San Mateo 5 - DIOSPA QHELQACHISQAN DEUTEROCANONICAL

Jesús orqopi yachachin

¹ Uj p'unchay Jesús ashkha runata jamushajta rikuspa, uj orqoman wicharerqa. Chaypi tiyakushajtintaj, yachachisqankuna payman qayllaykorqanku.

² Chantá Jesús kay jinata yachachiyta qallarerqa:

Kusikuyniyojkuna

³ Kusikuyniyojmin kanku wajcha sonqoyoj kasqankuta reparakojkunaqa, imaraykuchus janaj pachamanta Diospa kamachiyninpi kanqanku.

⁴ Kusikuyniyojmin kanku kunan waqajkunaqa, imaraykuchus Diosmin paykunata sonqochanqa.

⁵ Kusikuyniyojmin kanku llamp'u sonqoyojkunaqa, imaraykuchus Dios kay pachata chayaqeta jina paykunaman qonqa.

⁶ Kusikuyniyojmin kanku cheqan kawsaymanta yarqhachikojkunaqa, ch'akichikojkunapis, imaraykuchus Dios paykunata sajsachenqa.

⁷ Kusikuyniyojmin kanku khuyakojkunapis, imaraykuchus Dios paykunamanta khuyakullanqataj.

⁸ Kusikuyniyojmin kanku llimphu sonqoyojkunaqa, imaraykuchus paykuna Diosta rikonqanku.

⁹ Kusikuyniyojmin kanku pikunachus tukuypaj allinpi kawsakuyta mask'ajkunaqa, imaraykuchus paykunaqa Diospa churinkuna sutichasqa kanqanku.

¹⁰ Kusikuyniyojmin kanku pikunachus cheqan kajta ruwasqankurayku, qhatiykachasqa kajkunaqa, imaraykuchus janaj pachamanta Diospa kamachiyninman yaykonqanku.

¹¹ Qankunapis kusikuyniyojmin kankichej, runakuna noqarayku qankunapaj rimajtinku, chejnispa ñak'arichisojtiykichej, llullakuspa contraykichejpi imaymanata nejtinku ima.

¹² Chaypacha kusikuychej, jinallataj sonqo junt'asqa kaychej, imaraykuchus janaj pachapi t'inkaykichejqa ashkhamin. Ajinallatataj runakunaqa Diosmanta ñawpa sut'inchajkunata chejnispa qhatiykacharqanku.

Kachi jina, k'anchay jina kanamanta

¹³ Runakuna ukhupi qankunaqa kachi jina kankichej. Chaywanpis, sichus kachi q'aymayanman chayqa, imaynatataj k'araman watej kutinmanri? Mana imapaj walejñachu, manachayqa jawaman wijch'unallapajña, runa sarunanpaj.

¹⁴ Jinallataj qankunaqa runakunapaj k'anchay jina kankichej. Orqo patapi llajtaqa mana pakasqa kayta atinchu, icharí?

¹⁵ Nillataj pipis lamparata jap'ichispa wich'iwan k'umpuykunchu. Manachayqa lamparata jap'ichispa, pataman churan, wasipi tukuy kajkunata k'anchananpaj.

¹⁶ Ajinallatataj, k'anchayniykichejqa runakunaj ñawpaqenpi k'anchachun. Ajinamanta paykuna allin ruwasqaykichejta rikuspa, janaj pachapi kashaj Tata Diosniykichejta jatunchanqanku.

Jesusqa Diospa kamachisqanmanta yachachin

¹⁷ Ama yuyaychejchu noqaqa Diospa kamachisqanta, chayrí, Diosmanta sut'inchajkunaj yachachisqankuta ima chinkachej jamusqayta. Mana chaykunata chinkachejchu jamuni, aswanpis junt'aj jamuni.

¹⁸ Chayrayku sut'ita niykichej: Janajpis, kay pachapis kanankamaqa, Diospa kamachisqanmanta mana uj simillapis chinkachisqachu kanqa, aswanpis tukuynin junt'akonqa.

¹⁹ Sichus pipis kay kamachisqakunamanta aswan juch'uy kajllatapis p'akinman, jinallataj wajkunamanpis p'akiyta yachachinman chayqa, janaj pachamanta Dios kay pachapi kamachishajtin chay runaqa pisipaj qhawasqa kanqa. Ajinallatataj sichus pipis Diospa kamachisqanta junt'anqa, jinallataj wajkunamanpis junt'ayta yachachenqa chayqa, chaymá sumaj jatunpaj qhawasqa kanqa janaj pachamanta Dios kay pachapi kamachishajtin.

²⁰ Chayrayku qankunata niykichej: Qankuna yuyankichej Diospa kamachisqanmanta yachachejkuna, fariseokunawan ima, cheqan runa kasqankuta. Manachus qankuna paykunamanta aswan cheqan kawsayniyoj kankichej chayrí, janaj pachamanta Diospa kay pachapi kamachiyninman mana yaykunkichejchu.

Jesús mana phiñakunamanta yachachin

²¹ Qankuna uyarerqankichej ñawpa tataykichejkunaman imachus kamachisqa kasqanta: Ama runa masiykita wañuchinkichu. Pillapis runata wañuchejqa juiciopi juchachasqa kanqa, nispa.

²² Noqatajrí niykichej: Sichus pipis wawqenpaj phiñakun chayqa, juiciopi juchachasqa kanqa. Pichus wawqenta wampu nejpis Jatun Juntapi juchachasqallataj kanqa. Chantá, sichus pipis wawqenta maldicinman chayqa, lawrashaj nina qochaman wijch'uykusqa kananpaj jina kanqa.

²³ Chayrayku, Diosman jaywanaykita apashaspaqa, sichus wawqeyki qanpaj phiñasqa kasqanta yuyarikuwaj chayqa,

²⁴ altarpa ñawpaqenpi jaywanaykita saqey. Chantá wawqeykiwanraj ñawpajta allinyakamuy. Chaymantaraj kutimuspa, apamusqaykita Diosman jaywayta atinki.

²⁵ Sichus piwanpis phiñanakuytawan quejaman rishanki chayqa, paywan allinyakapuy. Manachayqa awqayki juezman apasonqa, jueztaj carcelta qhawajwan jap'ichisonqa, carcelman wisq'achisunanpaj.

²⁶ Kayta sut'itapuni niyki: Mana carcelmanta llojsinkichu, tukuy manuykita paganaykikama, nispa.

Jesús mana khuchichakunamanta yachachin

²⁷ Qankuna uyarerqankichej imachus kamachisqa kasqanta: Ama qhenchachakunkichu khuchichakuspa, nispa.

²⁸ Noqatajrí niykichej: Sichus pipis uj warmita qhawaspa paywan puñuykunanpaj munapayan chayqa, ñapis paywan sonqonpi khuchichakunña, nispa.

²⁹ Chayrayku paña ñawiyki juchallichisojtenqa, orqhorparispa karunejman wijch'uy, imaraykuchus aswan allin kanman uj ñawillayki chinkanan, tukuy ukhuyki lawrashaj nina qochaman wijch'uykusqa kananmantaqa.

³⁰ Ajinallatataj paña makiyki juchallichisojtenqa, khuchuspa karunejman wijch'uy. Aswan allin kanman uj makillayki chinkanan, tukuy ukhuyki lawrashaj nina qochaman wijch'uykusqa kananmantaqa.

Qhari warmi mana t'aqanakunamanta

³¹ Ajinallatataj ñawpajta kamachisqa karqa: Pillapis warminmanta t'aqakojqa t'aqanakuy papelta qopuchun, nispa.

³² Noqatajrí niykichej: Sichus pipis warminmanta t'aqakun, warmin mana wajwan wasanchaspa khuchichakojtillan chayqa, warminta khuchichakuspa juchallinanpaj tanqaykun. Jinallataj chay warmiwan casarakojpis khuchichakullantaj.

Jesús mana tilunamanta yachachin

³³ Uyarillarqankichejtaj ñawpa tatakunaman nisqa kasqanta: Ama qhasita tilunkichu, manachayqa imatachus Diospa ñawpaqenpi tilusqaykita junt'anki, nispa.

³⁴ Noqatajrí niykichej: Amapuni tilunkichejchu janaj pacharayku, imaraykuchus chayqa Diospa kamachinan tiyana.

³⁵ Nitaj kay pacharaykupis tilunkichejchu, imaraykuchus kay pachaqa Diospa chakinpa sarunanmin. Nillataj Jerusalenraykupis tilunkichejchu, imaraykuchus chayqa may jatunchasqa Kuraj Kamachejpa llajtanmin.

³⁶ Amallataj umaykichejrayku tilunkichejchu, imaraykuchus mana uj chujchallatapis yurajyachiyta nitaj yanayachiyta atinkichejchu.

³⁷ Chayrayku qankuna kay jinallata parlankichej: Maypachachus arí, nispa ninkichej chaypachaqa, ajina kachun. Maypachachus mana, nispa ninkichej chaypacharí, ajinallataj kachun. Chaymanta astawan parlanaqa sajraj yuyaychasqanmin.

Jesús mana kutichikunamanta yachachin

³⁸ Kay ñawpa kamachisqatapis uyarillarqankichejtaj: Pichus runa masinpa ñawinta suruchejqa, paypa ñawintapis suruchillanqankutaj. Jinallataj pichus wajpa kirunta p'akejpis, paypa kiruntapis p'akillanqankutaj, nispa.

³⁹ Noqatajrí niykichej: Sichus pipis mana allinta ruwasunkichej chayqa, ama pagachikuychejchu. Pillapis uyaykipi laq'asojtenqa, uj lado uyaykitawan rikuchiy.

⁴⁰ Chayrí sichus pipis quejaspa camisaykita qhechusuyta munan chayqa, qhatakunaykitapis jaywallaytaj.

⁴¹ Chantá, sichus uj soldado q'epinta uj kilometrota qanwan q'epichiyta munan chayqa, uj jinatawan apapuy.

⁴² Pipis imata mañakusojtenqa, qoriy. Jinallataj: Manuriway, nispa nisunkiman chayqa, manuriy.

Jesús awqakunata munakunamanta yachachin

⁴³ Uyarerqankichej kamachisqa kasqanta: Runa masiykita munakunki, awqaykitataj chejninki, nispa.

⁴⁴ Noqatajrí niykichej: Awqaykichejkunata munakuychej, jinallataj qankunata qhatiykachasojkunapaj Diosmanta mañapuychej.

⁴⁵ Ajinamanta, janaj pachapi kashaj Tata Diosniykichejpa wawankuna kasqaykichejmanta yachayta qoshankichej. Payqa millayta ruwaj runakunapaj, k'acha runakunapajpis intinta llojsichimun. Jinallataj tukuypaj parachimun, cheqanta ruwajkunapaj, mana cheqanta ruwajkunapajpis.

⁴⁶ Sichus qankunata munakojkunallata munakunkichej chayqa, pitaj chaymanta t'inkata qosonqachejri? Manachu juchasapapaj qhawasqa impuesto cobrajkunapis kikillantataj ruwanku?

⁴⁷ Sitajchus qankuna wawqeykichejkunallata napaykunkichej chayqa, ujkunamanta imatataj aswan allinta ruwashankichejri? Manachu Diosman mana kutirikojkuna kikillantataj ruwanku?

⁴⁸ Janaj pachapi kashaj Tata Diosniykichejqa cheqan munakuyniyoj. Chayrayku qankunapis ajinallataj kaychej. Ajinata nispa Jesús yachacherqa.