Números 6 - DIOSPA QHELQACHISQAN DEUTEROCANONICAL

Diospaj t'aqasqa kayta munajkunapaj kamachisqakuna

¹ Tata Dios Moiseswan parlaspa, nillarqataj:

² Israelitakunata kay jinata niy: Sichus uj qhari, chayrí uj warmi nin Tata Diospaj t'aqasqa nazareo kananta chayqa,

³ ama vinota, ni machachikoj ujyanata, nitaj uvamanta ch'irwasqata ujyanqachu. Nillataj uvata, uva k'isatapis mikhonqachu.

⁴ Diospaj t'aqasqa kananta junt'anankamaqa uvaj poqosqanmanta ama ni imata mikhonqachu, ni mujunta, nitaj qarantapis.

⁵ Manallataj chujchantapis k'utuchikonqachu. Manachayqa chujchanta wiñachikunallan tiyan mayk'ajkamachus Tata Diospaj t'aqasqa kananta nerqa, chayta junt'anankama. Chaykama payqa Diospaj t'aqasqallapuni kanan tiyan.

⁶ Tata Diospaj t'aqasqa kanankamaqa, manallataj wañusqaj ayanmanpis qayllananchu tiyan.

⁷ Ni tatan, ni maman, ni wawqen, ni panan wañupojtinpis paykunaman qayllananchu tiyan, ama mana llimphupaj qhawasqa kananpaj, imaraykuchus payqa Tata Diospa sacerdoten jina imachus ruwanata ruwananpaj t'aqasqa kashan, chayrayku.

⁸ Mashkha unaypajchus Tata Diospaj t'aqasqa kananta nerqa, chaykama Diospaj t'aqasqallapuni kanan tiyan.

⁹ Sichus nazareoj qayllanpi mana yuyasqallamanta pillapis wañupunman chayqa, Diospaj t'aqasqa kasqanta rikuchej chujchan ch'ichipaj qhawasqa kanqa. Jinaqa qanchis p'unchayta suyanan tiyan, chaymantataj chujchanta ruthuchikonqa, ajinamanta llimphuchasqa kanqa.

¹⁰ Chantá nazareoqa pusaj kaj p'unchaypi iskay jurk'utata, chayrí iskay urpi irpata Dioswan Tinkukuna Toldo punkupi kaj sacerdoteman apanqa.

¹¹ Sacerdoteqa jucha pampachasqa kananpaj ujninta Tata Diosman jaywanqa, ujnintataj q'olachispa Tata Diosman jaywanqa. Ajinata ruwaspa, sacerdoteqa Tata Diosmanta mañaponqa, ayata llankhaspa juchallisqan pampachasqa kananta. Chantá chay p'unchaymantapacha watej chujchanta Diospaj t'aqaspa, chujchanta wiñachikonqa.

¹² Chay p'unchaymanta watej Tata Diospaj t'aqasqa jina kasqanta qallarenqa. Ñawpajta chay runa mashkha unaytachus Diospaj t'aqasqa karqa, chayqa mana cuentaman churasqachu kanqa, imaraykuchus wañusqaman qayllasqanrayku chujchan manaña llimphupaj qhawasqachu karqa. Jinallataj nazareo kajqa uj watayoj corderota Tata Diosman jaywananpaj apanqa, juchan pampachasqa kananpaj.

¹³ Diospaj t'aqakusqan p'unchaykuna junt'akojtin, chay runaqa Dioswan Tinkukuna Toldo punkuman rinan tiyan.

¹⁴ Chaypitaj uj watayoj corderota mana iman imanasqata Tata Diosman jaywanqa, q'olachisqa kananpaj. Jucha pampachasqa kananpajtaj, uj watayoj malta ovejata mana iman imanasqata Tata Diosman jaywallanqataj. Jinallataj uj carnerota mana iman imanasqata k'acha kawsakuy jaywanata jaywananpaj apallanqataj.

¹⁵ Chantá sumaj jak'umanta aceitewan puñasqa mana levadurayoj ruwasqa t'antata jaywanqa. Jinallataj aceitewan jawisqa mana levadurayoj ruwasqa t'antata uj canastitapi jaywallanqataj. Chaywan khuska ch'akiy mikhuy jaywanata vinotawan khuska jaywallanqataj.

¹⁶ Sacerdotetaj chayta q'olachispa, Tata Diosman jaywanqa, jinataj jucha pampachasqa kananpaj jaywallanqataj.

¹⁷ Chay jawa, k'achata kawsakuna jaywanata jaywanapaj uj carnerota, chantá mana levadurayoj ruwasqa t'antatawan ima uj canastapi apamullanqataj. Jinallataj Sacerdoteqa Tata Diosman ch'aki mikhuy jaywanata, chantá vinotawan ima jaywallawanqataj.

¹⁸ Chantá nazareoqa Dioswan Tinkukuna Toldo punkupi chujchanta ruthuchikuspa, Diospaj t'aqasqa kasqanmanta chujchanta k'achata kawsakuy jaywanata q'olashaj ninaman wijch'uykonqa.

¹⁹ Chaymanta nazareoqa Diospaj t'aqasqa chujchanta ruthuchikusqanmanta qhepata, sacerdoteqa carneroj maki palan chayasqata jap'ispa, Diospaj t'aqasqa karqa chay runaman jaywanqa. Jinallataj mana levadurayoj t'antata, chantá mana levadurayoj tortillatawan ima nazareoman jaywanqa.

²⁰ Chantá sacerdoteqa chay tukuy imata, watej nazareoj makinmanta jap'ispa, ikhaspa Tata Diosman jaywanqa. Jinallataj uywaj qhasqonta, chantá wasantapis jaywallawanqataj. Tukuy Diospaj t'aqasqa jaywanaqa sacerdotepaj kanqa. Chaymantaraj Diospaj t'aqasqa karqa, chay runa vinota ujyayta atenqa.

²¹ Chaymin kamachisqakuna kanku, pichus nazareo jina Tata Diospaj t'aqasqa kananta nejpaj. Jinallataj ofrenda jaywananmanta, chay jawa atisqanman jina, chantá munasqanman jina jaywananmanta kamachisqakuna kanku. Ajinata Diospaj t'aqasqa kayta munajqa tukuy imata nisqanman jina junt'anqa, t'aqasqa kayta munajpaj imachus kamachisqaman jina, nispa.

Sacerdotej saminchaynin

²² Tata Dios Moisesta nillarqataj:

²³ Aarontawan, chantá churinkunatawan ima niy: Israelitakunata saminchashaspa, kay jinata ninkichej:

²⁴ Tata Dios saminchasuchun, waqaychasuchuntaj.

²⁵ Tata Dios qanta allin ñawiwan qhawasuchun.

²⁶ Jinallataj Tata Diosqa khuyarikususqanta rikuchisuchun, sonqo tiyaykusqa kawsarikuytataj qosuchun, nispa.

²⁷ Ajinata sacerdotekunaqa israelitakuna saminchasqa kanankuta noqa Diosmanta mañaponqanku. Noqataj paykunata saminchasaj, nispa.