San Mateo 7 - DIOSPA QHELQACHISQAN DEUTEROCANONICAL

Jesús wajkunata mana juchachanamanta yachachin

¹ Ama pitapis juchachaychejchu, ama juchachasqa kanaykichejpaj.

² Imaynatachus wajkunata juchachankichej, ajinallatataj Diospis qankunata juchachasonqachej. Imayna sonqowanchus wajkunata qhawankichej, chay jinallatataj Dios qankunata qhawasonqachej.

³ Imaraykutaj wawqeykej ñawinpi q'opata qhawanki, qanpa ñawiykipitaj kurkuta mana reparankichuri?

⁴ Qanpa ñawiykipi chhikan kurku kashajtin, imaynatataj wawqeykita niwaj: Wawqey, ñawiykimanta chay q'opata orqhojta saqeway, nispa, qanpa ñawiykipi kurku kashajtinri?

⁵ Puraj uya, ñawiykimantaraj ñawpajta chay kurkuta orqhokuy. Chantá allinta qhawaspa, wawqeykej ñawinmanta q'opata orqhoyta atinki.

⁶ Diospaj t'aqasqa kajtaqa ama alqokunaman qaraykuychejchu. Pajtataj kutirimuspa qhanisunkichejman. Nillataj khuchikunamanpis perla walqaykichejkunata wijch'uychejchu, imaraykuchus khuchikunaqa walqakunata sarurallankuman.

Jesusqa Diosmanta mañakunamanta yachachin

⁷ Diosmanta mañakuychej, qosonqachejtaj. Dios kutichisunanta mask'aychej, tarinkichejtaj. Punkutapis takallaychejpuni, Diostaj kicharimusonqachej.

⁸ Pichus Diosmanta mañakojqa jap'in, mask'ajtaj tarin, punkuta takajpajpis Dios punkuta kicharin.

⁹ Qankunamanta mayqentaj, wawaykichej t'antata mañakojtin, rumita jaywawajchej?

¹⁰ Chayrí wawaykichej challwata mañakojtin, kataritachu qowajchej? Mana, icharí?

¹¹ Qankunachus mana allin runakuna kashaspa, allin kajta wawaykichejkunaman qoyta yachankichej chayqa, astawanraj janaj pachapi kaj Tataykichejqa mañakojkunaman allin kajta qonqa.

¹² Chayrayku, imaynatachus runakuna qankunapaj ruwanankuta munankichej, ajinallatataj qankunapis paykunapaj ruwaychej. Chayta ruwaspa, junt'ashankichej imatachus Diospa kamachisqanpi, Diosmanta sut'inchajkunaj qhelqasqankupi ima kamachishan, chayta.

K'ullku punkumanta rijch'anachina

¹³ Diospa kamachiyninman k'ullku punkunejta yaykuychej, imaraykuchus chinkayman pusaj ñan jatunmin, chayman yaykuna punkupis jatunllataj. Chaynejta yaykojkunapis may ashkhallataj kanku.

¹⁴ Chaywanpis wiñay kawsayman pusaj ñanqa k'ullkumin, chayman yaykuna punkupis k'ullkullataj. Chayta tarejkunataj pisilla kanku.

Mana cheqan yachachejkunata ruwasqankunejta rejsinchej

¹⁵ Qankunaqa allinta qhawakuychej pikunachus llullakuspa: Diosmanta sut'inchaj kani, nispa nejkunamanta. Paykunaqa oveja jina jamusunkichej, sonqonkupitajrí suwa atoj jina kanku.

¹⁶ Qankunaqa ruwasqankunejta imaynachus kasqankuta rejsinkichej. Uvataqa mana khishkamantachu pallanchej, nillataj higotapis ithapallumantachu, icharí?

¹⁷ Ajina, sumaj sach'aqa sumajta poqon, mana allin sach'aj poqosqanrí mana allinchu.

¹⁸ Sumaj sach'aqa mana allin poqoyta mana poqonmanchu. Nillataj mana allin sach'apis allin poqoyta mana poqonmanchu.

¹⁹ Ima sach'apis mana allinta poqospa, k'utusqa kanqa, ninamantaj enqhaykusqa.

²⁰ Ajinamanta, qankunapis ruwasqankunejta yachankichej pikunachus Diosmanta sut'inchajkuna kasqankuta nispa, llullakushanku, chayta.

Diospa kamachiyninman mana tukuychu yaykonqanku

²¹ Mana tukuy pikunachus: Tukuyta Kamachejniyku kanki, nispa niwajkunachu Diospa kamachiyninman yaykonqanku. Manachayqa, janaj pachapi kaj Tata Diosniypa munayninta ruwajkunalla yaykonqanku.

²² Chay p'unchaypeqa ashkha niwanqanku: Tukuyta Kamachej, manachu sutiykipi sut'incharqayku, sutiykipitaj runakunamanta supaykunata qharqorqayku? Manachu sutillaykipitaj ashkha t'ukuna imakunata ruwarqayku? nispa.

²³ Noqatajrí uyankupi nipusaj: Ni jayk'aj qankunata rejserqaykichejchu. Ñawpaqeymanta chinkaychej, millayta ruwajkuna, nispa.

Iskay wasikunamanta rijch'anachina

²⁴ Pichus kay yachachisqayta uyarispa ruwajqa sumaj yuyayniyoj, paytaj chhanka patapi wasichakoj runaman rijch'akun.

²⁵ Chantá sinch'i para jich'akamusqa, mayukunapis wasaykuspa, wasikama chayasqa, sinch'i wayrataj wasita wajtasqa. Chaywanpis chay waseqa mana urmasqachu, chhanka patapi ruwasqa kasqanrayku.

²⁶ Sichus pipis yachachisqayta uyarispa mana kasun chayrí, payqa mana yuyayniyoj runaman rijch'akun, pichus t'iyu patapi wasichakojman.

²⁷ Jinapi sinch'i para jich'akamusqa, mayukunapis wasaykuspa wasikama chayasqanku. Sinch'i wayrapis wasita wajtasqa. Chantá t'iyu patapi ruwasqa kasqanrayku waseqa urmasqa, urmaspataj raqayllaman tukusqa, nispa.

²⁸ Jesús chay imakunata parlayta tukojtin, runakunaqa yachachisqanmanta mayta t'ukorqanku.

²⁹ Astawan t'ukorqanku, imaraykuchus Jesusqa kasuchikunapaj jina yachacherqa, manataj Diospa kamachisqanmanta yachachejkuna jinachu.