Números 26 - DIOSPA QHELQACHISQAN DEUTEROCANONICAL

Israelitakunata ujtawan yupanku

¹ Wañuchej onqoy pasayta, Tata Diosqa Moiseswan, chantá sacerdote Aaronpata churin Eleazarwan ima parlarqa:

² Israelitakunata sapa ayllupi, iskay chunka watayojmanta pataman yupaychej. Pikunachus maqanakoj rinankupaj jinaña kanku, chaykunata yupaychej, nispa.

³ Chantá Moab pampapi, Jordán mayu qayllapi, Jericó llajta chimpapi Moiseswan, Eleazarwan ima israelitakunata nerqanku:

⁴ Tukuy qharita iskay chunka watayojmanta pataman listaychej, imaynatachus Tata Dios Moisesman kamachisqanman jina, nispa. Egiptomanta llojsimoj israelitakuna kaykuna karqanku:

⁵ Israelpata kuraj kaj churin Rubén jatun ayllumanta karqanku: Enocpata ayllun, Falujpata,

⁶ Jesronpata, chantá Carmij ayllun ima.

⁷ Rubén jatun aylloqa tukuyninpi 43.730 qharikuna karqanku.

⁸ Falúj churenqa Eliab karqa.

⁹ Eliabpata churinkunataj karqanku: Nemuel, Datán, Abirán ima. Datanwan, Abiranwan ima ayllunkumanta kurajkuna kashaspapis, Corewan khuska Tata Diospa contranta oqharikorqanku. Jinallataj Moisespa, Aaronpa contrantawan ima oqharikullarqankutaj.

¹⁰ Chaypacha jallp'a kicharikuspa, iskayninkuta, chantá Coretawan ima oqoykorqa. Jinallataj Coreta qhatejkuna wañorqanku. 250 qharikuna ninaj ruphasqan wañorqanku. Ajina karqa wajkuna ama paykuna jina ruwanankupaj.

¹¹ Chay tukuywanpis Coréj churinkunaqa mana chay p'unchay wañorqankuchu.

¹² Simeón jatun ayllumanta mirajkuna kaykuna karqanku: Nemuelmanta mirajkuna, Jaminmanta, Jaquinmanta,

¹³ Zerajmanta, chantá Saulmanta mirajkuna ima.

¹⁴ Yupasqa kasqankuman jina, tukuyninpi 22.200 qharikuna karqanku.

¹⁵ Gad jatun ayllumanta mirajkunaqa kaykuna karqanku: Zefonmanta mirajkuna, Jaguimanta, Sunimanta,

¹⁶ Oznimanta, Erimanta,

¹⁷ Arodmanta, chantá Arelimantawan mirajkuna ima.

¹⁸ Yupasqa kasqankuman jina, tukuyninpi 40.500 qharikuna karqanku.

¹⁹ Judajpata churinkuna Erwan, chantá Onanwan ima karqanku. Paykunarí Canaanpi wañupusqanku.

²⁰ Ajinaqa, Judá jatun ayllumanta mirajkuna karqanku: Selamanta mirajkuna, Faresmanta, chantá Zerajmantawan mirajkuna ima.

²¹ Farespa churinkunamanta mirajkuna kaykuna karqanku: Jesronmanta, chantá Jamulmanta mirajkuna ima.

²² Yupasqa kasqankuman jina Judajpata mirayninpi 76.500 qharikuna karqanku.

²³ Isacar jatun ayllumanta mirajkunaqa kaykuna karqanku: Tolamanta mirajkuna, Fuvamanta,

²⁴ Jasubmanta, chantá Simeronmanta mirajkuna ima.

²⁵ Yupasqa kasqankuman jina Isacarpa mirayninmanta tukuyninpi 64.300 qharikuna karqanku.

²⁶ Zabulón jatun ayllumanta mirajkuna kaykuna karqanku: Seredmanta mirajkuna, Elonmanta, chantá Yajelelmanta mirajkuna ima.

²⁷ Zabulón jatun ayllumanta yupasqa kasqankuman jina, tukuyninpi 60.500 qharikuna karqanku.

²⁸ Joséj churinkunaqa Manaseswan, chantá Efrainwan ima karqanku.

²⁹ Manasés jatun ayllumanta mirajkunaqa kaykuna karqanku: Maquir, paymanta mirajkunataj maquiritakuna nisqa karqanku. Maquirpata churintaj Galaad karqa. Galaadmanta mirajkunataj galaaditakuna nisqa karqanku.

³⁰ Galaadpa churinkuna karqanku: Yézer, paymanta mirajkunataj yezeritakuna nisqa karqanku. Jelecmanta mirajkunataj jelequitakuna nisqa karqanku.

³¹ Asrielmanta mirajkuna asrielitakuna nisqa karqanku. Sichemmanta mirajkunataj sechenita nisqa karqanku.

³² Semidamanta mirajkuna semidaitakuna nisqa karqanku. Jefermanta mirajkunataj jeferitakuna nisqa karqanku.

³³ Jeferpata churin Selofejadpa churinkuna mana karqachu, ususinkunalla karqanku: Malá, Nogá, Joglá, Milca, Tirsa ima.

³⁴ Manasesmanta mirajkunaqa tukuyninpi 52.700 qharikuna karqanku.

³⁵ Efraín jatun ayllumanta mirajkunaqa kaykuna karqanku: Sutelaj miraynin, Bequerpata miraynin, chantá Tajanpata miraynin ima.

³⁶ Sutelaj miraynin karqa Eranpata ayllun.

³⁷ Tukuyninpi Efrainpata miraynenqa 32.500 karqanku. Chaykuna Joséj miraynin ayllunkuman jina karqanku.

³⁸ Benjamín jatun ayllumanta mirajkunaqa kaykuna karqanku: Belaj ayllun, Asbelpata, Ajiranpata,

³⁹ Sufanpata, chantá Jufanpata ayllunwan ima.

⁴⁰ Belaj miraynin karqanku: Ardpata ayllun, chantá Namanpatawan ayllun ima.

⁴¹ Yupasqa kasqankuman jina, Benjaminpa miraynenqa 45.600 qharikuna karqanku.

⁴² Dan jatun ayllumanta mirajqa Suján karqa, paymanta mirajkunataj sujanita nisqa karqanku.

⁴³ Sujanpata ayllunmanta tukuyninpi 64.400 qharikuna karqanku.

⁴⁴ Aser jatun ayllumanta mirajkuna kaykuna karqanku: Imnaj ayllun, Isúij ayllun, chantá Beriaj ayllun ima.

⁴⁵ Beriaj mirayninmanta Jeberpata miraynin, chantá Malquielpata miraynin ima karqanku.

⁴⁶ Aserpata ususin Será karqa.

⁴⁷ Aserpata miraynin tukuyninpi 53.400 qharikuna karqanku.

⁴⁸ Neftalí jatun ayllumanta mirajkunaqa kaykuna karqanku: Yajeselpata ayllun, Gunijta,

⁴⁹ Yezerpata, chantá Silenpata ayllun ima.

⁵⁰ Neftalíj mirayninmanta tukuyninpi 45.400 qharikuna karqanku.

⁵¹ Israelitakuna yupasqa kasqankuman jina, tukuyninpi 601.730 qharikuna karqanku.

Jallp'ata rak'inakunankupaj kamachisqakuna

⁵² Tata Dios Moisesta nillarqataj:

⁵³ Kay ayllukunaman, yupasqapi mashkhachus kasqankuman jina, jallp'ata rak'inki.

⁵⁴ Ashkha runayoj kajmanqa jallp'ata jatunta qonki, pisi runayoj kajmantaj juch'uyllata. Ajinata mashkhachus yupasqa kasqankuman jina, sapa ujninkuman jallp'ata qonki.

⁵⁵ Jallp'ataqa suerteta choqaspa, rak'inki. Sapa jatun ayllu tatanpa sutinman jina jallp'ata jap'enqa.

⁵⁶ Ashkhapis kachunku, chayrí pisipis kachunku, jallp'ataqa suerteta choqaspa, rak'inki.

Levitakuna yupasqa kanku

⁵⁷ Levitakunaqa ayllunkuman jina yupasqa karqanku: Gersonpata ayllun, Coatpata ayllun, chantá Merarij ayllun ima.

⁵⁸ Levitakunaj miraynintaj karqanku: Libnij ayllun, Hebronpata, Malijta, Musijta, chantá Corejta ayllun ima. Amiranpa tatan Coat karqa.

⁵⁹ Amiranqa Levíj ususin Jocabedwan casarasqa. Jocabed ususenqa Leví, Egiptopi kashajtillanraj paqarisqa. Amiranwan, Jocabedwan imaqa Aaronpata, Moisespata, chantá Mariajtawan tatanku karqa.

⁶⁰ Aaronpata churinkuna karqanku: Nadab, Abiú, Eleazar, chantá Itamar ima.

⁶¹ Nadabwan, Abiuwan imaqa Tata Diospa ñawpaqenpi wañusqanku, mana Tata Diospa kamachisqanman jinachu inciensota q'oshñichisqankurayku.

⁶² Yupasqa kasqankuman jina, Levíj miraynenqa tukuyninpi uj killayojmanta pataman, 23.000 qharikuna karqanku. Paykunaqa mana israelitakunawan khuskachu yupasqa karqanku, imaraykuchus paykunaqa jallp'ata mana jap'inankuchu karqa.

⁶³ Ajinata Moiseswan, sacerdote Eleazarwan ima israelitakunata Moab pampapi, Jordán mayu qayllapi, Jericó llajta chimpapi yuparqanku.

⁶⁴ Israelitakuna yupasqa karqanku chaykunapeqa mana ujpis karqachu Moiseswan, sacerdote Aaronwan ima Sinaí orqopi yuparqanku, chaykunamanta.

⁶⁵ Tata Dios paykunaman nisqa: Ch'innejpi wañunkichej, nispa. Chayrayku paykunamanta mana ujpis kawsashaj karqañachu. Yefunej churin Calebwan, Nunpata churin Josuellawan mana wañorqankuchu.