San Mateo 22 - DIOSPA QHELQACHISQAN DEUTEROCANONICAL

Casarakupi jatun mikhunamanta rijch'anachina

¹ Jesús ujtawan rijch'anachinawan paykunata yachacherqa:

² Diospa janaj pacha kamachiynenqa rijch'akun uj kuraj kamachejman, pichus churin casarakushajtin, jatun mikhuyta wayk'uchisqa, chayman.

³ Chantá kuraj kamachejqa kamachinkunata kachasqa jatun mikhuyman wajyarisqa kajkunata pusamunankupaj. Wajyasqakunarí mana jamuyta munasqankuchu.

⁴ Chayrayku kuraj kamachejqa waj kamachinkunatañataj kachasqa, ajinata ninankupaj: Jatun mikhuna wakichisqaña. Wirayachisqa uywaykunata, wira toroykunata ima ñak'anankupaj kamachiniña. Chayrayku casaraku raymiman jamullaychejña, nispa.

⁵ Chaywanpis wajyasqakunaqa mana kasusqankuchu, manachayqa ujnin chajranman ripusqa, ujnintaj qhatunman.

⁶ Wakinkunataj kuraj kamachejpa kachankunata jap'ispa, wañuchinankukama maqaykusqanku.

⁷ Jinapi kuraj kamachejqa chayta uyarispa, anchatapuni phiñakusqa. Chayrayku uj tropa soldadokunata kachasqa, chay runa wañuchejkunata tukuchinankupaj, llajtankutataj ruphaykuchinankupaj ima.

⁸ Chaymantataj wakin kamachinkunata nisqa: Casamientopaj jatun mikhoyqa wakichisqaña chaypis, chay wajyasqakunaqa mana chayman jamunankupaj jinachu karqanku.

⁹ Kunanqa qankuna ñankunaman rispa, tukuy tarisqaykichej runata casarakuy raymiman wajyamuychej, nispa.

¹⁰ Kamachikunataj ñankunaman llojsispa, tarisqanku kaj chhikata wajyasqanku, allin kajkunata mana allin kajkunatapis. Ajinamanta raymi waseqa chay wajyasqakunawan junt'aykusqa.

¹¹ Chantá kuraj kamachejqa wajyasqankunata qhawarej yaykusqa, chaypitaj uj runata mana casamiento p'achayojta rikusqa.

¹² Nisqataj: Kawsaqéy, imajtintaj kayman yaykumorqanki mana casamiento p'achayojri? nispa. Chay runarí ch'inlla kakusqa.

¹³ Jinapi kuraj kamachejqa kamachinkunata nisqa: Kay runataqa chakin, makin watasqata jawa laqhaman wijch'uychej, maypichus waqay, kiru k'arukuytaj kanqa, chayman, nispa.

¹⁴ Noqataj niykichej: Ajina ari, wajyasqakunaqa ashkha kanku, ajllasqakunatajrí pisilla, nispa.

Impuestota paganamanta

¹⁵ Chantá fariseokuna tantakuspa, yachachinakorqanku imaynatachus Jesusta ima nisqanpipis pantajtin, ch'ataykunankupaj.

¹⁶ Paykunataj wakin fariseo masinkunata, herodianokunatawan ima kacharqanku Jesusta nimunankupaj: Yachachej Wiraqochi, qan cheqanta parlaj kasqaykita yachayku, Diosta kasunatataj cheqanta yachachisqaykita ima. Qan manallataj pejpa nisqantapis kasunkichu, nitaj runaj uyanta qhawarispallachu imatapis ruwanki.

¹⁷ Niwayku ari: Allinchu kanman Romapi kuraj kamachej Cesarman impuestota pagana, manachu? nispa.

¹⁸ Jesustajrí mana allin sonqowanchu tapusqankuta yachaspa, nerqa: Qankunaqa puraj uya kankichej. Imaraykutaj pantachiwayta munankichejri?

¹⁹ Impuesto pagana uj phisuta rikuchiwaychej, nispa. Paykunataj uj phisuta jaywarqanku.

²⁰ Chantá Jesús paykunata taporqa: Pejpa uyantaj, chantá pejpa sutintaj kay phisupi churasqa kashanri? nispa.

²¹ Paykunataj kuticherqanku: Cesarpata ari, nispa. Jesustaj kuticherqa: Jina kajtenqa, Cesarpata kajtaqa Cesarman qopuychej. Diospata kajtatajrí Diosman qopuychej, nispa.

²² Paykunataj chayta uyarispa, mayta t'ukorqanku, chantá riporqanku.

Wañusqakuna kawsarimunankumanta

²³ Chay p'unchayllataj saduceokunapis Jesusman jamorqanku, pikunachus ninku wañusqamanta kawsarimuy mana kasqanta, chaykuna. Paykunataj Jesusta taporqanku:

²⁴ Yachachej Wiraqochi, Moisés kamacherqa: Casarasqa qharichus warminwan manaraj wawayoj kashaspa wañun chayqa, wawqen chay warmisapawan casarakuchun, ajinamanta wañoj wawqenpa miraynin ama chinkananpaj, nispa.

²⁵ Noqayku ukhupi qanchis wawqekuna karqanku. Kuraj kaj casarakorqa, chaymantataj mana unayninmanchu mana wawayoj wañuporqa. Chantá, iskay kaj wawqe chay warmisapawan casarakorqa.

²⁶ Jinapi iskay kaj wawqepis wañupullarqataj. Ajinamanta qanchisnintin chay warmiwan casarakuspa, mana wawayoj wañuporqanku.

²⁷ Tukuyninkoj qhepantataj chay warmipis wañupullarqataj.

²⁸ Kunan niwayku: Sichus qanchisnintin paywan casarakorqanku chayqa, wañusqamanta kawsarimuy p'unchaypi chay warmeqa mayqenpa warmintaj kanqari? nispa.

²⁹ Chantá Jesús paykunaman kuticherqa: Qankunaqa pantashankichej, mana Diospa Qhelqachisqanta, nitaj Diospa atiynintapis yachasqaykichejrayku.

³⁰ Wañojkuna kawsarimojtinkoqa, qharipis, warmipis manaña casarakonqankuchu, manachayqa janaj pachapi angelkuna jinallaña kanqanku.

³¹ Wañusqakunaj kawsarimuyninmantaqa, manachu ñawirerqankichej Dios imatachus nisqanta? Pay kay jinata nerqa:

³² Noqa Abrahampa Diosnin kani, Isaacpata, Jacobpata ima, nispa. Diosqa mana wañusqakunaj Diosninkuchu, manachayqa kawsajkunajta, nispa.

³³ Chay imakunata uyarispa, runakunaqa Jesuspa yachachisqanmanta t'ukorqanku.

Aswan kuraj kaj kamachisqa

³⁴ Maypachachus fariseokunaqa yachasqanku Jesús saduceokunata ch'inyachisqanta chaypacha, paykunañataj tantakuspa, Jesusta tapoj rerqanku.

³⁵ Chantá Diospa kamachisqanmanta ujnin yachachej Jesusta pantachiyta munaspa, taporqa:

³⁶ Yachachej Wiraqochi, Diospa tukuy kamachisqakunamanta mayqentaj aswan kurajri? nispa.

³⁷ Jesustaj kuticherqa: Tukuyta Kamachej Diosniykitaqa tukuy sonqoykiwan munakunki, tukuy almaykiwan, tukuy yuyayniykiwantaj.

³⁸ Chaymin Diospa kamachisqankunamanta aswan kuraj, ñawpaj kajtaj.

³⁹ Qhepan kaj kamachisqapis ñawpaj kajman rijch'akullantaj: Runa masiykita munakunki qan kikiykita jina, nispa.

⁴⁰ Kay iskay kamachisqakunapi tukuy kamachisqakuna junt'akun, Diosmanta sut'inchajkunaj nisqankupis, nispa.

Pejpa churintaj Cristori?

⁴¹ Fariseokuna tantasqa kashajtinkuraj, Jesús paykunata taporqa:

⁴² Ima ninkichejtaj Cristomanta? Pejpa Churintajri? nispa. Paykunataj kuticherqanku: Payqa Davidpa Churin, nispa.

⁴³ Jinapi Jesús nerqa: Chantá imaraykutaj Davidqa Santo Espiritunejta Cristota nerqa: Tukuyta Kamachejníy, nispa? David ajinata nerqa:

⁴⁴ Tata Diosqa Tukuyta Kamachejniyta nerqa: Kay pañaynejpi tiyarikuy, awqaykikunata chakiyki uraman churanaykama, nispa.

⁴⁵ Sichus kikin David Cristota Tukuyta Kamachejníy nin chayqa, imaynamantataj Cristoqa Davidpa Churin kanmanri? nispa.

⁴⁶ Mana pipis kutichiyta atispa, chaymantapacha manaña pipis astawan taporqachu.