Números 30 - DIOSPA QHELQACHISQAN DEUTEROCANONICAL

Diosman imatachus nisqanchejta junt'ana

¹ 1 (2) Chantá Moisés israelitakunamanta kurajkunata nerqa: Tata Dios ajinata kamachin:

² 2 (3) Sichus mayqenpis Tata Diospaj imata ruwananta nin chayqa, chayrí tiluspa imatapis junt'ananta nin chayqa, imatachus nisqanmanta mana kutirinanchu tiyan, manachayqa nisqanta junt'ananpuni tiyan.

³ 3 (4) Ichapis uj sipas tatanpa makillanpiraj kashaspa, imatapis Tata Diosman qonanta ninman, chayrí imatapis ruwananta ninman.

⁴ 4 (5) Sichus tatan imatachus nisqanta uyarispa, mana imatapis ninmanchu chayqa, chay sipas imatachus nisqanta junt'anan tiyan.

⁵ 5 (6) Chantá sichus sipaspa tatan chayta yachaspa, mana munanmanchu imatachus nisqanta junt'ananta chayqa, sipasqa manaña nisqanta junt'anqachu. Tatan mana munasqanrayku, Tata Diosqa junt'anantapuni mana mañanqachu.

⁶ 6 (7) Sichus uj warmisapallanraj kashaspa, Tata Diosman imatapis qonanta ninman, chayrí mana allinta qhawarikuspa imatapis ruwananta ninman, chantá casarakapunman,

⁷ 7 (8) sitajchus qosan nisqanta yachaspa, mana imatapis ninmanchu chayqa, chay warmi imatachus Diosman nisqanta, jinallataj imatachus ruwasaj nisqantapis junt'anan tiyan.

⁸ 8 (9) Sichus qosan yachaspa mana munanqachu chayta junt'ananta, chayrí mana allinta qhawarikuspa imatapis nisqanta junt'ananta chayqa, chay warmi manaña junt'ayta atenqachu. Tata Diospis manallataj junt'anantapuni mañanqachu.

⁹ 9 (10) Sichus warmisapa, chayrí qosanmanta t'aqasqa warmi nenqa Tata Diospaj imatapis ruwananta, chayrí imatapis qonanta chayqa, imatachus nisqanta junt'ananpuni tiyan.

¹⁰ 10 (11) Ichapis qosayoj warmi qosanpa wasinpi kashaspa, tiluspa ninman Tata Diospaj imatapis ruwananta.

¹¹ 11 (12) Sichus qosan chayta yachashaspa, mana imatapis ninmanchu, nitaj jark'akunmanchu chayqa, chay warmi imatachus nisqanta junt'anan tiyan.

¹² 12 (13) Chaywanpis sichus qosan chayta yachaytawan, imatachus nisqanta junt'ananta mana munanmanchu chayqa, chay warmi manaña junt'anqachu, qosan mana munasqanrayku. Tata Diostaj junt'anantapuni manaña mañanqachu.

¹³ 13 (14) Qosanqa warmin Diosman imatachus nisqanta, chayrí ayunananta nisqanta, allinchus, manachus kasqanta niyta atenqa.

¹⁴ 14 (15) Chaywanpis sichus qosan chayta yachashaspa, q'ayantin, minchhantinpis mana imatapis ninmanchu chayqa, niyta munan warmin Tata Diosman imatachus nisqanta, chayrí tilusqanta junt'ananta.

¹⁵ 15 (16) Sichus qosan yachasqanmantaña mana usqhayta imatapis ninmanchu, chaymantaraj mana allinchu kasqanta ninman chayqa, pay warminpa juchanta apanqa, warmin Tata Diosman imatachus qosaj nisqanta mana junt'asqanmanta.

¹⁶ 16 (17) Chaykunata Tata Dios Moisesman kamacherqa, chayman jina qhari warmi imatachus ruwanankumanta, jinataj tatanpa wasillanpiraj tiyaj sipaswan imatachus ruwanankumanta ima.