Números 11 - DIOSPA QHELQACHISQAN DEUTEROCANONICAL

Tata Dios israelitakunaman aychata qon

¹ Ujpacha israelitakuna llakiypi rikhurispa, Tata Diospa contranta thutuyta qallarerqanku. Tata Diostaj chayta uyarerqa. Chantá k'arajta phiñakuspataj, jaraj ujnin kantunta ninawan ruphaykucherqa.

² Chantá israelitakuna qhaparispa, Moisesta yanaparinanta nerqanku. Moisestaj paykunarayku Tata Diosmanta mañaporqa, ninataj wañorqa.

³ Chayrayku chay cheqata “Tabera”, nispa suticharqanku, chay cheqapi Tata Diospa kachaykamusqan nina paykunaj contrankuta lawraykusqanrayku.

⁴ Chaypacha israelitakuna ukhupi imaymana waj llajtayoj runakuna karqanku. Paykunaqa awantay mana atinata mikhunamanta yarqhachikorqanku. Israelitakunapis paykuna jina waqaspa, ajinata nerqanku: Ay, pitaj aychata mikhunanchejpaj qoriwasunmanri?

⁵ Egiptopi kashaspa, qhasilla challwata mikhusqaykuta yuyarikuyku. Yuyarikullaykutaj pepinota, melonta, puerrota, cebollata, ajota ima mikhusqaykuta.

⁶ Kunanrí yarqhaywan wañushaykuña, ni imapis kaypi kanchu. Maná nisqa mikhunallata rikushayku, nispa.

⁷ Maná nisqaqa culantro mujuman rijch'asqa karqa, thaqoj waqaynin jina q'ellu.

⁸ Q'apaynenqa mosoj aceite jina karqa. Runakunaqa llojsispa, pallakamoj kanku. Chantá chayta kutaj kanku, manachayrí takaj kanku. Jinaspataj, chayachej kanku, manachayrí tortillata ruwakoj kanku.

⁹ Tutan jaranku pataman chhullamojtin, maná nisqapis urmamullajtaj.

¹⁰ Jinataj Moisesqa israelitakunata, wawankuta ima toldonku punkupi waqashasqankuta uyarerqa. Tata Diostajrí chaymanta mayta phiñakorqa. Israelitakuna waqasqankoqa Moisesmanpis manallataj allinchu rijch'arqa.

¹¹ Chantá Moisesqa Tata Diosta nerqa: Imaraykutaj noqa kamachiykita mana allinta ruwawankiri? Imaraykutaj mana yanapawankichuri? Imaraykutaj kay runakunata noqaman wijch'uykuwankiri?

¹² Mana noqaqa kay runakunaj tatankuchu, nitaj mamankuchu kani. Imaraykutaj ñuñoj wawakunata jina ichuspa, ñawpa tatankuman qonaykita nerqanki, chay jallp'aman pusanayta niwankiri?

¹³ Maymantataj noqa aychata apamusaj kay chhika runakunaman mikhuchinaypajri? Aychata qowayku nispa, noqallaman waqaspa jamuwanku.

¹⁴ Noqa sapallayqa kay chhika runata mana pusayta atiymanchu. Noqapajqa ancha jatun ruwana, mana atinaypaj jinachu kashan.

¹⁵ Sichus qan ajinallatapuni ruwawanki chayqa, aswan walej kanman khuyakuwaspa, wañuchinawayki. Jinatachus ruwawaj chayqa, manaña llakiyta rikuymanchu, nispa. Ajinata Moisesqa Tata Diosta nerqa.

¹⁶ Chantá Tata Dios Moisesta nerqa: Israelitakunaj kurajninkumanta kasunapaj jina rejsisqaykimanta, qanchis chunka kamachejkunata Dioswan Tinkukuna Toldoman pusamuy. Chantá paykunata niy qanwan khuska suyanankuta.

¹⁷ Noqataj chayman urayk'amuspa, qanwan parlasaj. Chantá qanpi kaj espirituta paykunamanpis qollasajtaj, paykuna kay runakunata pusayta yanapasunankupaj. Ajinamanta qanqa manaña sapallaykichu pusanki.

¹⁸ Chantá israelitakunata nillaytaj: Q'ayapaj llimphuchakuychej Diospa ñawpaqenpi allinpaj qhawasqa kanaykichejpaj, imaraykuchus q'aya aychata mikhunkichej. Tata Diosqa waqaspa qhetesqaykichejta uyarerqa: Ay, pillapis mikhunanchejpaj aychata qowasunman. Egiptopi kashaspa, walejlla kasharqanchej, nispa. Ajinaqa Tata Dios mikhunaykichejpaj aychata qosonqachej.

¹⁹ Mana uj p'unchayllatachu, ni iskaytachu, ni phishqatachu, ni chunkallatachu, nillataj iskay chunka p'unchayllatachu aychata mikhunkichej.

²⁰ Manachayqa amichikunaykichejkama, chantá millachikunaykichejkama aychata uj killa junt'ata mikhunkichej, imaraykuchus qankunawan kashaj Tata Diosta pisipaj qhawarqankichej. Qankunaqa Diospa ñawpaqenpi waqarqankichej: Imapajtaj Egiptomanta llojsimorqanchejri? nispa.

²¹ Moisestajrí Tata Diosta nerqa: Noqawanqa 600.000 qharikuna kashanku. Qantaj nishanki: Uj killa junt'ata aychata mikhuchisaj, nispa.

²² Sichus ashkha ovejata, wakatapis ñak'ankuman chayqa, tukuypaj wakinmanchu? Mama qochamanta tukuynin challwata jap'ispa qosunman chaypis, mana paykuna sajsakunkumanchu, nispa.

²³ Tata Diostajrí Moisesta nerqa: Atiyneyqa pisichu? Kunan rikunki nisqayta junt'asajchus manachus, chayta, nispa.

Qanchis chunka kurajkuna

²⁴ Chantá Moisés chaymanta llojsispa, Tata Diospa tukuy nisqanta runakunaman willamorqa. Jinataj israelitakunamanta kurajkunata qanchis chunkata tantaspa, Dioswan Tinkukuna Toldoj muyuyninpi sayaykucherqa.

²⁵ Chantá Tata Dios chayman phuyupi urayk'amuspa, Moiseswan parlarqa. Chaymantataj Diosqa Moisesman qosqan espiritumanta qanchis chunka kurajkunaman qorqa. Espíritu paykunaman yaykojtinkamataj, Diosmanta sut'incharqanku. Chaymanta qhepamanrí manaña Diosmanta sut'incharqankuñachu.

²⁶ Jinapis chay qanchis chunkamanta iskayninku Eldadwan, Medadwan ima Dioswan Tinkukuna Toldoman mana rerqankuchu, manachayqa jarallankupi qhepakorqanku. Chaywanpis paykunaman espíritu yaykojtin, jarankupi Diosmanta sut'inchaspa kallarqankutaj.

²⁷ Chantá uj waynuchu usqhayllata rispa, Moisesman willamorqa: Eldadwan, Medadwan ima Diosmanta sut'inchajkuna jina jarankupi parlashanku, nispa.

²⁸ Chantá Nunpata churin Josué, pichus waynamantapacha Moisesta yanapaspa karqa, chay, Moisesta nerqa: Wiraqochiy Moisés, Diosmanta sut'inchanankuta ama saqeychu ari, nispa.

²⁹ Moisestajrí kuticherqa: Ama qan chaymanta llakikuychu. Allin kanman Tata Diosqa tukuy israelitakunaman espiritunta qonan, jinamanta Tata Diosmanta sut'inchanankupaj, nispa.

³⁰ Chay qhepatataj Moisesqa tukuy kurajkunawan khuska jarankuman kutiporqanku.

Tata Dios ashkha yuthuta israelitakunaman qon

³¹ Chaypacha Tata Dios ujllata mama qochamanta wayrachimorqa, chay wayrataj ashkhatapuni yuthuta apamorqa. Chay yuthukunataj israelitakunaj jarankuman tiyaykorqanku. Jarankoj muyuyninpi pampaman uj p'unchay puriyta jina junt'aykorqanku. Chay yuthukunaqa yaqha uj metrota jina patanpi patanpi tawqakorqanku.

³² Israelitakunataj tukuy chay p'unchayta, tukuy chay tutata, q'ayantinpis ch'isiyanankama yuthukunata jap'erqanku. Pisita jap'ejqa chunka tuputa jina tantarqa. Chantá yuthuta ch'arkispa, jarankoj muyuyninman ch'akiracherqanku.

³³ Israelitakuna aychata siminkuman churaykushajtinku, Tata Dios paykunaj contrankuta k'arajta phiñakorqa. Chayrayku onqoywan ashkha runata wañucherqa.

³⁴ Chayrayku chay cheqata “Quibrot Hatavá”, nispa suticharqanku. Ajinata chaynejta suticharqanku, aychawan mana sajsakuyta atejkunaj ayankuta p'ampasqankurayku.

³⁵ Chantá israelitakunaqa Quibrot Hatavamanta llojsispa, Jaserotkama rerqanku, chaypitaj jarakorqanku.