Números 33 - DIOSPA QHELQACHISQAN DEUTEROCANONICAL

Israelitakuna ch'innejta purisqankuta yuyarinku

¹ Israelitakuna Egiptomanta llojsimuspa, samarispa samarispa puririsqanku ajina karqa: Paykunataqa Moiseswan, chantá Aaronwan ima soldadokunata jina sinrullata pusarqanku.

² Tata Dios kamachisqanman jina, Moisesqa maynejmantapachachus puririsqankuta, chantá maymanchus chayasqankuta, chay cheqakunaj sutinkuta qhelqarqa. Ñanta rispa, kay llajtakunata pasarqanku.

³ Israelitakunaqa wata qallariy killata, chunka phishqayoj p'unchay kashajtin, Ramesés llajtamanta llojserqanku. Pascua raymita ruwasqankumanta, chay q'ayantin purirerqanku. Chaypacha paykunaqa manchay wapulla, tukuy Egipto llajtayojkunaj rikunankuta llojserqanku.

⁴ Chaykamataj Egipto llajtayojkunaqa Tata Dios tukuy kuraj kaj churinkuta wañurachisqanta p'ampasharqanku. Chayta ruwaspataj, Tata Dios Egipto llajtayojkunaj diosninkuta p'enqaypi rikhuricherqa.

⁵ Israelitakunaqa Ramesesmanta llojsispa, Sucotpi jarakorqanku.

⁶ Sucotmanta llojsisparí, Etampi jarakorqanku. Chayqa ch'innej qallarin chaynejpi kashan.

⁷ Etammanta puririspataj, Baal Sefonmanta inti llojsimuynejpi, Pi Ajirot chaynejman muyuykorqanku, Migdolpa chimpanpitaj jarakorqanku.

⁸ Pi Ajirotmanta puririspataj, Puka Mama Qochata chimpaytawan, ch'innejman chayarqanku. Chantá Etam nisqa ch'innejta kinsa p'unchayta purispa, Marapi jarakorqanku.

⁹ Maramanta puririspataj, Elimman chayarqanku. Chaypi chunka iskayniyoj yaku juturi karqa, qanchis chunka palma sach'akuna ima. Chantá chaynejpi jarakorqanku.

¹⁰ Elimmanta puririspataj, Puka Mama Qocha kantupi jarakorqanku.

¹¹ Puka Mama Qochamanta puririspataj, Sin sutiyoj ch'innejpi jarakorqanku.

¹² Sin ch'innejmanta puririspataj, Dofcapi jarakorqanku.

¹³ Dofcamanta puririspataj, Aluspi jarakorqanku.

¹⁴ Alusmanta puririspataj, Refidinpi jarakorqanku, chaypitaj ujyanankupaj yaku mana karqachu.

¹⁵ Refidinmanta puririspataj, Sinaí ch'innejpi jarakorqanku.

¹⁶ Sinaimanta puririspataj, Quibrot Hatavapi jarakorqanku.

¹⁷ Quibrot Hatavamanta puririspataj, Jaserotpi jarakorqanku.

¹⁸ Jaserotmanta puririspatajrí, Ritmapi jarakorqanku.

¹⁹ Ritmamanta puririspataj, Rimón Perespi jarakorqanku.

²⁰ Rimón Peresmanta puririspataj, Libnapi jarakorqanku.

²¹ Libnamanta puririspataj, Rissapi jarakorqanku.

²² Rissamanta puririspataj, Quelatapi jarakorqanku.

²³ Quelatamanta puririspataj, Sefer orqopi jarakorqanku.

²⁴ Sefer orqomanta puririspatajrí, Jaradapi jarakorqanku.

²⁵ Jaradamanta puririspataj, Macelotpi jarakorqanku.

²⁶ Macelotmanta puririspatajrí, Tajatpi jarakorqanku.

²⁷ Tajatmanta puririspataj, Terajpi jarakorqanku.

²⁸ Terajmanta puririspatajrí, Mitcapi jarakorqanku.

²⁹ Mitcamanta puririspataj, Jasmonapi jarakorqanku.

³⁰ Jasmonamanta puririspataj, Moserotpi jarakorqanku.

³¹ Moserotmanta puririspataj, Bené Yacanpi jarakorqanku.

³² Bené Yacanmanta puririspatajrí, Gidgad orqopi jarakorqanku.

³³ Gidgad orqomanta puririspataj, Jotbatapi jarakorqanku.

³⁴ Jotbatamanta puririspatajrí, Abronapi jarakorqanku.

³⁵ Abronamanta puririspataj, Ezión Gueberpi jarakorqanku.

³⁶ Ezión Guebermanta puririspataj, Zin ch'innejpi, Cades nisqapi jarakorqanku.

³⁷ Cadesmanta puririspataj, Hor sutiyoj orqopi jarakorqanku. Chayqa Edom suyoj mojonninwan tinkuypi kashan.

³⁸ Tata Diospa kamachisqanman jina Aaronqa Hor nisqa orqoman wicharerqa, chaypitaj wañuporqa. Wañuporqa, chaypacha karqa israelitakuna Egiptomanta llojsimusqankumanta, tawa chunka wataña kashajtin, phishqa kaj killa qallariyta.

³⁹ Aarón 123 watayoj kashaspa, Hor nisqa orqopi wañuporqa.

⁴⁰ Aradmanta Canaán llajtayoj kuraj kamachejqa chaypacha Neguevpi tiyakusharqa. Paytaj israelitakuna chaynejman chayamusqankuta yacharqa.

⁴¹ Chantá israelitakuna Hor orqomanta puririspa, Salmonapi jarakorqanku.

⁴² Salmonamanta puririspataj, Punonpi jarakorqanku.

⁴³ Punonmanta puririspataj, Obotpi jarakorqanku.

⁴⁴ Obotmanta puririspatajrí, Iyé Abarinpi jarakorqanku. Chayqa Moab suyoj mojonninwan tinkuynejpi kashan.

⁴⁵ Iyé Abarinmanta puririspataj, Dibón Gadpi jarakorqanku.

⁴⁶ Dibón Gadmanta puririspatajrí, Almón Diblatayinpi jarakorqanku.

⁴⁷ Almón Diblatayinmanta puririspataj, Abarín orqonejpi jarakorqanku. Chayqa Nebomanta inti llojsimuynejpi kashan.

⁴⁸ Abarinmanta puririspatajrí, Moab pampapi, Jordán mayoj kantunpi, Jericó llajtaj chimpanpi jarakorqanku.

⁴⁹ Jordán mayu kantupi jarankoqa Moab pampakunapi, Bet Yesimotmantapacha Abel Sitinkama chayarqa.

Canaán jallp'ata rak'inakunku

⁵⁰ Israelitakuna Jordán mayu kantupi, Moab pampapi kashajtinku, Jericó llajtaj chimpanpi Tata Dios Moisesta nerqa:

⁵¹ Israelitakunata kay jinata niy: Jordán mayuta chimpaytawan, Canaán suyuman yaykuspaqa,

⁵² tukuy chaypi tiyakojkunata qharqoychej. Phiriychejtaj rumimanta ruwasqa, chantá metalmanta ruwasqa lantinkunata. Orqo patapi lanti yupaychana cheqakunatapis thuñiychej.

⁵³ Chantá chay suyuta jap'ispa, chaypi tiyakuychej, imaraykuchus noqamin tiyakunaykichejpaj chay suyupi jallp'ata qoykichej.

⁵⁴ Chay jallp'ataqa sapa ayllu mashkhachus kasqaykichejman jina, suerteta choqaspa rak'inakunkichej. Jatun ayllumanqa jatullantataj qonkichej, juch'uy ayllumantaj juch'uyllatataj qonkichej. Sapa ayllu, maynejpichus suerte urmasqanman jina jap'enqa.

⁵⁵ Sichus qankuna chay runakunata mana qharqonkichejchu chayqa, chay runakunaqa ñawiykichejpi qhepu jina kanqanku. Khishka jinataj ukhuykichejpi t'ojsisonqachej. Qankunapaj chay jallp'api tiyakushajtiykichej chaypi, paykunaqa uma nanay kanqanku.

⁵⁶ Noqatajrí awqaykichejta imatachus ruwayta yuyarqani, ajinallatataj qankunawan ruwasaj, nispa. Ajinata Tata Dios nerqa.