Números 24 - DIOSPA QHELQACHISQAN DEUTEROCANONICAL

¹ Balaam israelitakunata saminchana Tata Diosman allin rijch'asqanta repararqa. Chayrayku manaña ñawpaj kutipi, chantá iskay kutipi jina Tata Diosta tapoj rerqachu. Manachayqa ch'innejta qhawarerqa.

² Chantá Balaam israelitakunata jatun aylluman jina jarasqata rikorqa. Diospa espirituntaj payman jamorqa.

³ Chaymantá Balaamqa ajinata sut'incharqa: Beorpata churin Balaam, Tata Diospa munasqanta sumajta yachaj ajinata nini.

⁴ Tukuy Atiyniyoj Diospa sutinpi parlani. Noqaqa pay imatachus munasqanta yachani, imaraykuchus paypa ñawpaqenpi karqani.

⁵ Jacob, chay jina k'achitu jaraykeqa. Israelitakuna, chay jina k'achitu toldoykichejqa.

⁶ Palma sach'a sinrulla kashajman rijch'akun, mayu kantupi huertapis kashanman jina. Tata Diospa mallkisqan áloe sach'apis kanman jina, yaku kantupi cedro sach'a jina kashan.

⁷ Israelqa ashkha yakuyoj kanqa. Ujyanankupaj, tarpusqankutapis qarpanankupaj jina kanqa. Israelpa kuraj kamachejnenqa kamachej Agagmantapis astawan atiyniyoj kanqa, atiynintaj may jina uyarisqa.

⁸ Diosqa israelitakunata Egiptomanta orqhomorqa. Diosqa paykunapaj k'ita toro jina manchay kallparara. Diosqa paywan churanakoj suyukunata mikhukaponqa. Tullunkuta p'akiran, arcowan flechaspataj paykunata t'ojsenqa.

⁹ Israel león jina awaytarin, china león jina winkurin. Pitaj sayarichej qayllaykunmanri? Israelitakunata saminchajkuna saminchasqallataj kachunku. Maldicejkunataj maldicisqallataj kachunku, nispa.

Balaam nin imachus kananta

¹⁰ Chayta Balac uyarispa, Balaampaj maytapuni phiñarikorqa. Makinta laq'arikuspataj, nerqa: Noqaqa awqayta maldicinaykipaj pusachimorqayki. Qantajrí kinsa kutitaña paykunata saminchanki.

¹¹ Kunanpacha llajtaykiman ripuy. Noqa nerqayki qhapajyachisunayta. Tata Diostajrí qhapajyanaykita mana munanchu, nispa.

¹² Chantá Balaam kuticherqa: Noqaqa kachaykikunaman sut'inta nerqaniña:

¹³ Balac kamachinan wasi junt'atapis qorita, qolqeta qowachun, manapuni noqaqa Tata Diospa kamachiwasqanta p'akisajchu. Chayrayku noqaqa mana atinichu allin kajta, nitaj mana allin kajtapis noqallamanta ruwayta. Noqaqa Tata Dios imatachá kamachiwanqa, chayllata ruwasaj, nispa.

¹⁴ Jinaqa, llajtayman kutipusaj. Manaraj ripushasparí, qhepanejman israelitakuna runaykikunata imatachus ruwanankuta willasqayki.

¹⁵ Chantá Balaam ajinata sut'incharqa: Beorpata churin Balaam ajinata nini: Kay jina willayta sumaj sut'ita uyarerqani.

¹⁶ Diospa parlasqanta uyarerqani. Yachasqayqa Patapi Kaj Diosmanta jamun, sut'ipi jina rikusqaytataj Tukuy Atiyniyoj Diosmanta jap'ini.

¹⁷ Imachus qhepanejman kanqa chayta rikuni, chaytaj manaraj junt'akunrajchu. Jacobpa mirayninmanta uj ch'aska rikhurimonqa, Israel ukhumanta uj kamachej jatarenqa. Paymin Moabta atipaykonqa, Setpata miraynintapis tukuyninta chinkachenqa.

¹⁸ Edomta jap'enqa, jinallataj Seirtapis. Israeltaj t'ukunapaj jina jatuchaj imakunata ruwanqa.

¹⁹ Jacobpa mirayninmanta uj atipaj rikhurenqa, llajtapi qhepakojkunatataj chinkachenqa, nispa.

²⁰ Chaymanta Balaamqa amalecitakunata qhawarispa, kay jinata nillarqataj: Amalecqa manchay atiyniyoj suyu karqa, tukuy suyumanta nisqa astawan atiyniyoj. Chay tukuywanpis tukuynin chinkachisqa kanqa, nispa.

²¹ Chaymanta quenitakunata qhawarispataj, Balaam kay jinata nerqa: Qankunaj tiyakunaykichejqa sumaj sinch'i, Thapaykichejpis chhankapi ruwasqa kashan. Chaywanpis thapaykichejqa ruphaykuchisqa kanqa.

²² Quenitakunaqa wijch'usqa kankichej, Asiriamanta kajkunataj wata runaman tukuchisonqachej, nispa.

²³ Chaymanta Balaamqa kay jinatañataj sut'incharqa: Ay, pitaj kawsanman kay imakunata Dios ruwashajtinri?

²⁴ Chipremanta barcokuna jamonqanku. Asiriata, Ebertawan raqayllata saqenqanku. Chaywanpis paykuna wiñaypaj chinkachisqallataj kanqanku.

²⁵ Ajinata niytawan, Balaamqa chaymanta ripuspa, llajtanman kutiporqa. Balacpis ripullarqataj.