San Mateo 4 - DIOSPA QHELQACHISQAN DEUTEROCANONICAL

Kuraj Supayqa Jesusta juchallichiyta munan

¹ Chaymanta Santo Espiritoqa Jesusta ch'innejman pusarqa, chaypi Kuraj Supay atispaqa Jesusta juchallichinanpaj.

² Chaypitaj Jesusqa tawa chunka p'unchayta, tawa chunka tutatawan mana mikhusqa kaspa, sinch'ita yarqhachikorqa.

³ Chaypacha Kuraj Supayqa Jesusta juchallichiyta munaspa qayllaykorqa, nerqataj: Sichus Diospa Churin kanki chayqa, kay rumikunata t'antaman tukunankuta niy, nispa.

⁴ Jesustajrí kuticherqa: Diospa Qhelqachisqanpi nin: Mana mikhunallawanchu runaqa kawsan, aswanpis Diospa tukuy nisqanwan kawsan, nispa.

⁵ Chaymanta, Kuraj Supayqa Diospaj t'aqasqa Jerusalén llajtamanñataj Jesusta pusarqa, Templo patapi sayaykuchispataj, nerqa:

⁶ Diospa Churinchus kanki chayqa, kay patamantapacha uraman wijch'uykukuy, imaraykuchus Diospa Qhelqachisqanpi nin: Diosqa angelninkunata kachamonqa waqaychasunankupaj. Makinkupi jap'isonqanku, ama ima rumipipis chakiykita takakunaykipaj, nispa.

⁷ Jesustajrí kuticherqa: Mana, imaraykuchus Diospa Qhelqachisqanpi nillantaj: Ama imatapis ruwankichu Tukuyta Kamachej Diosniyki atiyniyojchus manachus kasqanta yachariyta munaspa, nispa.

⁸ Chantá Kuraj Supayqa jatun orqo patamanñataj Jesusta pusaspa, uj ñawi ch'irmiypi kay pachapi tukuy suyukunata, qhapaj kapuyninkutawan ima rikucherqa.

⁹ Jesustataj nerqa: Noqa kay tukuy imata qosqayki, sichus qan qonqoriykukuspa, yupaychawanki chayqa, nispa.

¹⁰ Jesustajrí kuticherqa: Riy kaymanta, Supay Satanás, imaraykuchus Diospa Qhelqachisqanpi nin: Tukuyta Kamachej Diosniykita yupaychanki, paypa munaynillantataj ruwanki, nispa.

¹¹ Chantá Kuraj Supay riporqa, angelkunataj jamuspa, Jesusta yanaparqanku.

Jesús Galileapi willayta qallarin

¹² Jesusqa Bautizaj Juan preso kasqanta uyarispa, Galileaman kutirerqa.

¹³ Nazaret llajtata saqespa, Cafarnaunman tiyakoj riporqa. Chay llajtaqa Galilea qocha kantupi karqa, Zabulón, Neftalí ima, chay jap'iypi.

¹⁴ Ajinata pay junt'arqa imatachus Diosmanta ñawpa sut'inchaj Isaías nisqa, chayta:

¹⁵ Kayta nini Zabulonpa jallp'anpi, Neftalijpa jallp'anpi tiyakojkunapaj, mama qocha qayllapi, chantá Jordán mayoj chimpanpi kajkunapaj, pikunachus mana judío kajkunaj tiyakusqanku Galileapi tiyakunku, chaykunapaj:

¹⁶ Laqhapi tiyakoj runakuna uj jatun k'anchayta rikonqanku. Wañuy llanthu cheqapi tiyakojkunamanpis uj k'anchay lliphipimonqa, nispa.

¹⁷ Chaymantapacha Jesús kay jinata tukuyman willarayta qallarerqa: Diosman kutirikuychej, imaraykuchus janaj pachamanta Dios kay pachapi kamachinanpaj wakichisqaña kashan, nispa.

Jesusqa tawa challwirikunata wajyan

¹⁸ Uj p'unchay Jesusqa Galilea qocha kantunta rishaspa, iskay wawqekunata rikorqa. Ujnin Simón karqa, Pedro sutiyoj, ujnintaj Andrés. Paykunaqa challwa jap'ina ch'ipata mama qochaman wijch'uykusharqanku challwiri kasqankurayku.

¹⁹ Jesustajrí paykunata nerqa: Jaku noqawan, yachachisqay kanaykichejpaj. Challwata jap'inaykichejtaqa, noqa yachachisqaykichej runakunata mask'ayta qhatinawankupaj, nispa.

²⁰ Paykunataj chay kikinpi challwa jap'ina ch'ipankuta saqerparispa, Jesuswan rerqanku.

²¹ Astawan ñawpajman risparí, Jesús iskay wawqekunatawan rikullarqataj: Santiagota, Juantawan. Paykunaqa Zebedeoj churinkuna karqanku, jinataj uj botepi Zebedeo tatankuwan kasharqanku, challwa jap'ina ch'ipankuta t'irispa. Jesusqa paykunatapis wajyallarqataj yachachisqankuna kanankupaj.

²² Chay kikinpitaj paykunapis boteta, tatankutawan saqerpayaspa, Jesuswan rillarqankutaj.

Jesús ashkha runaman yachachin

²³ Jesús tukuynin Galilea jap'iyta muyumorqa, sapa llajtapitaj tantakunanku wasikunapi Diosmanta sumaj willayta willararqa. Jinallataj chay llajtakunapi tiyakojkunata tukuy imaymana onqoykunamanta, nanaykunamantawan qhaliyacherqa.

²⁴ Jinapi tukuy Siria cheqanejpipis Jesús atiyniyoj kasqanmanta uyarerqanku. Chayrayku chay mana judío kajkunapis Jesusman aparqanku, pikunachus tukuy imaymana onqoykunawan, ñak'ariykunawan, nanaykunawan ima kajkunata. Apallarqankutaj supayniyojkunata, t'uku onqoyniyojkunata, suchukunata ima. Jesustaj paykunata qhaliyacherqa.

²⁵ Chaypacha ashkha runakuna Jesuspa qhepanta risharqanku Galileamanta, Decapolismanta, Jerusalenmanta, Judeamanta, Jordán mayoj chimpanmanta ima.