Números 25 - DIOSPA QHELQACHISQAN DEUTEROCANONICAL

Israelitakuna Baal Pegor lantita yupaychanku

¹ Israelitakuna Sitinpi tiyakushajtinku, wakin qharikuna Moabmanta warmikunawan khuchichakuyta qallarerqanku.

² Chay warmikunaqa lantinkuman uywa ñak'asqata jaywana raymiman israelitakunata wajyarqanku. Israelitakunataj moabitakunaj lantinkoj sutinpi wayk'usqa mikhunata mikhuysikorqanku, paykunaj diosninkutataj yupaycharqanku.

³ Ajinata israelitakunaqa Baal Pegor sutiyoj lantita yupaychanaman apachikorqanku. Chayrayku Tata Diosqa israelitakunapaj maytapuni phiñakorqa.

⁴ Chantá Tata Dios Moisesta nerqa: Israelitakunaj tukuy kurajninkuta jap'ispa, noqaj ñawpaqeypi sut'i p'unchaypi sipiy. Ajinallamanta israelitakunaj contrankupi k'araj phiñakuyniy tiyaykonqa, nispa.

⁵ Chantá Moisés israelitakunaj juezninkukunata nerqa: Sapa ujniykichej jatun aylluykichej ukhupi pikunachus Baal Pegor lantita yupaycharqanku, chaykunata wañuchiychej, nispa.

⁶ Chaypachapuni uj israelita, Moisespa rikunanta, chantá tukuy israelitakunaj rikunankuta, Madián llajtayoj uj warmita jaraman pusaykorqa. Moiseswan, israelitakunawan imataj Dioswan Tinkukuna Toldo punkupi waqasharqanku.

⁷ Chayta rikuspa, sacerdote Aaronpa allchhin, Eleazarpata churin Finés, maypichus israelitakuna tantasqa kasharqanku, chaymanta llojserqa. Chantá lanzanta oqharikuspa,

⁸ chay runaj qhepanta rerqa. Toldonman yaykuspataj, israelitata, jinataj madianmanta warmitawan wijsankupi t'ojsispa, wañucherqa. Ajinata ruwasqanrayku, israelitakunata wañuchej onqoy sayarqa.

⁹ Chaykamaqa 24.000 israelitakunaña chay onqoywan wañusqanku.

¹⁰ Chantá Tata Dios Moisesta nerqa:

¹¹ Israelitakunaj contrankuta phiñakusqayta Eleazarpa churin Finés tiyaykuchin, imaraykuchus noqajta jinallataj paypa sonqonpis chay juchamanta t'impurerqa. Chayrayku israelitakunaj contrankuta sinch'ita phiñakushaspapis, mana paykunata tukucherqanichu.

¹² Finesta niy ari, noqa paywan k'achata kawsakunapaj uj tratota ruwasqayta.

¹³ Chayrayku payman, jinataj mirayninmanpis sacerdote kanankuta wiñaypaj qoni. Chayta ruwani imaraykuchus payqa Diosninmanta sienterqa, israelitakunaj juchallisqanku pampachasqa kanantataj tarerqa, nispa.

¹⁴ Madián llajtayoj warmiwan khuska wañuchisqa karqa, chay israelitaj sutin Zimri karqa. Payqa Saluj churin karqa, Simeón jatun ayllumanta kuraj kajtaj.

¹⁵ Madianmanta warmej sutintaj Cozbi karqa. Payqa madianitakunaj kurajninku Surpata ususin karqa.

¹⁶ Chantá Tata Dios Moisesta nillarqataj:

¹⁷ Madianitakunaj contrankuta maqanakoj rispa, wañuchimuychej.

¹⁸ Paykunaqa tukuy imaymanamanta q'otiyaspa, Baal Pegor lantinkuta yupaychanaman aysasorqachej. Madianitakunaj kurajninkoj ususin Cozbitaj millayta purinaman apasorqachej. Payqa lanzawan wañuchisqa karqa, maypachachus onqoyta apachimorqaykichej, chaypacha, nispa.