San Mateo 27 - DIOSPA QHELQACHISQAN DEUTEROCANONICAL

Jesusta kamachej Pilatoman pusanku

¹ Sut'iyamojtin, kuraj kaj sacerdotekuna, judiokunaj kurajninkukuna ima juntapi tantakuspa, yachachinakorqanku Jesusta wañuchichinankupaj.

² Chantá Jesuspa makinta wataspa, Romamanta kamachej Pilatoman pusarqanku.

Judas sipikun

³ Chantá wasanchaj Judasqa Jesusta wañunanpaj juchachasqata rikuspa, sonqonta nanachikorqa. Chayrayku chay kinsa chunka qolqeta kuraj sacerdotekunaman, kurajkunaman ima kutichiporqa.

⁴ Paykunatataj nerqa: Juchallini chay mana juchayojta wañuchisqa kananpaj jaywaykuspa, nispa. Paykunatajrí nerqanku: Chaymantaqa ni ima ruwanayku kanchu. Qan imanaypis ari, nispa.

⁵ Chantá Judasqa Templo ukhupi qolqeta qhallirparispa, riporqa. Chaymantataj sipikamorqa.

⁶ Jinapi kuraj sacerdotekuna chay qolqeta oqharispa, nerqanku: Kay qolqetaqa mana Diosman jaywana qolqetawan khuska waqaychayta atisunmanchu, imaraykuchus kay qolqeqa runa wañuchinapaj pagana qolqe, nispa.

⁷ Chantá paykunapura parlanakuspa, chay qolqewan Manka Llut'ajpa Jallp'an sutiwan rejsisqa jallp'ata ranterqanku. Chaytaj karqa Jerusalenpi karu llajtayojkuna wañojtinku, chaypi p'ampanankupaj.

⁸ Chayrayku chay jallp'aqa kunankama Yawar Jallp'a sutiyoj.

⁹ Ajina junt'akorqa Diosmanta sut'inchaj Jeremiaspa nisqan: Kinsa chunka qolqeta jap'erqanku, imaraykuchus Israelpa churinkunaqa chay chhikalla pay valesqanta nerqanku.

¹⁰ Chay qolqewantaj Manka Llut'ajpa Jallp'anta ranterqanku, imaynatachus Tata Dios kamachiwasqanman jina, nispa.

Jesusqa Pilatoj ñawpaqenpi

¹¹ Chantá judío kurajkunaqa Jesusta Romamanta kamachej Pilatoj ñawpaqenman pusarqanku, Pilatotaj Jesusta taporqa: Qanchu judiokunaj kuraj kamachejninku kanki? nispa. Jesustaj kuticherqa: Arí, qan ninki, nispa.

¹² Kuraj sacerdotekuna, judiokunaj kurajninkukunawan ima Jesusta ch'ataykushajtinku, pay mana imatapis kutichikorqachu.

¹³ Chayrayku Pilatoqa Jesusta taporqa: Manachu uyarinki contraykita tukuy imamanta ch'ataykususqankuta? nispa.

¹⁴ Chaywanpis Jesús manapuni ni uj simillatapis kuticherqachu, chaymantataj Pilato mayta t'ukusharqa.

Jesusta wañunanpaj juchachanku

¹⁵ Sapa Pascua raymipi Pilatoqa uj presota kacharichejpuni, mayqentachá runakuna munaj kanku, chayta.

¹⁶ Chaypachataj Barrabás sutiyoj uj runa carcelpi wisq'asqa kasharqa. Payqa manchay uyarisqa karqa millayta ruwaj runamanta.

¹⁷ Jinapi Pilatoqa tantasqa runakunata taporqa: Pitataj kacharichinayta munawajchej: Barrabastachu, chayrí Jesustachu, pitachus Diospa kachamusqan Cristo ninkichej, chayta? nispa.

¹⁸ Pilato repararqa judío kurajkuna Jesusta envidiakuspa, payman pusamusqankuta.

¹⁹ Jinapi Pilato juzgananpaj kashajtin, warmin nichimorqa: Ama imatapis ruwaychu chay cheqan kaj runawanqa, imaraykuchus payrayku kunan ch'isi mancharikunata mosqokorqani, nispa.

²⁰ Chantá kuraj sacerdotekuna, kurajkunawan imaqa runakunaman yachaykucherqanku Pilatota ninankupaj Barrabasta kacharichinanta, Jesustataj wañuchichinanta.

²¹ Pilatotajrí ujtawan taporqa: Mayqentataj kacharichinayta munankichejri? nispa. Paykunataj kuticherqanku: Barrabasta, nispa.

²² Chaymantataj Pilato taporqa: Imanasajtaj Cristo nisqa Jesuswanri? nispa. Tukuyninkutaj uj kunkalla qhaparerqanku: Cruzman chakatasqa kachun, nispa.

²³ Pilato nillarqataj: Ima mana allin kajtataj pay ruwarqari? nispa. Paykunarí astawan qhaparerqanku: Cruzman chakatachiy ari, nispa.

²⁴ Chaypacha Pilato astawan ch'ajwa jatarisqanta rikorqa, mana imanayta atispataj, yakuta apachimorqa. Chay runakunaj ñawpaqenpitaj makinta mayllakuspa, nerqa: Mana noqachu juchayoj kani kay cheqan runaj wañuyninmantaqa. Qankunamin juchayoj kankichej, nispa.

²⁵ Runakunataj kuticherqanku: Noqayku, chantá wawaykukuna ima kay runaj wañuchisqa kasqanmanta juchayoj kasqayku kachun, nispa.

²⁶ Ajinamanta Pilatoqa Barrabasta kacharicherqa, Jesustataj jasut'ichispa, soldadonkunaman jaywaykorqa, cruzman chakatanankupaj.

²⁷ Chaymanta Pilatoj soldadonkunaqa Jesusta kamachina wasiman pusaspa, soldadokunata Jesuspa muyuyninpi tantacherqanku.

²⁸ Jinaytawantaj, Jesuspa p'achankunata lluch'uspa, uj puka p'achawan payta p'achallicherqanku.

²⁹ Jesuspa umanmantaj simp'asqa khishka pilluta churaykorqanku, paña makinmantaj uj soqoso k'aspita. Chantá ñawpaqenman qonqoriykukuspa, mayta alqochakorqanku: Jallalla, kawsachun judiokunaj kuraj kamachejninku, nispa.

³⁰ Chay soldadokunataj Jesusman thoqaykuspa, soqoso k'aspiwan umanpi wajtallarqankutaj.

³¹ Ajinata sayk'unankukama paymanta alqochakorqanku. Chantá puka p'achata lluch'uspa, Jesuspa p'achanta churaykaporqanku. Chaymantataj payta pusarqanku cruzman chakatanankupaj.

Jesusta cruzman chakatanku

³² Chay soldadokuna Jesuswan llajtamanta llojsishaspa, tinkukorqanku Cirenemanta Simón sutiyoj uj runawan. Soldadokunataj paywan mana munashajta Jesuspa cruzninta apacherqanku.

³³ Chantá Gólgota nisqa cheqaman chayarqanku. Chay niyta munan: T'ojlu Moqo.

³⁴ Chaypitaj soldadokunaqa Jesusman jayaq'ewan chajrusqa vinota qoyta munarqanku. Jesustajrí llamirispa, mana ujyayta munarqachu.

³⁵ Jinapi Jesusta cruzman chakatarqanku. Chaymantataj soldadokuna suerteta choqaspa, Jesuspa p'achankunata rak'inakorqanku. Ajinamanta Diosmanta ñawpa sut'inchajpa nisqan junt'akorqa: P'achaykunata rak'inakorqanku suerteta choqaspa, nispa.

³⁶ Chaymantataj soldadokuna chaypi tiyaspa, qhawasharqanku.

³⁷ Jesuspa cruzninpi, uman patanejpi kay jina uj qhelqasqata churarqanku imamantachus juchachasqankuta rejsichispa: Kayqa Jesús, judiokunaj kuraj kamachejninku, nispa.

³⁸ Jinallataj Jesuswan khuska iskay suwatapis chakatallarqankutaj, ujninta Jesuspa pañanman, ujnintataj lloq'enman.

³⁹ Chaynejta purejkunataj umankuta khiwirispa, Jesusta mayta turiyarqanku.

⁴⁰ Nerqankutaj: Yaw, qan nisqanki Templota thuñinaykita, kinsa p'unchaypitaj watej sayachinaykita. Kunantajrí Diospa Churinchus kanki chayqa, qan kikiykita qhespichikuy, chay cruzmantataj urayk'amuy ari, nispa.

⁴¹ Ajinallatataj, kuraj sacerdotekunapis, Diospa kamachisqanmanta yachachejkunawan, kurajkunawan ima alqochakorqanku, nerqankutaj:

⁴² Kay runaqa wajkunata qhespicherqa. Chaywanpis pay kikin mana qhespichikuyta atinchoqa. Sichus pay Israelpa kuraj kamachejnin chayqa, kunanpacha cruzmanta urayk'amuchun. Noqaykutaj paypi atinikusqayku.

⁴³ Pay nillasqataj Diospi atinikusqanta. Kunantaj Dios kacharichichun ari, sichus payta munakun chayqa, imaraykuchus pay nerqa: Diospa Churin kani, nispa.

⁴⁴ Kikillantataj alqochakorqanku, pikunachus paypa qayllanpi cruzman chakatasqa kasharqanku, chay suwakunapis.

Jesús wañun

⁴⁵ Chantá chawpi p'unchaymanta kinsa kaj phanikama tukuy chay cheqa laqhayaykorqa.

⁴⁶ Chaypacha Jesús sinch'ita qhaparerqa: Elí, Elí, lema sabactani? nispa. Chay niyta munan: Diosníy, Diosníy, imaraykutaj saqerpariwankiri? nispa.

⁴⁷ Chaypi kajkunamanta wakinkuna chayta uyarispa, nerqanku: Uyariychej, payqa Diosmanta ñawpa sut'inchaj Eliasta wajyakushan, nispa.

⁴⁸ Ujnintaj usqhay usqhayta phinkispa, soqoso k'aspiman esponjata wataykuytawan, k'allku vinoman chhapuykorqa, Jesuspa siminmantaj ch'onqananpaj qayllacherqa.

⁴⁹ Wakinkunatajrí alqochakuspa, nerqanku: Suyarillay, qhawasunchej, ichachus Elías jamuspa kacharichenqa, nispa.

⁵⁰ Chantá Jesús ujtawan sinch'ita qhaparispa, wañuporqa.

⁵¹ Chaypachallataj Templopi jatun velo ujllata iskayman llik'irparikorqa patamanta urakama. Jallp'ataj sinch'ita ikhakorqa, chhankakunapis phatararqanku.

⁵² Jinallataj aya p'ampanakunapis kicharikorqanku. Diospa ashkha ajllasqankunataj wañusqamanta kawsarimorqanku.

⁵³ Paykuna maypichus p'ampasqa kasqankumanta llojsispa, Diospa ajllakusqan llajta Jerusalenman yaykorqanku, Jesús kawsarimpusqanmantaña. Chaypitaj ashkha runaman rikhurerqanku.

⁵⁴ Chaypacha romano soldadokunaj kuraj kamachejninku, chantá Jesusta qhawasharqanku, chay soldadokunawan ima jallp'ata ikhakojta, chay waj imakunatawan ima rikorqanku. Chayrayku maytapuni mancharikuspa, nerqanku: Kay runaqa Diospa Churinpuni, nispa.

⁵⁵ Chay qayllapi ashkha warmikunapis kashallarqankutaj karullamanta qhawaspa. Paykunaqa Galileamantapacha Jesusta yanapaspa qhatisqanku.

⁵⁶ Chay warmikuna ukhupi kasharqanku María Magdalena, Santiagoj, Josejpatawan mamanku María, Zebedeoj churinkunaj mamanku ima.

Jesusta p'ampaykunku

⁵⁷ José sutiyoj uj qhapaj runa karqa, Arimatea llajtayoj. Paypis Jesusta qhatejkunamanta ujnin karqa.

⁵⁸ Ch'isiyaykushajtintaj, payqa Pilatoman qayllaykuspa, mañarqa Jesuspa ayanta qonanta. Pilatotaj soldadonkunata kamacherqa ayata payman qonankuta.

⁵⁹ Chantá Joseqa Jesuspa ayanta cruzmanta urayk'uchiytawan, linomanta ruwasqa llimphu sabanawan mayt'uykorqa.

⁶⁰ Chaymantataj, chhankapi ruwasqa mosoj aya p'ampanaman ayata churaykorqa, mayqentachus José paypaj ruwachikusqa, chayman. Chantá uj jatun rumiwan aya p'ampanaj yaykunanta wisq'aykuspa, riporqa.

⁶¹ Chaypacha María Magdalena, chay waj Mariawan ima aya p'ampanaj ñawpaqenpi tiyashaspa, imaynatachus p'ampasqankuta qhawasharqanku.

Aya p'ampanata qhawaj soldadokuna

⁶² Q'ayantenqa, samarina p'unchay karqa. Chay p'unchaypitaj kuraj sacerdotekuna, fariseokuna ima Pilatoman rispa,

⁶³ nerqanku: Wiraqochi, chay ch'awka runa kawsashasparaj imatachus nisqanta yuyarikuyku. Pay nerqa: Kinsa p'unchaymanta kawsarimpusaj, nispa.

⁶⁴ Chayrayku soldadokunata kachay ari, kinsa p'unchaykama, maypichus p'ampasqa kashan, chayta qhawanankupaj. Manachayqa yachachisqankuna jamuspa, ayanta suwankuman, chaymantataj ninkuman: Jesús wañusqamanta kawsarimpun, nispa. Jinaqa chay llullerio aswan millay kanman ñawpajmanta nisqaqa, nispa.

⁶⁵ Chantá Pilato paykunata nerqa: Kay qhawaj soldadokunata pusaychej, aya p'ampanata sumajta waqaychaykuspa qhawanankupaj, nispa.

⁶⁶ Paykunataj rispa, chay aya p'ampanaj yaykunanta sumajta wisq'aykorqanku. Chay wisq'ana rumita kamachejpa sellonwan sellaykuspataj, qhawaj soldadokunata churarqanku.