Números 8 - DIOSPA QHELQACHISQAN DEUTEROCANONICAL

Aarón lamparakunata jap'ichin

¹ Tata Dios Moiseswan parlaspa, nillarqataj:

² Aaronta ajinata niy: Qanchis lamparakunata jap'ichispaqa, candeleroj ñawpaqenta k'anchananpaj jina churanki, nispa.

³ Chantá Aarón kikinta ruwarqa. Imaynatachus Tata Dios Moisesman kamachisqanman jina, lamparakunata candeleroj ñawpaqenman k'anchanankupaj churarqa.

⁴ Candeleroqa chakinmantapacha lamparakunata churanakama martillowan takaspa qorimanta ruwasqa karqa. Tata Dios Moisesman rikuchisqanman jina candelero ruwasqa karqa.

Levitakuna Tata Diospaj t'aqasqa kanku

⁵ Tata Dios Moisesta nillarqataj:

⁶ Levitakunata israelitakuna ukhumanta t'aqaspa, paykunata llimphuchay.

⁷ Llimphuchasqa kanankupaj kay jinata ruwanki: Llimphuchana yakuwan paykunata ch'ajchunki. Chaymantataj paykunaqa tukuy ukhunkumanta chujchata raphakonqanku, chantá p'achankutapis t'ajsakullanqankutaj. Ajinata levitakunaqa llimphuchasqa kanqanku.

⁸ Chaymantataj uj torillota apamullachunkutaj, aceitewan puñasqa sumaj jak'utawan ima ch'aki mikhuy jaywanata jaywanapaj. Jinallataj jucharayku Diosman jaywanapaj uj torillota apamullachunkutaj.

⁹ Chantá levitakunata Dioswan Tinkukuna Toldoj ñawpaqenman qayllamunankuta ninki. Jinallataj tukuynin israelitakunata tantanki.

¹⁰ Chantá Tata Diospa ñawpaqenman levitakunata qayllachejtiyki, israelitakunaqa levitakunaj umankuman makinkuta churanqanku.

¹¹ Chantá Aaronqa israelitakunaj sutinpi ikhasqa jaywanata jina levitakunata Tata Diosman jaywanqa. Ajinamanta levitakunaqa noqapaj t'aqasqa kanqanku.

¹² Chaymantá levitakunañataj torillokunaj umanman makinkuta churanqanku. Chaymantataj ujnin kaj torillota jucha pampachasqa kananpaj jaywanki. Ujnintataj q'olachispa Tata Diosman jaywanki levitakuna llimphuchasqa kanankupaj.

¹³ Chaymantataj Aaronpa, chantá churinkunaj ñawpaqenpi ima levitakunata sayachispa, paykunata jaywanata jina noqaman jaywawanki.

¹⁴ Ajinata levitakunata noqajta kanankupaj israelitakuna ukhumanta t'aqapuwanki.

¹⁵ Chantá levitakuna llimphuchasqa kaspa, jinataj jaywanata jina noqaman jaywasqa kaspa, chayraj Dioswan Tinkukuna Toldopi ruwanankuta ruwayta qallarenqanku.

¹⁶ Ajina kanqa, imaraykuchus tukuy israelitakunamanta levitakuna noqapaj t'aqasqa kanku. Noqa paykunata noqapaj jap'ini, israelitakunaj tukuy kuraj kaj churinkukunaj cuentanmanta.

¹⁷ Israelitakunaj tukuy kuraj kaj churinkukunaqa noqajtamin kanku. Ajinallataj tukuy uywankukunaj phiwi uñankunapis noqajllatataj kanku. Maypachachus Egipto llajtayojkunaj kuraj kaj churinkukunata wañuracherqani chaypacha, noqa paykunata ajllakorqani.

¹⁸ Chayrayku israelitakunaj kuraj kaj churinkukunaj cuentanmanta levitakunata ajllakorqani.

¹⁹ Noqa israelitakuna ukhumanta levitakunata ajllakuspa, Aaronman, chantá churinkunaman ima qorqani. Paykuna israelitakunaj sutinpi Dioswan Tinkukuna Toldopi imachus ruwanata ruwanqanku, jinallataj israelitakunaj juchanku pampachasqa kananpaj paykunarayku Diosman jaywanqanku. Ajinamanta israelitakuna Dioswan Tinkukuna Toldoman qayllajtinku, mana ima llakiypis qhatirenqachu, nispa.

²⁰ Ajinata Moiseswan, Aaronwan, chantá tukuy israelitakunawan ima ruwarqanku, levitakunamanta Tata Dios Moisesman imatachus kamachisqanman jina.

²¹ Chantá Diospa ñawpaqenpi llimphu kanankupaj, levitakuna llimphuchakorqanku, p'achankutapis t'ajsakorqanku. Aarontaj sumaj jaywanata jina paykunata Tata Diosman jaywarqa. Levitakunata llimphuchananpajtaj jucha pampachasqa kananpaj jaywanata Tata Diosman jaywarqa.

²² Chaymantataj levitakunaqa Dioswan Tinkukuna Toldopi imachus ruwanankuta junt'aj rerqanku. Aaronwan, churinkunawan imataj qhawaspa ruwacherqanku. Ajinata Tata Dios Moisesman kamachisqanman jina levitakunawan ruwarqanku.

Levitakuna mayk'ajkamachus ruwananku

²³ Chaymanta Tata Dios Moisesta nillarqataj:

²⁴ Levitakunaqa iskay chunka phishqayoj watayoj kashaspa, Dioswan Tinkukuna Toldopi imatachus ruwanankuta ruwayta qallarenqanku.

²⁵ Phishqa chunka watayoj kashaspataj, imachus ruwanankumanta sayaponqanku.

²⁶ Chaymanta qhepamanqa paykunaj qhepankuta yaykojkunataña Dioswan Tinkukuna Toldota qhawanapi yanapanqanku. Chaywanpis paykunaqa imachus ruwanankuta manaña ruwanqankuchu. Ajinata levitakunata kamachinki, nispa.