Números 14 - DIOSPA QHELQACHISQAN DEUTEROCANONICAL

Israelitakuna mana kasukunkuchu

¹ Chantá chayta uyarispa, israelitakunaqa waqaspa qhaparerqanku, mayta waqaspataj sut'iyarqanku.

² Chantá tukuy israelitakuna Moisespa, chantá Aaronpa contranta ima rimayta qallarerqanku: Walej kanman karqa Egiptopi wañunanchej, chayrí kay ch'inpi wañunanchejpis.

³ Imapajtaj Tata Dios kayman pusamuwarqanchejri? Maqanakupi wañunanchejpajchu? Warminchejkunata, wawanchejkunata ima awqanchejkuna jap'inankupajchu? Aswan allin kanman Egiptoman kutipunanchej, nispa.

⁴ Chantá ujkuna ujkuna ninakorqanku: Uj kamachejta churakuspa, Egiptoman kutipunachej, nispa.

⁵ Chantá Moiseswan, Aaronwan ima tukuy israelitakuna rikushajtinku, pampakama k'umuykorqanku.

⁶ Nunpata churin Josué, Yefunej churin Calebwan imataj llakikusqankuta rejsichispa, p'achankuta llik'irakorqanku. Paykunaqa jallp'ata qhawaj rejkunawan khuska rerqanku.

⁷ Jinaspataj, Josuewan, Calebwan ima tukuynin israelitakunata nerqanku: Qhawamorqayku, chay jallp'aqa manchay sumajpuni.

⁸ Tata Dioschus allinpaj qhawariwasun chayqa, chay jallp'aman pusawasun, qowasuntaj. Chay jallp'apeqa lechewan, abeja misk'iwan yaku jina purishan, chayrayku manchay sumaj jallp'a kashan.

⁹ Jinaqa ama Tata Diospa contranta oqharikuychejchu, amataj chay llajtayojkunamanta manchachikuychejchu. Paykunataqa manaraj imapi atipasun. Paykunamanta jark'akojqa mana pipis kanchu. Noqanchejwanrí Tata Dios kashan. Chaynejta ama manchachikuychejchu, nispa.

¹⁰ Chaywanpis israelitakunaqa Josueta Calebtawan ima rumiwan ch'anqaykunankupaj qhawasharqanku. Chantá tukuy israelitakunaj rikunankuta, Dioswan Tinkukuna Toldopi Tata Diospa jatun kayninpa lliphipiynin rikhurerqa.

¹¹ Chantá Tata Dios Moisesta nerqa: Mayk'ajkamataj kay runakuna noqata pisipaj qhawawanqankuri? Paykunaj rikunankuta t'ukuna imakunata ruwashajtiypis, mayk'ajkamataj mana noqapi atinikuyta munanqankuchuri?

¹² Noqa millay onqoyta kachaykuspa paykunata wañuchispa tukuchisaj, ama chay jallp'aman yaykunankupaj. Chaymantataj qanmanta uj jatun aylluta jatarichisaj paykunamanta aswan atiyniyojta, nispa.

¹³ Moisestajrí Tata Diosta nerqa: Tata Dios, qanmin israelitakunata atiyniykiwan Egiptomanta orqhomorqanki. Egipto llajtayojkunarí israelitakunata imatachus ruwasqaykita yachaspa,

¹⁴ Canaanpi tiyakojkunaman willanqanku. Paykuna yachanku qanqa israelitakunawan kashasqaykita. Yachallankutaj qan israelitakunawan uyapura parlasqaykita, phuyuykipis paykunaj patankupi kashasqanta. Yachallankutaj p'unchayqa israelitakunaj patankuta phuyupi risqaykita, tutantaj nina k'anchay ukhupi paykunata pusasqaykita.

¹⁵ Sichus ujllapi kay runakunata wañurachiwaj chayqa, manchay uyarisqa kasqaykita yachajkuna nenqanku:

¹⁶ Tata Dios qonanta nisqan jallp'aman israelitakunata mana pusayta atispa, ch'innejpi paykunata wañuchin, nispa.

¹⁷ Chayrayku Tata Dios, nisqaykiman jina jatun atiyniykita rikuchiy ari. Qanmin nerqanki:

¹⁸ Noqa Tata Diosqa mana usqhayllata phiñakojchu kani. Noqaj khuyakuyneyqa may jinamin. Noqaqa millayta ruwajta, mana kasukojtapis qhespichini chaypis, juchayojta mana qhawakullanichu. Aswanpis tatanku mamanku juchallisqankumanta, wawankuta, allchhinkuta, allchhinkoj wawankutapis jasut'ispa ñak'arichini, nispa.

¹⁹ Chayrayku Tata Diosníy, khuyakuyniyki mana tukukuyniyoj kasqanrayku, mañarikuyki kay runakunaj millay ruwasqankuta pampachanaykita. Qanqa, Egiptomantapacha kaykama juchankuta pampachaspa karqanki, nispa.

Tata Dios israelitakunata jasut'in

²⁰ Chantá Tata Dios Moisesta nillarqataj: Mañakuwasqaykiman jina, paykunaj juchallisqankuta pampachaniña.

²¹ Chay tukuywanpis noqa cheqapuni kawsaj Tata Dios kasqayrayku, manchay uyarisqa kasqaypis tukuy kay pachapi kasqanraykutaj nini:

²² Paykuna Egiptopi, jinataj ch'innejpi t'ukuna imakunata ruwasqayta, chantá jatun kayniypa lliphipiyninta rikorqanku. Chaywanpis ashkha kutitaña iskayrayaspa kamachisqayta mana kasuwayta munarqankuchu.

²³ Chayrayku paykunamanta ni mayqenninku, tatankuman qonayta nerqani, chay jallp'aman yaykonqankuchu. Noqata manakajpaj qhawawajkunamantaqa mana ujpis chay jallp'ata rikonqankuchu.

²⁴ Manachayqa kamachiy Caleblla yaykonqa. Payqa mana chay ujkuna jinachu kaspa, kamachisqayta kasuwarqa. Chayrayku payta qhawaj risqan jallp'aman pusaykusaj. Mirayninpis chay jallp'ata jap'enqanku.

²⁵ Vallepi amalecitakuna, chantá cananeokuna ima tiyakushanku. Chayrayku qankunaqa q'ayapacha Puka Mama Qochaman rej ñannejta ch'innejman kutiriychej, nispa.

²⁶ Chantá Tata Dios Moiseswan, chantá Aaronwan ima parlaspa, nillarqataj:

²⁷ Mayk'ajkamataj israelitakuna contraypi millayta rimasqankuta awantasajri? Paykuna noqaj contrayta rimasqankuta uyarini.

²⁸ Chayrayku paykunata niy: Noqa Tata Dios kawsayniyrayku tiluspa nini: Qankuna imatachus nisqaykichejta uyarisqayman jina ruwasaj.

²⁹ Tukuy iskay chunka watayojmanta pataman yupasqa kajkuna, pikunachus noqaj contrayta rimajkuna, kay ch'inpi wañonqanku, ayankutaj kaypi wijch'urayanqanku.

³⁰ Qankunamanta mana pipis, tiluspa qonayta nerqani, chay jallp'aman yaykunkichejchu. Chaymanqa Yefunej churin Caleblla, chantá Nunpata churin Josuellawan yaykonqanku.

³¹ Jinallataj pisipaj qhawasqaykichej wawaykichejkuna jallp'aman yaykonqanku. Qankuna nerqankichej paykunata awqaykichej jap'ispa, apakapunankuta. Chaywanpis paykuna chay jallp'api tiyakoj yaykonqanku.

³² Qankunaj ayaykichejrí kay ch'inpi wijch'usqa kanqanku.

³³ Chaykamataj wawaykichejqa tawa chunka watata mana llajtayoj jina kay ch'innejpi purenqanku. Ajinamanta paykuna ñak'arenqanku mana kasuwasqaykichejrayku tukuyniykichej kay ch'innejpi tukukunaykichejkama.

³⁴ Qankunaqa Canaán jallp'ata tawa chunka p'unchayta qhawaspa purerqankichej. Ajinallatataj tawa chunka watata, sapa p'unchaymanta uj watata, jasut'isqa kankichej. Ajinata qankunaqa contraypi oqharikuna qhasi manakaj kasqanta yachankichej.

³⁵ Noqa Tata Dios nini: Ajinata ruwasaj, noqaj contrayta oqharikoj millay sajra runakunata. Paykunaqa kay ch'innejpi tukukonqanku, chaypitaj wañonqanku, nispa.

Millay sonqoyoj kachasqakuna wañunku

³⁶ Jallp'ata qhawamunankupaj Moisés kacharqa, chaykuna kutimuspa, chay jallp'amanta mana allintachu parlarqanku, mana allintachu parlaspataj israelitakunata Tata Diospa contranta rimacherqanku.

³⁷ Chayrayku chay jallp'amanta mana allinta parlajkunaqa Tata Diospa ñawpaqenpi millay onqoywan wañorqanku.

³⁸ Jallp'ata qhawaj rejkunamanta Yefunej churin Calebwan, chantá Nunpata churin Josuewan imalla mana wañorqankuchu.

Israelitakuna Jormapi atipachikunku

³⁹ Moisés Tata Dios imatachus nisqanta israelitakunaman willajtin, tukuyninku maytapuni llakikorqanku.

⁴⁰ Chantá q'ayantin israelitakunaqa tutamanta jatarispa, aswan patanej orqoman wicharerqanku. Nerqankutaj: Diospa contranta juchallisqaykuta rimariyku. Chaywanpis kunan Tata Diospa qowasqanchej jallp'ata jap'ej rinaykupaj jina kashayku, nispa.

⁴¹ Moisestajrí paykunata nerqa: Imaraykutaj qankuna Tata Diospa kamachisqanta mana kasuyta munashankichejchuri? Kunan imatachus ruwayta yuyashankichej, chaypipis mana allinchu risonqachej.

⁴² Ama riychejchu, imajtinchus Tata Dios manamin qankunawanchu kashan, awqaykichejtaj atipasonqachej.

⁴³ Amalecitakunawan, cananeokunawan ima qankunawan maqanakunankupaj suyaykushasunkichej, paykunataj wañuchisonqachej. Tata Diosta qhatiyta qhesachasqaykichejrayku, payqa manaña qankunawanchu kashan, nispa.

⁴⁴ Chay jinata Moisés nishajtinpis, israelitakunaqa mana uyarikuspa, aswan patanej orqoman wicharillarqankupuni. Tata Diospa trato ruwasqan arca, chantá Moisés imarí, mana jaramanta kuyurerqankuchu.

⁴⁵ Chantá chay orqo kinraykunapi tiyakoj amalecitakuna, cananeokuna ima israelitakunawan maqanakoj llojsimorqanku. Israelitakunata atipaykuspataj, Jormakama qhatiykorqanku.