Números 5 - DIOSPA QHELQACHISQAN DEUTEROCANONICAL

Ch'ichipaj qhawasqa runata jawaman wijch'una

¹ Tata Dios Moiseswan parlaspa, nillarqataj:

² Israelitakunata kamachiy tukuy llejti onqoyniyojkunata, q'eyata jisp'ajkunata chantá wañusqata llankhajkunata ima jaramanta jawaman orqhonankuta.

³ Qharipis warmipis kachun, jaramanta jawaman orqhochunku. Ajinamanta jaraqa llimphupaj qhawasqa kanqa, imaraykuchus noqa paykunaj chawpinkupi kashani, nispa.

⁴ Chantá israelitakuna mana llimphupaj qhawasqa runakunata jaramanta jawaman orqhorqanku, Tata Dios Moisesman imatachus kamachisqanta kasuspa.

Kutichinamanta kamachisqakuna

⁵ Tata Dios Moisesta nillarqataj:

⁶ Israelitakunata niy: Sichus qharipis, chayrí warmipis runa masinpa contranta juchallin chayqa, Tata Diospa contranpi ruwan. Chay runaqa juchayoj kanqa.

⁷ Payqa juchanta rimarinan tiyan, chantá runa masinta mana allinta ruwasqanmanta tukuyninta kutichipunan tiyan. Chaymantaj phishqaman rak'ispa, ujnintawan yapaykuspa pagapunan tiyan.

⁸ Sichus pimanchus pagapunan karqa chay runa wañupunmanña, nitaj pagapunanpaj pininpis kanmanchu chayqa, mashkhatachus pagapunan karqa, chayta Tata Diosman qopuspa sacerdoteman jaywanqa. Chay jawa juchan pampachasqa kananpaj, uj carnerotawan qonqa, sacerdote chayta Tata Diosman jaywananpaj.

⁹ Israelitakuna Tata Diosman qonankupaj tukuy imatachus t'aqasqankutaqa sacerdoteman apanqanku. Chaykunataj sacerdotekunapaj kanqa.

¹⁰ Imatachus Tata Diospaj t'aqaspa sacerdoteman apanku chaykunaqa, sacerdotekunapaj kanqa, nispa.

Celosanakuy kajtin imatachus ruwana

¹¹ Tata Dios Moisesta kay jinata nillarqataj:

¹² Israelitakunata ajinata ninki: Ichapis uj warmi mana allinta purispa, qosanta wasanchanman,

¹³ chantá pay qosanpa mana yachasqallan waj qhariwan puñuykuspa khuchichakunman, manataj pipis rikoj kanmanchu, nitaj pipis taripanmanchu chayqa, warminta sacerdoteman pusanqa.

¹⁴ Jinallataj sichus qosan mayta celosakuspa warminta tumpanman, warmin wajwan wasanchasqanrayku, chayrí warmin mana wajwan wasanchashajtillan, warminmanta anchata celosakunman chayqa,

¹⁵ warminta sacerdoteman pusanqa. Chantá warminpa cuentanmanta iskay kilo cebada jak'uta Diosman jaywanqa. Chay jak'umanqa mana aceiteta, nitaj inciensota jich'anqachu, imaraykuchus chay jaywanaqa celosakunamanta jaywana kashan, chayrayku. Chayqa juchata sut'inchanapaj jaywanamin.

¹⁶ Chantá sacerdoteqa chay warmita qayllachispa, Tata Diospa altarnin ñawpaqenpi sayachenqa.

¹⁷ Chaymantataj Tata Diosman jaywasqa yakuta t'urumanta ruwasqa qeruwan wisenqa. Chaymantaj Dioswan Tinkukuna Toldoj pampanmanta uj chhika jallp'ata jich'aykonqa.

¹⁸ Chantá chay warmita Tata Diospa ñawpaqenman sayachispa, warmej simp'asqa chujchanta kacharparenqa. Jinaspataj juchata sut'inchanapaj apamusqa jaywanata, warmiman jaywanqa. Chay celosakuy jaywanata warmi jap'ishajtintaj, sacerdotetaqa onqochej jaya yakuta jap'enqa.

¹⁹ Chaymantaqa warmita kay jinata tiluchenqa: Sichus waj qhariwan mana puñuykorqankichu, manataj qosaykita wasanchaspa khuchichakorqankichu chayqa, onqochej jaya yakuta ujyajtiyki, mana imanasonqachu.

²⁰ Sitajchus qosaykita wasanchaspa, waj qhariwan puñuykuspa ch'ichichakorqanki chayrí,

²¹ Tata Diosmanta mañakuni kay yakuta ujyajtiyki ukhuykita onqochinanta, wijsayki punkinanta, chantá mana wawa rejsiyta atejtataj ruwasunanta.

²² Tata Diosnejta ñak'arichisqa kasqaykita rikuspataj, llajta masiykikuna wananqanku, nispa. Chayta sacerdote nejtintaj, warmi kutichenqa: Ajina kachun, nispa.

²³ Chantá sacerdoteqa imaynachus chay warmi maldicisqa kananta uj qarapi qhelqanqa. Chantá qhelqasqanta jaya yakuwan mayllaspa, chinkachenqa.

²⁴ Chaymantataj warmiman onqochej jaya yakuta ujyachenqa. Chay yakutaj sichus warmi juchayoj chayqa, sinch'i wijsa q'ewiyta oqharichenqa.

²⁵ Chantá sacerdoteqa celosakuy jaywanata warmej makinmanta jap'ispa, Tata Diosman ikhaspa, jaywanqa. Chaymantataj chay jaywanata altar pataman churanqa.

²⁶ Chaymantataj sacerdoteqa cebada jak'uta apamusqanmanta uj pojtuta oqharispa, warmej sutinpi altar patapi q'olachenqa. Chayqa yuyarikuna jaywana kanqa. Chaymantataj sacerdoteqa chay onqochej jaya yakuta warmiman ujyachenqa.

²⁷ Sichus chay warmi cheqapuni qosanta wasancharqa chayqa, onqochej jaya yakoqa wijsa q'ewiyta oqharichenqa. Wijsan punkenqa, chayraykutaj mana wawata rejsiyta atej kanqa. Warmej sutintaj israelitakuna ukhupi maldicinapaj kanqa.

²⁸ Jinapis sichus chay warmi mana qosanta wasancharqachu chayqa, chay warmipaj mana imapis kanqachu, astawanqa ashkha wawayoj kanqa.

²⁹ Kaymin celosanakuy kajtin imatachus ruwanamanta kamachisqakunaqa, maypachachus uj warmi qosayoj kashaspa wasanchaspa khuchichakun chaypacha.

³⁰ Chayrí maypachachus qosan warminta waj qharitawan tumpaspa celosakun chayqa, qhareqa warminta Tata Diosman pusanqa, sacerdotetaj kay kamachisqaman jina ruwanqa.

³¹ Qosanqa mana juchayojchu kanqa. Warmitajrí wasancharqapuni chayqa, juchallisqanmanta ñak'arichisqa kanqa, nispa.