Números 12 - DIOSPA QHELQACHISQAN DEUTEROCANONICAL

Mariawan, Aaronwan Moisespaj rimanku

¹ Uj kuti Mariawan, Aaronwan ima Moisespa contranta rimarqanku, Etiopía llajtayoj warmiwan casarakusqanrayku.

² Chantá nillarqankutaj: Tata Diosqa mana payllawanchu parlan. Noqaykuwanpis parlallantaj, nispa. Tata Diostaj chayta uyarerqa.

³ Moisesqa tukuy kay pachapi runakunamanta nisqaqa aswan llamp'u sonqoyoj karqa.

⁴ Chayrayku Tata Diosqa Moisesta, Mariata, Aaronta ima nerqa: Dioswan Tinkukuna Toldoman kinsantiykichej riychej, nispa. Chantá kinsantinku rerqanku.

⁵ Chaymantataj Tata Diosqa phuyupi urayk'amuspa, Dioswan Tinkukuna Toldo punkupi sayarqa. Chantá Mariata, Aarontawan ima wajyarqa. Paykuna qayllaykojtinkutaj,

⁶ Tata Dios nerqa: Kay nisqayta allinta uyariwaychej: Qankuna ukhupi noqamanta sut'inchaj kajtenqa, noqa payman mosqoypi jina rikhurisaj, mosqoynejta ima parlasaj.

⁷ Kamachiy Moiseswanrí, mana jinatachu parlani, imajtinchus payqa tukuy kamachiykunamanta nisqaqa aswan kasukojmin.

⁸ Paywanqa uyapura sut'ita parlani, mana pakaypi jinachu. Paytaj rijch'ayniyta rikun. Jina chayqa, imaraykutaj paypa contranta rimayta, mana manchachikorqankichejchuri? nispa.

⁹ Chaymanta Tata Diosqa Aaronpaj, chantá Mariapaj ima maytapuni phiñakuspa, riporqa.

¹⁰ Chantá phuyu Dioswan Tinkukuna Toldomanta oqharikojtinkama, Mariaqa yurajpacha llejti onqoyniyoj rikhurerqa. Aarón Mariata qhawarispataj, llejti onqoyniyoj kashasqanta rikorqa.

¹¹ Chantá Moisesta nerqa: Ay, wiraqochíy, ama juchallisqaykurayku ñak'arichiwaykuchu ari. Noqaykoqa mana yuyayniyoj jina rimaspa juchalliyku.

¹² María ama kachunchu mamanpa wijsanpi wawa wañuspa, asnashaj paqarin jinaqa, nispa.

¹³ Chantá Moisesqa Tata Diosmanta mañaporqa: Tata Diosníy, mañarikuyki Mariata thañichipunaykita, nispa.

¹⁴ Tata Diostajrí Moisesta nerqa: Sichus Mariaj tatan uyanman thoqaykunman karqa chayqa, p'enqakuymanta qanchis p'unchayta pakakunman karqa. Chayrayku Mariata jaramanta jawaman qanchis p'unchayta wijch'uychej. Chaymantataj jaraman kutiykamonqa, nispa.

¹⁵ Ajinata Mariaqa qanchis p'unchayta jaramanta jawaman wijch'usqa karqa. Israelitakunataj María kutiykamunankama mana maymanpis purirerqankuchu.

¹⁶ María paykunaman kutiykamojtintaj, israelitakuna Jaserotmanta puririspa, Parán nisqa ch'innejpi jarakorqanku.