Números 34 - DIOSPA QHELQACHISQAN DEUTEROCANONICAL

Canaán suyoj mojonninkuna

¹ Tata Dios Moisesta nillarqataj:

² Israelitakunata kay jinata kamachiy: Maypachachus Canaán suyuman yaykunkichej chaypachaqa, tukuynin suyuta qankunajta kananpaj jap'inkichej. Chay jallp'aj mojonninkuna kay jina kanqa:

³ Uranejman mojonnenqa Zin nisqa ch'innejmanta, Edom suyoj jap'iyninwan tinkuykama kanqa. Inti llojsimuynejmantaj Wañusqa Qochamanta uranej kantunmantapacha kanqa.

⁴ Uranejmanqa Acrabín wichaykama rillanqapuni, chaytaj Zinmanta Cadés Barneakama pasanqa. Chaymanta Jazar Adarnejta Asmonkama rillanqapuni.

⁵ Asmonmantataj Egiptopi wayq'okama renqa, chaymantataj Jatun Mama Qochawan tinkonqa.

⁶ Inti yaykuynejman jallp'aykichejpa mojonnenqa Jatun Mama Qocha kanqa.

⁷ Wichaynejman jallp'aykichejpa mojonnenqa Jatun Mama Qochamanta Hor orqokama kanqa.

⁸ Hor orqomantataj Jamatman yaykuykama kanqa. Chaymantataj Zedadkama kanqa.

⁹ Zedadmanta wichaynejman kaj mojonnintaj Zifronkama rillanqapuni, chaymantataj Jazar Enanpi tukukonqa.

¹⁰ Inti llojsimuynejman mojonqa Jasar Enanmanta Sefankama renqa.

¹¹ Sefanmantataj mojonqa Riblakama renqa, Ayinmanta inti llojsimuynejman. Chaymantataj Cineret qochaj inti llojsimuyninnejta urayk'onqa.

¹² Chaymantataj Jordán mayunta rillanqapuni, Wañusqa Qochaj tukukuyninkama. Jallp'aykichejpa jap'iyninpa mojonnenqa ajina kanqa, nispa.

Jallp'ata imaynatachus rak'inakunanku

¹³ Moisés israelitakunata kamachillarqataj: Chay suyupi jallp'ata qankunaqa suerteta choqaspa, rak'inakunkichej. Chayta Tata Diosqa jisq'on jatun ayllu khuskanniyoj qhepakojkunaman qonata kamacherqa.

¹⁴ Rubén jatun ayllu, Gad jatun ayllu, jinallataj Manasespa khuskan jatun ayllun ima, mashkhachus kasqankuman jina, ñapis jallp'ankuta jap'inkuña Jericó chimpapi, Jordán mayumanta inti llojsimuynejpi.

¹⁵ Chay iskay jatun ayllu, chantá Manasespa jatun ayllunmanta khuskanniyojqa Jordán mayoj inti llojsimuynejpi, Jericó llajtaj chimpanpi ña jallp'ankuta jap'inkuña, nispa.

¹⁶ Tata Dios Moisesta nillarqataj:

¹⁷ Chay jallp'ataqa sacerdote Eleazarwan, chantá Nunpata churin Josuewan ima rak'enqanku.

¹⁸ Qankunataj sapa jatun ayllumanta uj kamachejta ajllankichej, jallp'a rak'iypi yanapanankupaj.

¹⁹ Chay kurajkunaj sutinkoqa kaykuna kanku: Judá jatun ayllumanta Yefunej churin Calebta ajllankichej.

²⁰ Simeón jatun ayllumantaqa Amiudpata churin Semuelta ajllankichej.

²¹ Benjamín jatun ayllumantataj Quislonpata churin Elidadta ajllankichej.

²² Dan jatun ayllumantataj Yoglíj churin Buquita ajllankichej.

²³ Joséj churinkunaj jatun ayllunkumantaqa Manasesmanta Efodpata churin Janielta ajllankichej.

²⁴ Efraín jatun ayllunmantataj Siftanpa churin Kemuelta ajllankichej.

²⁵ Zabulón jatun ayllumantatataj Parnacpata churin kuraj Elisafanta ajllankichej.

²⁶ Isacar jatun ayllumantarí Azanpa churin Paltielta ajllankichej.

²⁷ Aser jatun ayllumantaqa Selomij churin Ajiudta ajllankichej.

²⁸ Neftalí jatun ayllumantataj Amiudpata churin Pedaelta ajllankichej, nispa.

²⁹ Chay kurajkunata Tata Dios kamacherqa Canaán suyupi jallp'ata israelitakunaman rak'inankuta.