San Mateo 8 - DIOSPA QHELQACHISQAN DEUTEROCANONICAL

Jesús llejti onqoyniyojta qhaliyachin

¹ Jesús orqomanta urayk'amusqantawan, ashkha runakuna payta qhaterqanku.

² Chantá llejti onqoyniyoj uj runaqa Jesusman qayllaykorqa, ñawpaqenman pampakama k'umuykukuspataj, nerqa: Wiraqochíy, munankichus chayqa, onqoyniymanta qhaliyachiwayta atinki, Diospa ñawpaqenpi llimphu kanaypaj, nispa.

³ Jesustaj makinta aysarispa, payta llankhaykorqa, nerqataj: Arí munani, llimphuchasqa kay, nispa. Chayta Jesús nejtinkamataj, chay runaqa llejti onqoymanta qhaliyachisqa karqa.

⁴ Jesús nillarqataj: Uyariway: Ama kayta pimanpis willankichu. Manachayqa rispa, sacerdotellaman rikuchikamuy. Jinataj Moisespa kamachisqanman jina jaywanaykita qomuy, runakuna yachanankupaj onqoyniykimanta llimphuchasqa kasqaykita, nispa.

Jesusqa capitanpa uywasqanta qhaliyachin

⁵ Jesusqa Cafarnaún llajtaman yaykusqantawankama, romano soldadokunata kamachej uj capitán payman qayllaykuspa, mañakorqa:

⁶ Wiraqochi, uywasqayqa wasiypi onqosqa, suchu. Paytaj nanaywan anchatapuni ñak'arishan, nispa.

⁷ Jinapitaj Jesús nerqa: Noqa rispa, payta qhaliyachimusaj, nispa.

⁸ Capitantajrí kuticherqa: Wiraqochi, noqaqa mana wasiyman yaykunaykipaj jinachu kani. Manachayqa uj simita nillay, uywasqaytaj qhaliyaponqa.

⁹ Noqaqa kurajkunaj kamachisqallantaj kani, jinallataj noqapis soldadokunata kamachini. Ujninta kamachini: Riy, nispa, rintaj. Ujnintapis nillanitaj: Jamuy, nispa, jamuntaj. Jinallataj, kamachiytapis nini: Kayta ruway, nispa, paytaj chayta ruwan, nispa.

¹⁰ Jesús chayta uyarispa, t'ukorqa. Paywan rejkunatataj nerqa: Kayta sut'ita niykichej: Kay runa noqapi atinikusqanta jinaqa, Israel ayllupi mana ujtapis tarinichu.

¹¹ Nillaykichejtaj: Ashkha runa inti llojsimuynejmanta jamonqanku, inti yaykuynejmanta ima. Chantá Diospa janaj pacha kamachiyninpi paykuna Abrahamwan mikhonqanku, Isaacwan, Jacobwan ima.

¹² Pikunachus Diospa janaj pacha kamachiyninpi kananku karqa chaykunarí, jawa laqhaman wijch'usqa kanqanku, maypichus manchay waqay, kiru k'arukuytaj kanqa, chayman, nispa.

¹³ Chaymanta Jesusqa chay capitanta nerqa: Wasiykiman ripuy, noqapi atinikusqaykirayku munasqayki ruwasqa kachun, nispa. Chayta Jesús nisqantawantaj, capitanpa uywasqan qhaliyaporqa.

Jesusqa Pedroj suegranta qhaliyachin

¹⁴ Chaymanta Jesusqa Pedroj wasinman rerqa, chaypitaj Pedroj suegranta rikorqa, k'aja onqoywan puñunanpi sirisqata.

¹⁵ Chantá, Jesús onqosqaj makinta llankharejtinkama, k'aja onqoyninmanta qhaliyaporqa. Jatarimuspataj, payqa mikhunata paykunaman jaywarqa.

Jesús ashkha onqosqakunata qhaliyachin

¹⁶ Ch'isiyaytaña, chay llajtayojkunaqa Jesusman supayniyoj ashkha runata pusamorqanku. Paytaj uj simita nispalla, chay runakunamanta supaykunata qharqorqa. Ajinallatataj tukuy onqosqakunatapis qhaliyacherqa.

¹⁷ Chay ajina karqa Diosmanta ñawpa sut'inchaj Isaiaspa willasqan junt'akunanpaj: Paymin onqoyninchejmanta qhaliyachiwarqanchej, nanayninchejtapis thañichiwarqanchej, nispa.

Jesuswan riyta munajkuna

¹⁸ Chantá Jesusqa muyuyninpi ashkha runata rikuspa, yachachisqankunata kamacherqa qochaj chimpanman rinankuta.

¹⁹ Chayllapi Diospa kamachisqanmanta uj yachachej Jesusman qayllaykuspa, nerqa: Yachachej Wiraqochi, mayman rejtiykipis, noqaqa qanwan khuska riyta munani, nispa.

²⁰ Jesustajrí kuticherqa: Atojkunajtaqa qaqapi jusk'unku tiyan, p'isqokunapis thapayojllataj kanku. Runaj Churinpajtarí, mana maypichus samarinallanpajpis kanchu, nispa.

²¹ Yachachisqankunamanta ujnin kajtaj nerqa: Wiraqochíy, tatay wañupunankama suyariway ari, chaymantaraj qhatisqayki, nispa.

²² Jesustajrí kuticherqa: Yachachisqay kanaykipaj noqawan jamuy, wañusqa kajkunataj, wañusqankukunata p'ampachunku, nispa.

Jesús sinch'i wayrata, phiñarikoj qochatawan thañichin

²³ Chantá Jesusqa boteman yaykuspa, yachachisqankunawan khuska chaymanta riporqa.

²⁴ Rishajtinku, qochapi sinch'i wayra oqharikorqa, yakutaj manchayta qhollchoqeyaspa, boteta chinkaykuchisharqaña. Jesustajrí puñusharqa.

²⁵ Chantá yachachisqankuna Jesusman qayllaykuytawan rijch'arichispa, nerqanku: Wiraqochi, yanapawayku ari, yakuman chinkaykushanchejña, nispa.

²⁶ Chantá Jesús paykunata nerqa: Imaraykutaj manchachikunkichejri? Qankunamá kasqankichej, manachu noqapi atinikunkichej? nispa. Sayariytawantaj, qochata, wayratawan k'amerqa. Wayra thañejtintaj, qochapis tiyaykorqa.

²⁷ Yachachisqankunatajrí t'ukuspa, nerqanku: Pitaj kay runa kanmanri, wayrapis, mama qochapis payta kasunankupajri? nispa.

Gadaramanta supayniyoj iskay runakuna

²⁸ Ajinaqa Jesús qocha chimpapi Gadara jap'iyman chayarqa. Chantá supayniyoj iskay runakuna panteonmanta llojsimuspa, payman chimpaykorqanku. Manchay phiña kasqankurayku, chay ñannejta ni pi purejchu.

²⁹ Paykunataj kay jinata qhapariyta qallarerqanku: Diospa Churin, ima ruwanayki tiyan noqaykuwanri? Manaraj ñak'arinayku kashajtin, noqaykuta ñak'arichejchu jamunki? nispa.

³⁰ Paykunamanta karunejpi ashkha khuchi mikhusharqanku.

³¹ Chantá chay supaykunaqa Jesusmanta mañarikorqanku: Sichus kay runakunamanta qharqowasqayku chayqa, jaqay khuchikunaman kachawayku, nispa.

³² Jesustaj nerqa: Riychej, nispa. Chantá supaykunaqa chay iskay runakunamanta llojsispa, khuchikunamanñataj yaykorqanku. Tukuynin khuchikunataj imata jina phawaspa, qaqanta mama qochaman wijch'uykukorqanku, jeq'eqaspataj wañurarqanku.

³³ Chayta rikuspa, khuchikunata michejkuna ayqerqanku. Llajtaman chayaspataj, supayniyoj runakunata imachus qhatirisqanta willarqanku.

³⁴ Jinapi chay llajtamanta tukuy runakuna Jesusta taripaj llojserqanku. Chaywanpis paywan tinkukuspa, chay cheqamanta ripunanta mañarikorqanku.