Números 20 - DIOSPA QHELQACHISQAN DEUTEROCANONICAL

Chhankamanta yaku phullchimun

¹ Wata qallariy killapi israelitakunaqa Zin ch'innejman chayarqanku Cadespitaj jarakorqanku. Chaypi María wañuporqa, chay kikinpitaj payta p'amparqanku.

² Chaypi mana yaku kasqanrayku, israelitakuna tantakuspa, Moisespa, chantá Aaronpa contranta ima oqharikorqanku.

³ Chantá Moisespaj rimaspa, nerqanku: Wakin israelitakuna masiyku wañushajtinku, noqaykupis paykunawan khuska wañunayku allin kanman karqa.

⁴ Imapajtaj Tata Diospa ayllunta kay ch'innejman pusamunkichejri? Uywaykuwan khuskachu kaypi wañunaykuta munankichej?

⁵ Imapajtaj kay jina millayman pusamunawaykupaj Egiptomanta orqhomuwarqaykuri? Kaypeqa mana imatapis tarpuyta atiykuchu. Mana kanchu higo sach'a, uva sach'a, nitaj granadapis. Ni yakullapis ujyanapaj kanchu, nispa.

⁶ Chantá Moiseswan, Aaronwan ima israelitakunamanta ithirispa, Dioswan Tinkukuna Toldo punkuman rerqanku. Chaypitaj qonqorikuspa, pampakama k'umuykorqanku. Chantá Tata Diospa jatun kayninpa lliphipiynin rikhurimorqa.

⁷ Tata Diostaj Moisesta nerqa:

⁸ Varaykita oqharispa, qanwan, chantá Aaronwan ima israelitakunata tantaychej. Jinaspataj, paykuna rikushajtinku, chhankata kamachiy yaku llojsimunanpaj. Chantá chhankamanta yaku phullchimojtin, israelitakuna, jinataj uywankupis yakuta ujyanqanku, nispa.

⁹ Chantá Moisés Tata Diospa ñawpaqenpi kasharqa, chay varata oqharispa, Diospa nisqanman jina ruwarqa.

¹⁰ Chaymantataj Moiseswan, Aaronwan ima chhanka k'uchuman runakunata tantarqanku. Chantá Moisés runakunata nerqa: Uyariychej, mana kasukuyta munajkuna. Kay chhankamantachu ujyanaykichejpaj yakuta orqhosqayku? nispa.

¹¹ Chayta niytawan, Moisés varanta oqharispa, iskay kutita chhankata wajtarqa, ashkha yakutaj phullchimorqa. Ajinamanta runakuna, uywakuna ima ujyanankupaj yaku karqa.

¹² Chaywanpis Tata Dios Moisesta, Aarontawan ima nerqa: Qankuna noqapi mana atinikorqankichejchu, nitaj israelitakuna rikushajtinku jatunchawarqankichejchu. Chayrayku mana qankunachu qonayta nerqani, chay jallp'aman kay runakunata pusaykunkichej, nispa.

¹³ Chayrayku chay juturita “Meriba”, nispa suticharqanku. Meriba suti niyta munan “phiñanakuy”. Ajinata israelitakuna chaypi Tata Dioswan churanakusqankurayku chay sutiwan suticharqanku. Chaypitaj Tata Dios may llimphu kasqanta rikucherqa.

Edom suyuta kamachej israelitakunata sayachin

¹⁴ Cadesmantapacha Moisesqa Edom suyuta kuraj kamachejman kachakunata kacharqa, ajinata nichispa: Yawar masiyki israelitakuna nisunku: Qan allinta yachanki ñanta jamushajtiyku, imachus qhatiriwasqaykuta.

¹⁵ Ñawpa tataykukuna Egiptoman riporqanku, chaypitaj unayta tiyakorqanku. Egipto llajtayojkunatajrí noqaykuta, ñawpa tataykuta jina, mayta ñak'arichiwarqayku.

¹⁶ Chantá Tata Dios yanaparinawaykuta mañarikorqayku. Paytaj mañakusqaykuta uyarispa, Egiptomanta orqhonawaykupaj angelninta kachamorqa. Kunanqa jallp'aykiwan tinkuypi, Cades llajtapi kashayku.

¹⁷ Chayrayku nirikusuyta munayku jallp'aykinejta pasarichinawaykuta. Noqaykoqa mana chajra chawpintachu, nitaj uva huertayki chawpintachu pasasqayku, nillataj yakuykitapis ujyasqaykuchu. Noqaykoqa jallp'aykita pasanaykukama mana lloq'eman nitaj pañanejman pantaspa, jatun ñanninta risqayku, nispa.

¹⁸ Edom suyuta kuraj kamachejtajrí kuticherqa: Jallp'aynejta mana pasankichejchu. Sichus mana uyarikuspa pasaytapuni munankichej chayqa, soldadoykunawan maqanakoj llojsimusaj, nispa.

¹⁹ Israelitakunataj kuticherqanku: Noqaykoqa jatun ñannillanta pasasqayku. Sichus noqayku, chayrí uywayku yakuykichejta ujyaykuman chayqa, pagapusqayku. Noqaykoqa jallp'aykita pasayllata munayku, nispa.

²⁰ Chaywanpis Edom suyuta kuraj kamachej kuticherqa: Qankunaqa manapuni kayninta pasankichejchu, nispa. Chaymantataj payqa israelitakunawan maqanakoj ashkha sumaj armasqa soldadokunawan llojserqa.

²¹ Jinataj Edom suyuta kamachej jallp'annejta manapuni pasanankuta munajtin, israelitakunaqa waj ñannejta riporqanku.

Aarón wañupun

²² Tukuy israelitakuna Cadesmanta puririspa, Hor nisqa orqonejman chayarqanku.

²³ Chantá Edom suyoj jap'iyninpa mojonnin chaynejpi, Hor nisqa orqonejpi kashajtinku, Tata Diosqa Moisesta, chantá Aaronta ima nerqa:

²⁴ Aarón kaypi wañuponqa. Israelitakunaman jallp'ata qosaj, chayman mana yaykonqachu, imaraykuchus qankunaqa Meriba nisqa juturi kantupi kashaspa, kamachisqayta mana kasuwarqankichejchu.

²⁵ Ajinaqa Aaronta, churin Eleazartawan ima Hor nisqa orqo pataman pusay.

²⁶ Chantá chaypi Aaronmanta sacerdote p'achanta lluch'uspa, chaywan Eleazarta p'achallichinki. Aarontaj chaypi wañuponqa, nispa.

²⁷ Moisestaj Tata Dios payman kamachisqanman jina, ruwarqa. Tukuy israelitakuna rikushajtinku, Hor nisqa orqoman wicharerqanku.

²⁸ Chantá chaypi Moisesqa Aaronmanta sacerdote p'achanta lluch'uspa, churin Eleazarman churaykorqa. Jinapi Aaronqa Hor nisqa orqopi wañuporqa. Chaymantataj Moiseswan, Eleazarwan ima chay orqomanta urayk'amorqanku.

²⁹ Israelitakuna Aarón wañupusqanta yachaspataj, uj killata waqarqanku.