Números 15 - DIOSPA QHELQACHISQAN DEUTEROCANONICAL

Diosman jaywanamanta kamachisqakuna

¹ Tata Dios Moisesta nillarqataj:

² Israelitakunata niy: Noqa qosqaykichej, chay jallp'aman tiyakoj yaykuspaqa,

³ Tata Diosman ima munayta q'apashaj jaywanata jaywankichej. Chay jaywanakunaqa kaykuna kayta atinman: Uywa ñak'asqata q'olachispa jaywana, nisqaykichejta junt'aspa jaywana, chayrí sonqomanta munaspa jaywana, chayrí jatuchaj raymikunapi jaywana ima. Chay jaywanakunata jaywanaykichejpaj wakaykichejmanta, ovejaykichejmanta chayrí cabraykichejmanta jap'ispa apamunkichej.

⁴ Tata Diosman jaywanaykichejpaj apamuspaqa, apamunallaykichejtaj tiyan, iskay kilo sumaj jak'uta, uj litro aceitewan puñasqata.

⁵ Chay jawa, q'olachispa Diosman jaywanapaj, sapa corderopaj uj litro vinotawan apamunallaykichejtaj tiyan.

⁶ Sichus uj carnerota apamunkichej chayqa, chayman tawa kilo sumaj jak'uta yapaspa, uj litro kuraj aceitewan puñankichej.

⁷ Jaywawasqaykichejpa patanman jich'anapajtaj, uj litro kurajta vinotawan apamunkichej. Chayqa Tata Diospaj ima munayta q'apashaj jaywana kanqa.

⁸ Sichus q'olachispa Tata Diosman jaywanapaj, chayrí k'achata kawsakuy jaywanata, chayrí imata nisqaykichejta junt'anapaj uj torillota apamunkichej chayqa,

⁹ chayman sojta kilo sumaj jak'uta, uj litro kuraj aceitewan puñasqata yapankichej.

¹⁰ Jinallataj chay jaywanaman, iskay litro vinotawan apamullawankichejtaj. Chaykunaqa Tata Diospaj ima munayta q'apashaj jaywana kanqa.

¹¹ Ajinata sapa torillowan, sapa carnerowan, sapa corderowan, chayrí sapa cabrawan ruwankichej.

¹² Sapa uywata jaywawaspaqa, ajinata ruwankichej, mashkha uywachus kasqanman jina jaywanapaj.

¹³ Tukuy israelitakuna ima munayta q'apashaj noqapaj jaywanata jaywawaspa, kay kamachisqayman jina ruwanaykichej tiyan.

¹⁴ Sichus waj llajtayoj qankunaman chayakamoj, chayrí qankunawan unaytaña tiyakoj, q'olachispa ima munayta q'apashaj noqapaj jaywanata apamuwayta munan chayqa, qankuna jina kikillantataj ruwanqa.

¹⁵ Qankuna, jinallataj qankunawan tiyakoj waj llajtayojkunapis kay kamachisqaman jina ruwankichej. Kay kamachisqaqa qankunapaj, chantá mirayniykichejpaj ima wiñaypaj kanqa. Noqaj ñawpaqeypeqa qankuna, jinataj waj llajtayojkunapis uj rejlla kankichej.

¹⁶ Ajinaqa qankunapaj, jinallataj qankunawan tiyakoj karu llajtayojkunapajpis kamachisqakunaqa tukuypaj uj rejlla kanqa, nispa.

¹⁷ Tata Dios Moisesta nillarqataj:

¹⁸ Israelitakunata niy: Pusashaykichej, chay jallp'aman tiyakoj yaykuspa,

¹⁹ maypachachus chay jallp'api poqojta mikhuyta qallarinkichej chayqa, noqaman jaywanawaykichejpaj wakinta t'aqankichej.

²⁰ Imaynatachus ñawpajta oqharisqaykichej trigomanta t'aqaspa, jaywawankichej, ajinallataj ñawpajta ruwasqaykichej t'antamantapis jawawankichej.

²¹ Ajinata wiñaypaj ñawpaj kaj jak'usqa jak'umanta noqaman jaywallawankichejpuni.

²² Sichus qonqarparispa, noqa Tata Dios Moisesnejta qankunaman qosusqay kamachisqakunata mana junt'awajchejchu chayqa,

²³ jinallataj qhepaman qanwan, wawaykichejkuna ima, Moisesnejta noqaj tukuy kamachisqayta mana junt'awajchejchu,

²⁴ sitajchus tukuy israelitakuna mana yuyasqallamanta juchallikuwajchej chayqa, noqaj kamachisqayman jina, uj torillota jaywawankichej, q'olachispa ima munayta q'apashaj jaywanata jina. Chaytawan khuska ch'aki mikhuy jaywanata, vinotawan ima jaywawankichej. Chay jawa, jucha pampachasqa kananpaj, uj chivotawan jaywallawankichejtaj.

²⁵ Chaymanta sacerdote chay uywata israelitakunaj juchallisqanku pampachasqa kananpaj Tata Diosman jaywanqa. Juchallisqankutaj pampachasqa kanqa, imajtinchus mana yuyasqallamanta juchallerqanku. Noqataj mana yuyasqallamanta juchallikusqankuta pampachasaj, imajtinchus qankunaqa q'olachispa jaywanata, chantá jucha pampachasqa kananpaj jaywanatawan jaywawarqankichej.

²⁶ Noqa tukuy israelitakunaj, jinallataj paykunawan tiyakoj waj llajtayojkunaj juchallisqankuta pampachasaj, sichus mana yuyasqallamanta juchallinkuman chayqa.

²⁷ Sichus mayqellanpis mana yuyasqallamanta juchallinman chayqa, juchan pampachasqa kananpaj uj watayoj cabrata apamunan tiyan.

²⁸ Chay runa mana yuyasqallamanta juchallisqan pampachasqa kananpaj, sacerdoteqa cabrata jaywanqa, noqataj juchallisqanta pampachasaj.

²⁹ Mana yuyasqallamanta juchallej tukuy israelitakunapaj, jinallataj qankunawan tiyakoj waj llajtayojkunapajpis, chay kamachisqallapuni kanqa.

³⁰ Sichus mayqellanpis, israelitapis kachun, chayrí waj llajtayojpis kachun, yachashaspa juchallinman chayqa, noqata manakajpaj qhawawan. Chayrayku chay runaqa israelitakuna ukhumanta wijch'usqa kanqa.

³¹ Chay runaqa nisqayta pisipaj qhawarqa, kamachisqaytapis qhesacharqa. Chayrayku israelita ukhumanta wañuchisqa kanqa, juchantaj patanpi kanqa, nispa.

Samarina p'unchaypi mana samarej jasut'isqa

³² Israelitakuna ch'innejpi kashaspa, uj runata samarina p'unchaypi llant'ata pallashajta tariparqanku.

³³ Chantá pikunachus llant'ata pallakushajta taripajkunaqa chay runata Moisesman, Aaronman, chantá tukuy israelitakunaj ñawpaqenkuman ima pusarqanku.

³⁴ Paykunataj chay runata wisq'arqanku, imaraykuchus imatachus ruwanankuta mana yacharqankurajchu.

³⁵ Chaymanta Tata Diosqa Moisesta nerqa: Chay runaqa wañunan tiyan. Jaramanta jawaman orqhospa, tukuy israelitakuna payta rumiwan ch'anqachunku, nispa.

³⁶ Chantá israelitakuna chay runata jaramanta jawaman orqhospa, wañunankama rumiwan ch'anqaykorqanku, Tata Dios Moisesman kamachisqanman jina.

P'achaj kantunpi waych'ata churana

³⁷ Tata Dios Moisesta nillarqataj:

³⁸ Israelitakunata ajinata niy: Qankuna, jinataj wawaykichejkuna p'achaykichej kantunpi waych'ata churankichej. Waych'akunaqa anqa q'aytumanta ruwasqa kanqa.

³⁹ Chay waych'akunata qhawaspa, noqaj tukuy kamachisqayta kasunaykichejmanta yuyarikunkichej. Ajinata kamachisqayta junt'aspa, mana sonqoykichejpa munasqanwan, nitaj ñawiykichejpa rikusqanwan apachikunkichejchu, mana kasuwaspa purinaman aysachikunaykichejpaj.

⁴⁰ Ajinamanta tukuy kamachisqayta yuyarikuspa, junt'ankichej. Noqa Diosniykichejpajtaj t'aqasqa kankichej.

⁴¹ Noqamin Tata Diosniykichej kani. Noqa qankunaj Diosniykichej kanaypaj, Egiptomanta orqhomorqaykichej. Noqamin Tata Dios kani, nispa.