Números 21 - DIOSPA QHELQACHISQAN DEUTEROCANONICAL

Jormá suyuta israelitakuna jap'inku

¹ Néguev jap'iypi tiyakoj, Canaanmanta Arad llajtata kuraj kamachej uyarerqa, Atarinman rej ñannejta israelitakuna jamushasqankuta. Chantá chay kuraj kamachejqa israelitakunawan maqanakoj llojsispa, wakinta jap'erqa.

² Chaymanta israelitakunaqa tiluspa, Tata Diosta nerqanku: Sichus qan Tata Dios, kay runakunata atipayta yanapawasqayku chayqa, noqayku tukuy llajtankukunata thuñispa, chinkachisqayku, nispa.

³ Tata Diostaj israelitakuna imatachus mañakusqankuta uyarispa, cananeokunata atipaykuyta yanaparqa. Israelitakunataj cananeokunata tukuyninta wañucherqanku, llajtankukunatapis thuñiykorqanku. Chayrayku chay cheqata “Jormá”, nispa suticharqanku.

Broncemanta ruwasqa katari

⁴ Chay qhepata israelitakunaqa Hor nisqa orqomanta Puka Mama Qochanejman purirerqanku, Edom suyuta muyurinankupaj. Ñanta rishajtinkutaj, israelitakunaj paciencianku tukukorqa.

⁵ Chayrayku Diospa contranta, chantá Moisespa contrantawan ima rimayta qallarerqanku: Imapajtaj Egiptomanta orqhomuwarqaykuri? Kay ch'innejpi wañuchinawaykupajchu pusamuwarqayku? Kaypi mana mikhuna nitaj yaku ujyanapaj kanchu. Kay manakaj mikhunawan amisqaña kashayku, nispa.

⁶ Ajinata rimasqankurayku Tata Diosqa israelitakunata khaninanpaj nina katarikunata kachaykorqa. Jinaqa ashkha israelitakuna katarej khanisqan wañorqanku.

⁷ Chantá israelitakuna, Moisés kasharqa chayman rispa, nerqanku: Tata Diospa contranta, chantá qanpa contraykitawan ima rimaspa, juchalliyku. Ama jinachu kay, Tata Diosmanta mañapuwayku ari, kay katarikunata noqaykumanta chinkachinanta, nispa. Ajinaqa Moisés Tata Diosmanta mañakorqa israelitakunaj juchallisqankuta pampachananta.

⁸ Chantá Tata Dios Moisesta nerqa: Kay nina katariman rijch'akojta broncemanta ruwaspa, wiphalata sayachina k'aspiman warkhuykuy. Tukuy pichus katariwan khanichikojqa, warkhusqa katarita qhawachun, chantá mana wañonqachu, nispa.

⁹ Ajinaqa Moisés broncemanta katarita ruwaspa, wiphalata sayachina k'aspiman warkhuykorqa. Maypachachus katari pitapis khanejtin, broncemanta ruwasqa katarita qhawaj karqa chayqa, chay runa mana wañojchu.

Israelitakuna Moab suyuta muyurinku

¹⁰ Chaymanta israelitakuna puririspa, Obot sutiyoj cheqapi jarakorqanku.

¹¹ Chaymanta puririspataj, Iyé Abarinpi jarakorqanku, Moab suyumanta inti llojsimuynej ch'innejpi.

¹² Chaymanta puririspataj, Zered wayq'opi jarakorqanku.

¹³ Chaymanta rispataj, Arnón mayu chimpapi jarakorqanku. Chay mayoqa ch'innejpi kashan, amorreokunaj jap'iyninkumantapacha jamushan. Chay mayu Moab suyuta, chantá amorreokunaj suyunkutawan t'aqashan.

¹⁴ Chaymanta Tata Diospa maqanakusqanmanta willaj qhelqapi nin: Sufá jap'iynejpi, Vaheb llajtanejta rerqayku, Arnón mayunejta.

¹⁵ Jinallataj Moab suyoj mojonninpi kashaj, Ar jap'iynejkama chayaj wayq'onejta muyurerqayku, nispa.

¹⁶ Chaymanta israelitakunaqa Arnón mayumanta puririspa, Berkama chayarqanku. Chay pujyupi Tata Dios Moisesta nisqa: Israelitakunata tantay, noqataj yakuta qosqaykichej, nispa.

¹⁷ Chaypacha israelitakunaqa kay jinata takerqanku: Pujyumanta yaku phullchimuchun. Noqaykutaj takipusqayku.

¹⁸ Kamachejkuna kamachina varankuwan allarqanku. Sumachaj kurajkunataj varankuwan kicharerqanku, nispa. Chantá israelitakunaqa ch'innejmanta Matanaman rerqanku.

¹⁹ Matanamantataj Najalielman purirerqanku, chaymantataj Bamotman.

²⁰ Bamotmantataj Moab suyupi valleman purirerqanku. Chay valleqa Pisga orqoman wicharinapi kashan. Chay orqomantataj ch'innej rikukun.

Israelitakuna kuraj kamachej Sijonta atipanku

²¹ Chantá israelitakunaqa amorreokunata kuraj kamachej Sijonman kachakunata kacharqanku, ajinata ninankupaj:

²² Ama jina kaspa jallp'aykinejta pasarichiwayku ari. Mana chajraykichejta, nitaj uva huertaykichejtapis sarusqaykuchu. Nillataj pujyuykichejmanta yakutapis ujyasqaykuchu. Noqaykoqa jatun ñannillanta jallp'aykinejta pasasqayku, nispa.

²³ Sijontajrí mana munarqachu israelitakuna jallp'annejta chimpanankuta. Manachayqa tukuy soldadonkunata tantaykuspa, israelitakunawan maqanakoj ch'innejman llojserqa. Yahás llajtaman chayaspataj, israelitakunawan maqanakoj yaykorqankupacha.

²⁴ Israelitakunatajrí Sijonta atipaykuspa, tukuy jap'iyninta jap'erqanku. Arnón mayumantapacha Jaboc mayukama, jinataj Amón suyoj jap'iyninkama jap'erqanku. Amón suyoj jap'iyninrí soldadokunawan allin jark'asqa karqa.

²⁵ Israelitakunaqa amorreokunamanta tukuy llajtata qhechuspa jap'erqanku, Jesbón llajtata, chantá muyuyninpi kaj juch'uy llajtakunatawan. Chaykunapitaj tiyakorqanku.

²⁶ Jesbón llajtaqa amorreokunaj kuraj kamachejninku Sijonpa kamachinan llajta karqa. Kamachej Sijontaj Moab suyuta ñawpa kuraj kamachejta maqanakupi atipaykuspa, Arnón mayumantapacha jap'iyninta qhechuykusqa.

²⁷ Chayrayku yarawikukuna ninku: Jamuychej Jesbonman, kamachej Sijonpa llajtanman. Watej sayarichispa, sumaj perqawan muyuykuchiychej.

²⁸ Jesbonmanta nina llojsimun. Sijonpa llajtanmanta nina lawray llojsimuspa, Moab suyupi, Ar llajtata ruphaykorqa. Arnón orqonejpi tiyakojkunatapis ruphaykullarqataj.

²⁹ Ay, qanmanta Moab. Quemospa lantinta yupaychajkuna chinkachisqa kankichej. Quemos diosniykeqa qhari wawaykikunata, ayqekojkunaman tukuchin. Warmi wawaykikunatataj amorreokunata kuraj kamachej Sijonwan jap'ichin.

³⁰ Jesbonmantapacha Dibonkama atipaykuspa, paykunata chinkacherqanchej. Nofakama llajtankunata raqayman tukucherqanchej, Medebakamataj phirerqanchej, nispa.

Israelitakuna kuraj kamachej Ogta atipanku

³¹ Ajinata israelitakuna amorreokunaj jap'iyninkuta jap'erqanku.

³² Chay jawa Moisesqa wakinta kacharqa, Jazer llajtata qhawamoj rinankupaj. Chantá israelitakuna chay llajtakunata jap'illarqankutaj, chaynejpi tiyakoj amorreokunatapis wijch'orqanku.

³³ Chaymanta israelitakunaqa Basanman rej ñanninta kutimorqanku. Basán suyuta kuraj kamachej Ogtajrí tukuy soldadonkunawan jamuspa, Edrey llajta chaynejpi paykunawan maqanakorqa.

³⁴ Chantá Tata Dios Moisesta nerqa: Ama manchachikuychu. Chay kuraj kamachejta, soldadonkunantinta, chantá tukuy suyuntinta ima makiykiman jaywaykusaj. Qantaj Jesbonpi tiyakoj amorreokunaj kuraj kamachejninku Sijonta imaynatachus ruwarqanki, ajinallatataj Ogwan ruwanki, nispa.

³⁵ Ajinata israelitakunaqa kuraj kamachej Ogta, churinkunata, chantá tukuy soldadonkunata ima wañucherqanku. Mana ujtapis kawsashajta saqerqankuchu, suyunkutataj jap'ikaporqanku.