Números 10 - DIOSPA QHELQACHISQAN DEUTEROCANONICAL

Qolqe metalmanta trompetata ruwanku

¹ Tata Dios Moiseswan parlaspa, nillarqataj:

² Martillowan takaspa, qolqe metalmanta iskay trompetata ruway. Chaykunaqa israelitakuna tantakunankuta wajyachinaykipaj kanqa, jinallataj puririnankuta kamachinaykipaj.

³ Sichus iskaynin trompeta waqanqa chayqa, Dioswan Tinkukuna Toldo punkuman qanpa ñawpaqeykiman tukuy israelitakuna jamunanku tiyan.

⁴ Sichus uj trompetalla waqanqa chayrí, sapa ayllumanta tukuy kurajkunalla ñawpaqeykiman tantakamonqanku.

⁵ Puririnankupaj jina trompetakunata waqachejtiykitaj, inti llojsimuynejpi jarakojkuna puririnankupaj oqharikonqanku.

⁶ Watej trompetata waqachejtiykitaj, uranejpi jarakojkuna oqharikonqanku. Trompeta sinch'ita waqajtin, runataj sinch'ita qhaparejtenqa, puririnankupaj señal kanqa.

⁷ Trompeta waj jinata waqajtintaj, tukuy israelitakuna tantakunankupaj señal kanqa.

⁸ Trompetataqa Aaronpa mirayninmanta sacerdotekuna waqachenqanku. Kay kamachisqaqa qankunapaj, jinataj mirayniykichejpaj wiñaypaj kanqa.

⁹ Sichus suyuykichejpi kashajtiykichej, pipis qankunawan maqanakoj jamunman chayqa, jatunmanta trompetata waqachinkichej. Chantá noqa Tata Diosniykichej qankunamanta yuyarikusaj, awqaykichejmantataj kacharichisqaykichej.

¹⁰ Jinallataj raymita ruwanaykichejpaj, chantá mosoj killa raymita ruwanaykichejpaj ima, trompetata waqachinkichej. Jinallataj q'olachispa Tata Diosman jaywanata jaywashaspa, allinyakuy jaywanata ima jaywashaspa, trompetata waqachillankichejtaj. Ajinata ruwajtiykichej, noqa qankunamanta yuyarikusaj. Noqamin Tata Diosniykichej kani, nispa.

Israelitakuna Sinaí orqomanta puririnku

¹¹ Egiptomanta llojsimusqanku iskay wataña kashajtin, iskay kaj killamanta iskay chunkayoj p'unchaypi, Dioswan Tinkukuna Toldo patamanta phuyu oqharikorqa.

¹² Chaypacha israelitakunaqa Sinaí ch'innejmanta purirerqanku. Phuyutaj Parán nisqa ch'innejpi sayarqa.

¹³ Tata Dios Moisesnejta kamachisqanman jina paykuna puririyta qallarerqanku.

¹⁴ Ñawpajta Judá jatun ayllumanta kajkunaraj wiphalankuta oqharikuspa, soldadokuna jina purirerqanku. Paykunatataj Aminadabpa churin Nasón kamachejninku kaspa pusasharqa.

¹⁵ Isacar jatun ayllumanta kajkunajta kamachejninku Suarpata churin Natanael karqa.

¹⁶ Zabulón jatun ayllumanta kajkunajta kamachejninkutaj Helonpata churin Eliab karqa.

¹⁷ Chaymantataj Gersonpata churinkuna, chantá Merarij churinkunawan ima Dioswan Tinkukuna Toldota apanankupaj phaskarqanku, paykuna apanankupaj cuentayoj kasqankurayku.

¹⁸ Chaymanta Rubén jatun ayllumanta kajkunañataj wiphalankuta oqharikuspa, soldadokuna jina paykunaj qhepankuta purirerqanku. Rubén jatun ayllumanta kajkunaj kamachejninkutaj Elisurpata churin Sedeur karqa.

¹⁹ Simeón jatun ayllumanta kajkunajtarí Surisadaypata churin Selumiel kamachejninku karqa.

²⁰ Gad jatun ayllumanta kajkunajtataj Deuelpa churin Eliasaf kamachejninku karqa.

²¹ Paykunaj qhepankuta Coatpata churinkuna Tata Diosta yupaychanapaj t'aqasqa imakunata oqharisqa purirerqanku. Paykuna chayanankupajqa Dioswan Tinkukuna Toldo ñapis sayarichisqaña karqa.

²² Coatpa churinkunaj qhepankuta Efraín jatun ayllumanta kajkunañataj wiphalankuta oqharikuspa, soldadokuna jina purirerqanku. Kamachejninkutaj Amiudpata churin Elisama karqa.

²³ Manasés jatun ayllumanta kajkunajtarí Pedasurpata churin Gamaliel kamachejninku karqa.

²⁴ Benjamín jatun ayllumanta kajkunajtataj Gedeonij churin Abidán kamachejninku karqa.

²⁵ Tukuypa qhepantataj Dan jatun ayllumanta kajkuna wiphalankuta oqharikuspa, soldadokuna jina purirerqanku. Paykunajtataj Amisadaypata churin Ajiezer kamachejninku karqa.

²⁶ Aser jatun ayllumanta kajkunajtaqa Ocranpata churin Pagiel kamachejninku karqa.

²⁷ Neftalí jatun ayllumanta kajkunajtarí Enanpata churin Ajirá kamachejninku karqa.

²⁸ Ajinata israelitakunaqa soldadokuna jina qhepan qhepanta puririnanku karqa.

Moisés warminpa turanta wajyan

²⁹ Uj kuti Moisesqa Madián llajtayoj suegron Ragüelpata churin Hobabta nerqa: Noqaykoqa Tata Dios qonawaykuta niwayku, chay jallp'aman rishayku. Qanpis noqaykuwan jamuy ari. Noqaykutaj qanmanta qhawasqayku, imaraykuchus Tata Dios israelitakunata khuyakuywan qhawarinanta nin, nispa.

³⁰ Hobabtajrí Moisesta nerqa: Mana, noqaqa llajtayman kutipunay tiyan, maypichus tukuy aylluy tiyakunku chayman, nispa.

³¹ Moisestaj kuticherqa: Ama kutipuychu ari. Qan sumajta yachanki kay ch'inkunapi jarakunapaj maynejchus sumaj kasqanta, chayrayku qan pusawayku ari.

³² Sichus noqaykuwan rinki chayqa, Tata Dios sumaj imakunata qowasqaykumanta qanmanpis qollasqaykutaj, nispa.

³³ Ajinata israelitakunaqa Tata Diospa orqonmanta purirerqanku, rerqankutaj kinsa p'unchay puriyta. Tata Diospa trato ruwasqan arcaqa ñawpaqenkuta risharqa, maynejpichus jarakunankuta mask'aspa.

³⁴ P'unchayninpi paykuna purirejtinkukama, Tata Diospa phuyun patankuta risharqa.

³⁵ Tata Diospa arcanta oqharejtinkukamataj, Moisés ajinata nej: Sayariy ari, Tata Dios. Awqaykikuna ch'eqerachunku. Chejnisojkunapis qanta rikususpa, ayqechunku, nispa.

³⁶ Diospa arcanta apajkuna sayajtinkutaj, Moisés kay jinata nej: Tata Diosníy, mana yupay atina Israelpa mirayninta ama saqerpariychu ari, nispa.