Números 27 - DIOSPA QHELQACHISQAN DEUTEROCANONICAL

Selofejadpa ususinkuna jallp'ata mañakunku

¹ Chayllaman Selofejadpa ususinkuna qayllaykamorqanku. Selofejadqa Jeferpata churin karqa, Jefertaj Galaadpata churin. Galaadtaj Maquirpata churin karqa Maquirtaj Manasespata churin. Selofejadqa Joséj churin Manasés ayllumanta karqa, ususinkunataj kaykuna karqanku: Malá, Nogá, Joglá, Milca, chantá Tirsa ima.

² Chay phishqantin ñañakuna Dioswan Tinkukuna Toldoman rispa, Moisesta, sacerdote Eleazarta, chantá israelitakunamanta tukuy kurajkunatawan ima nerqanku:

³ Tataykoqa ch'innejpi wañorqa. Payqa, pikunachus Tata Diospa contranpi oqharikunankupaj Coreta qhaterqanku, mana chaykunawanchu karqa. Payqa kikin juchanrayku wañorqa. Paypataqa mana uj qhari wawallanpis karqachu.

⁴ Mana qhari wawayoj kasqanrayku, ayllunmanta tataykoj sutin chinkapunman, chaytaj mana allinchu kanman. Chayrayku noqaykuman tataykoj wawqenkunaj jallp'anku ukhupi jallp'ata qowayku ari, nispa.

⁵ Chantá Moisesqa chay warmikunaj mañakusqankuta Tata Diosman willarqa.

⁶ Tata Diostaj payta nerqa:

⁷ Selofejadpa ususinkunaqa cheqanta parlanku. Qoy ari jallp'ata tatankoj wawqenkunaj jallp'anku ukhupi. Tatankoj chayaqen jallp'aqa paykunaman chayachun.

⁸ Jinallataj israelitakunata niy: Sichus mayqen, mana qhari wawata rejsispa, wañupunman chayqa, chayaqenta ususin jap'enqa.

⁹ Sichus ususinpis mana kanmanchu chayqa, wawqenkunaman chayaqenta saqepuchun.

¹⁰ Sichus wawqenpis manallataj kanmanchu chayqa, chayaqenta tatanpa wawqenkunaman saqepuchun.

¹¹ Sichus tatanpa wawqenpis manallataj kanmanchu chayqa, chayaqenta, mayqenchus manaraj karu ayllunchu kajman saqepuchun. Kay kamachisqayqa israelitakunapaj churasqa kanqa. Qanman kamachisusqayman jina ajinata ruwachunku, nispa.

Josué Moisespa cuentanmanta kamachinanpaj ajllasqa

¹² Tata Dios Moisesta nillarqataj: Wichariy Abarín orqoman, chaymantataj israelitakunaman qonay jallp'ata rikunki.

¹³ Chayta rikuytawantaj, wawqeyki Aarón jina wañupunki, ñawpa tataykikunawantaj tantakoj ripunki.

¹⁴ Zin ch'innejpi yakuta mañakuspa israelitakuna contrayta oqharikushajtinku, qankunaqa mana jatunchawarqankichejchu. Israelitakunaj ñawpaqenkupi qankuna kamachisqayta mana kasuwarqankichejchu, nispa. Chay yakoqa Zin ch'innejpi Meriba nisqa cheqapi kashan.

¹⁵ Chantá Moisés Tata Diosta nerqa:

¹⁶ Tukuyta Kamachej Tata Diosníy, tukuyman kawsayta qoj Dios, uj runata paykunallamantataj ajllaspa churay ari.

¹⁷ Chantá ñawpaqenkuta rispa, paykunata pusanqa, maymanchá rishanku chayman, ama qhatirpayasqa oveja jina mana michejniyoj purinankupaj, nispa.

¹⁸ Tata Diostaj kuticherqa: Nunpa churin Josueta wajyay, imaraykuchus payqa sumaj wakichisqa runa. Chantá umanman makiykita churay.

¹⁹ Jinaspataj, sacerdote Eleazarpa ñawpaqenman, jinallataj tukuy israelitakunaj ñawpaqenkuman ima pusay. Paykuna rikushajtinkutaj, Josueta cuentaykimanta kamachej kananpaj churay.

²⁰ Chantá payman kamachinanpaj atiyniykita qonki, tukuy israelitakuna qanta jina payta kasunankupaj.

²¹ Josueqa Urimnejta noqata tapunawanpaj Eleazar sacerdoteman qayllanqa. Chantá Josué kamachejtin, tukuy israelitakuna llojsenqanku, jinallataj kutimponqanku, nispa.

²² Chantá Moisés, Tata Diospa kamachisqanman jina, kikinta ruwarqa. Moisesqa Josueta sacerdote Eleazarman, jinallataj israelitakunaj ñawpaqenkuman pusarqa.

²³ Chaypitaj umanman makinta churaspa, cuentanmanta kamachej kananpaj churarqa, Tata Dios Moisesman nisqanman jina.