Números 29 - DIOSPA QHELQACHISQAN DEUTEROCANONICAL

Trompeta waqachina raymi

¹ Tata Dios nillarqapuni: Qanchis kaj killa qallariyta Diospa sutinpi tantakunkichej. Chay p'unchayqa ruwanaykichejmanta amapuni ni imata ruwankichejchu, imaraykuchus trompeta waqachina p'unchay kanqa.

² Chaypacha q'olachispa Tata Diosman jaywankichej, ima munayta q'apashaj jaywanata jina, mana iman imanasqa uj torillota, uj carnerota, uj watayoj qanchis corderokunatawan ima.

³ Sapa torillota aceitewan puñasqa sojta kilo sumaj jak'utawan jaywankichej, sapa carnerotataj tawa kilo jak'utawan.

⁴ Sapa corderotataj iskay kilo jak'utawan jaywankichej.

⁵ Chantá juchaykichej pampachasqa kananpaj uj chivotawan jaywallankichejtaj.

⁶ Chay jawaqa, kamachisqa kasqanman jina, sapa killa q'olachispa jaywanata, jinallataj sapa p'unchay q'olachispa jaywanata, ch'aki mikhuy jaywanantinta, chantá ch'ajchunapaj vino jaywanantinta ima Diosman jaywallankichejpuni. Chay jaywanaqa Tata Diospaj ima munayta q'apashaj q'olachisqa jaywana kanqa.

Jucha pampachana p'unchaypi jaywana

⁷ Qanchis killallapitaj, chunka kaj p'unchayta tantakuspa, Diosta yupaychankichej. Chay p'unchayqa ayunankichej, jinataj ruwanaykichejmanta ama ni imata ruwankichejchu.

⁸ Ima munayta q'apashaj q'olachispa jaywanata Tata Diosman jaywankichej mana iman imanasqa uj torillota, uj carnerota, uj watayoj qanchis corderokunatawan ima.

⁹ Sapa torillota aceitewan puñasqa sojta kilo sumaj jak'utawan jaywankichej, sapa carnerotataj tawa kilo jak'utawan.

¹⁰ Sapa corderotataj iskay kilo sumaj jak'utawan jaywankichej.

¹¹ Jinallataj jucha pampachasqa kananpaj, uj chivotawan jaywallankichejtaj. Jaywallankichejtaj jucha pampachana p'unchaypi jaywanata, chantá sapa p'unchay q'olachispa jaywanatawan. Sapa jaywanata, ch'aki mikhuy jaywanantinta chantá ch'ajchunapaj vinontinta jaywankichej.

Ch'ujlla Ruwana raymi

¹² Qanchis kaj killapi, chunka phishqayoj p'unchaypi Diosta yupaychanaykichejpaj tantakunkichej. Chay p'unchayqa ruwanaykichejmanta amapuni ni imata ruwankichejchu. Qanchis p'unchaynintinta Tata Diospaj jatun raymita ruwapunkichej.

¹³ Raymi qallariy p'unchayta, ima munayta q'apashaj q'olachisqa jaywanata Tata Diosman jaywankichej mana iman imanasqa, chunka kinsayoj torillokunata, iskay carnerokunata, uj watayoj chunka tawayoj corderokunata ima.

¹⁴ Sapa torillota aceitewan puñasqa sojta kilo sumaj jak'utawan jaywankichej, sapa carnerotataj tawa kilo jak'utawan.

¹⁵ Uj watayoj sapa corderotataj iskay kilo sumaj jak'utawan jaywankichej.

¹⁶ Jinallataj jucha pampachasqa kananpaj uj chivotawan jaywallankichejtaj. Chay jawa, sapa p'unchay q'olachispa jaywanatapis jaywallankichejtaj. Chaykunata ch'aki mikhuy jaywanantinta, ch'ajchunapaj vinontinta ima jaywankichej.

¹⁷ Iskay kaj p'unchaypeqa mana iman imanasqa chunka iskayniyoj torillokunata, iskay carnerokunata, uj watayojta chunka tawayoj corderokunatawan ima jaywankichej.

¹⁸ Chay jawa, Tata Dios kamachisqanman jina, torillokuna, carnerokuna, corderokuna mashkhachus kasqanman jina jaywankichej ch'aki mikhuy jaywanantinta, chantá ch'ajchunapaj vinontinta ima.

¹⁹ Jinallataj jucha pampachasqa kananpaj uj chivotawan jaywallankichejtaj. Chay jawa, sapa p'unchay q'olachispa jaywanatapis jaywallankichejtaj. Chaykunata ch'aki mikhuy jaywanantinta, ch'ajchunapaj vinontinta ima jaywankichej.

²⁰ Kinsa kaj p'unchaypirí mana iman imanasqa, chunka ujniyoj torillokunata, iskay carnerokunata, uj watayoj chunka tawayoj corderokunatawan ima jaywankichej.

²¹ Chay jawa, Tata Dios kamachisqanman jina, torillokuna, carnerokuna chantá corderokuna mashkhachus kasqankuman jina jaywankichej ch'aki mikhuy jaywanantinta chantá ch'ajchunapaj vinontinta ima.

²² Chantá jucha pampachasqa kananpaj uj chivotawan jaywankichej. Jinallataj sapa p'unchay q'olachispa jaywanatapis jaywallankichejtaj. Chaykunata ch'aki mikhuy jaywanantinta, chantá ch'ajchunapaj vinontinta ima jaywankichej.

²³ Tawa kaj p'unchaypitaj, mana iman imanasqa chunka torillokunata, iskay carnerokunata, uj watayoj chunka tawayoj corderokunatawan ima jaywankichej.

²⁴ Chay jawa, Tata Dios kamachisqanman jina, torillokuna, carnerokuna, corderokuna ima, mashkhachus kasqankuman jina ch'aki mikhuy jaywanantinta, ch'ajchunapaj vinontinta ima jaywankichej.

²⁵ Jucha pampachasqa kananpajtaj uj chivotawan jaywankichej. Jaywallankichejtaj sapa p'unchay q'olachisqa jaywanata. Chaykunata ch'aki mikhuy jaywanantinta, ch'ajchunapaj vinontinta ima jaywankichej.

²⁶ Phishqa kaj p'unchaypitaj mana ima imanasqa jisq'on torillokunata, iskay carnerokunata, uj watayoj chunka tawayoj corderokunatawan ima jaywankichej.

²⁷ Chay jawa, Tata Dios kamachisqanman jina, torillokuna, carnerokuna, corderokuna ima, mashkhachus kasqankuman jina, ch'akin mikhuy jaywanantinta, chantá ch'ajchunapaj vinontinta ima jaywankichej.

²⁸ Jinallataj jucha pampachasqa kananpaj uj chivotawan jaywankichej. Sapa p'unchay q'olachispa jaywanatapis jaywallankichejtaj. Chaykunata ch'aki mikhuy jaywanantinta, chantá ch'ajchunapaj vinontinta ima jaywankichej.

²⁹ Sojta kaj p'unchaypeqa pusaj torillokunata, iskay carnerokunata, uj watayoj chunka tawayoj corderokunata ima jaywankichej.

³⁰ Chay jawa, Tata Dios kamachisqanman jina, torillokuna, carnerokuna, corderokuna ima, mashkhachus kasqankuman jina ch'aki mikhuy jaywanantinta, chantá ch'ajchunapaj vinontinta ima jaywankichej.

³¹ Jucha pampachasqa kananpajtaj uj chivotawan jaywankichej. Jinallataj sapa p'unchay q'olachispa jaywanatapis jaywallankichejtaj. Chaykunata ch'aki mikhuy jaywanantinta, chantá ch'ajchunapaj vinontinta ima jaywankichej.

³² Qanchis kaj p'unchaypi mana iman imanasqa qanchis torillokunata, iskay carnerokunata, uj watayoj chunka tawayoj corderokunata ima jaywankichej.

³³ Chay jawa, Tata Dios kamachisqanman jina, torillokuna, carnerokuna, corderokuna ima mashkhachus kasqankuman jina, ch'aki mikhuy jaywanantinta, ch'ajchunapaj vinontinta ima jaywankichej.

³⁴ Jucha pampachasqa kananpajtaj uj chivotawan jaywallankichejtaj. Jinallataj sapa p'unchay q'olachispa jaywanatapis jaywallankichejtaj. Chaykunata ch'aki mikhuy jaywanantinta, chantá vinontinta ima jaywankichej.

³⁵ Pusaj kaj p'unchaypitaj yupaychanaykichejpaj tantakunkichej. Chay p'unchayqa imachus ruwanaykichejmanta ama ni imata ruwankichejchu.

³⁶ Ima munayta q'apashaj jaywanata, q'olachispa Tata Diosman mana iman imanasqa uj torillota, uj carnerota, uj watayoj qanchis corderokunatawan ima jaywankichej.

³⁷ Chay jawa, Tata Dios kamachisqanman jina, torillokuna, carnerokuna, corderokuna ima mashkhachus kasqanman jina ch'aki mikhuy jaywanantinta, chantá ch'ajchunapaj vinontinta ima jaywankichej.

³⁸ Chantá jucha pampachasqa kananpaj uj chivotawan jaywallankichejtaj. Jinallataj sapa p'unchay q'olachispa jaywanatapis jaywallankichejtaj. Chaykunata ch'aki mikhuy jaywanantinta, chantá vinontinta ima jaywankichej.

³⁹ Chaykunata Tata Diospa jatun raymin p'unchaykunapi jaywankichej. Chay jawa jaywallankichejtaj, Tata Diosman nisqaykichejta junt'aspa jaywanata, sonqomanta munaspa jaywanata, chayrí q'olachispa jaywanata, ch'akiy mikhuy jaywanata, ch'ajchunapaj vinota, chantá k'achata kawsakuy jaywanata ima, nispa.

⁴⁰ 40 (30.1) Chantá Moisesqa Tata Dios payman imatachus kamachisqanta israelitakunaman rejsicherqa.