachachisqanta jap'ikojtaqa wañuypa makinmantapis kacharichin.

¹⁵ Allin yuyayniyojqa tukuywan munachikun, wasanchajkunarí uma nanayllata tarinku.

¹⁶ Yuyayniyoj runaqa allinta qhawarikuspa imatapis ruwan. Wampu runarí sut'ita wampu kasqanta rejsichin.

¹⁷ Mana allin kachaqa uma nanayta apamun. Sumaj kacharí sonqo tiyasqa kawsayta apamun.

¹⁸ Pichus yuyaychasqata pisipaj qhawajpajqa wajchayaylla, p'enqaytaj kanqa. Pichus k'amisqata jap'ikojrí jatunchasqa kanqa.

¹⁹ Imatachus munasqanchej junt'akojtenqa, sonqonchejpis kusikun. Wampu runakunaqa millayta ruwanamanta manapuni t'aqakuyta munankuchu.

²⁰ Pichus yachayniyojkunawan purejqa yachayniyojllataj kanqa. Wampu runakunawan purejrí mana allinman chayanqa.

²¹ Juchasapakunataqa mana allin kay qhatiykachan, cheqan runakunatajrí allin kajwan t'inkachisqa kanqanku.

²² Allinta ruwaj runaqa allchhinkunaman chayaqeta saqenqa. Juchasapaj kapuynintarí cheqan runa jap'enqa.

²³ Wajcha runaj chajranpi ashkha mikhuna tiyan, chaywanpis mana justicia kajtin chinkapun.

²⁴ Wawanta cheqan ñanman churananpaj mana k'amejqa mana payta munakunchu. Pichus wawanta munakojrí cheqan ñanman churananpaj k'amin.

²⁵ Cheqan runaqa sajsakunankama mikhun, millayta ruwaj runapajrí yarqhachikuylla tiyan.