Números 36 - DIOSPA QHELQACHISQAN DEUTEROCANONICAL

Warmikuna chayaqeta jap'ejkuna

¹ Josejta churin Manasés karqa, Manasespata churintaj Maquir, Maquirpata churintaj Galaad. Chantá Galaadpa mirayninmanta kurajkuna rispa, Moisestawan, tukuy israelitakunaj kurajninkukunatawan ima nerqanku:

² Wiraqochiyku Moisés, Tata Dios qanta kamachisorqa kay jallp'ata suerteta choqaspa, israelitakunaman qonaykita. Chantá aylluykumanta karqa Selofejadpata ususinkunamanpis jallp'ata qonaykita kamachillasorqataj.

³ Chaywanpis sichus paykuna waj jatun ayllumanta qharikunawan casarankuman chayqa, jap'erqanku, chay jallp'a manaña aylluykojtachu kanqa. Manachayqa ima ayllumanta qhariwanchus casaranqanku, chay jatun aylluman pasanqa. Sichus ajina kanman chayqa, suertepi jap'isqayku jallp'a pisiyanqa.

⁴ Chantá Israelpi kacharipuna wata chayamojtenqa, chay warmikunaj jallp'ankoqa qosankoj jallp'anman yapaykusqa kanqa. Jina kajtin, paykunajta karqa, chay jallp'aqa manaña tataykoj ayllunpatachu kanqa, nispa.

⁵ Chantá Moisés, Tata Diospa kamachisqanman jina, israelitakunata kamacherqa: Joséj ayllunmanta kajkunaqa cheqanta parlanku.

⁶ Chayrayku Tata Dios kayta kamachin: Selofejadpa ususinkunaqa munasqankuman jina casarakuyta atinku. Chaywanpis tatankoj jatun ayllunmanta kaj qharillawan casarakonqanku.

⁷ Jinamanta israelitakuna jap'isqanku jallp'aqa mana uj jatun ayllumanta uj jatun aylluman pasanqachu. Sapa israelita jatun ayllunpi jallp'anta jap'inallanpuni tiyan.

⁸ Sichus mayqen jatun ayllullamantapis uj warmi jallp'ayoj kanman chayqa, jatun ayllunmanta kaj qhariwanpuni casaranan tiyan. Ajinamanta israelitakunaqa tatankoj jallp'anta jap'illanqankupuni.

⁹ Ni mayqen jallp'a waj jatun aylloj makinman chayananchu tiyan. Israelmanta sapa jatun ayllu jap'isqan jallp'ata mana waj jatun aylluman kacharinanchu tiyan, nispa.

¹⁰ Chantá Selofejadpa ususinkunaqa Tata Dios Moisesman kamachisqanman jina ruwarqanku.

¹¹ Ajinata Malá, Tirsa, Joglá, Milca, Nogá ima ruwarqanku. Paykunaqa tatankumanta tionkunaj churinkunawan casarakorqanku.

¹² Chay qharikunaqa Joséj churin Manasespata mirayninmanta karqanku. Ajinata chay sipaskuna ruwasqankurayku, jap'isqanku jallp'aqa tatankoj ayllun ukhullapipuni karqa.

¹³ Kaykunata Tata Diosqa Moisesnejta israelitakunaman kamacherqa Moab pampapi, Jordán mayu kantupi, Jericó llajtaj chimpanpi.