San Mateo 19 - DIOSPA QHELQACHISQAN DEUTEROCANONICAL

Qhari warmi mana t'aqanakunamanta

¹ Jesús chay tukuy imata niytawan, Galilea suyumanta riporqa, jinataj Jordán mayoj inti llojsimuy chimpanpi Judea cheqanejman chayarqa.

² Chantá ashkha runakuna Jesuspa qhepanta chayman rerqanku, chaypitaj pay onqosqakunata qhaliyacherqa.

³ Chaypacha wakin fariseokuna Jesusman chimpaykorqanku, payta pantachiyta munaspataj, taporqanku: Qhareqa warminmanta imallamantapis t'aqakuyta atillanmanchu? nispa.

⁴ Jesustaj kuticherqa: Manachu Diospa Qhelqachisqanpi ñawirerqankichej, imaynatachus kay pachata ruwaj Diosqa qallariypi qharitawan, warmitawan ruwasqanta?

⁵ Chayrayku qhareqa tatanta, mamanta ima saqespa, warminwan khuskachakapun. Iskayninkutaj uj runa jinallaña kanku.

⁶ Ajinapeqa manaña iskaychu kanku, manachayrí ujllaña. Chayrayku, Diospa ujchasqantaqa ama pipis t'aqachunchu, nispa.

⁷ Chantá fariseokuna ujtawan tapullarqankutaj: Jinachus chayqa, imaraykutaj Moisés kamacherqa qhareqa t'aqanaku papelta warminman jaywaspa, payta kachapunantari? nispa.

⁸ Jesustaj kuticherqa: Qankuna rumi sonqo kasqaykichejraykumá Moisesqa warmiykichejmanta t'aqakunaykichejta saqesorqachej. Chaywanpis qallariypeqa mana jinachu karqa.

⁹ Chayrayku niykichej: Sichus pipis warminmanta t'aqakun mana pay wajwan wasanchaspa khuchichakojtillan, sitajchus waj warmiwan casarakun chayqa, chay runaqa khuchichakuspa qhenchachakun, nispa.

¹⁰ Chantá Jesuspa yachachisqankuna nerqanku: Sichus ajinata qhareqa warminwan kawsanan kashan chayqa, mana allinchu casarakunaqa, nispa.

¹¹ Jesustaj kuticherqa: Mana tukuychu kay yachachisqayta entiendeyta atinku. Manachayqa pikunamanchá Dios kayta entiendenankupaj yachayta qon, chaykunalla.

¹² Wakin qharikunaqa paqarikusqankumantapacha mana casarakunankupaj jinachu kanku, wakintataj runakuna capanku ama casarakunankupaj. Wakinkunatajrí munasqankuraykulla mana casarakunkuchu, Diospa janaj pacha kamachiyninrayku ruwanankuta junt'anankupaj. Pichus kay nisqayman jina kayta atejqa tukuy sonqo jap'ikuchun, nispa.

Jesús wawakunata saminchan

¹³ Uj kuti wakin tata mamakuna wawankukunata Jesusman pusamorqanku, paykunata makinwan llankhaykuspa Diosmanta mañapunanpaj. Yachachisqankunatajrí chay pusamojkunata k'amerqanku.

¹⁴ Jesustajrí yachachisqankunata nerqa: Wawakuna noqaman jamojta saqellaychej, amataj jark'aychejchu, imaraykuchus kay wawakuna jina kajkunalla Diospa janaj pacha kamachiyninman yaykonqanku, nispa.

¹⁵ Chantá Jesús wawakunata Diospa sutinpi saminchaytawan, chaynejmanta riporqa.

Qhapaj runa Jesuswan parlarikun

¹⁶ Chaypacha uj runa Jesusman qayllaykuspa, nerqa: Yachachej Wiraqochíy, ima allin kajtataj ruwasaj wiñay kawsayniyoj kanaypajri? nispa.

¹⁷ Jesustaj kuticherqa: Imaraykutaj allin kajmanta tapuwankiri? Mana pipis allin kanchu, manachayqa Dioslla. Sichus paypa kamachiyninman yaykuyta munanki chayrí, Diospa tukuy kamachisqankunata junt'ay, nispa.

¹⁸ Chantá chay runa taporqa: Mayqen kamachisqakunatataj junt'anay tiyanri? nispa. Jesustaj kuticherqa: Ama runata wañuchinkichu, ama khuchichakuspa qhenchachakunkichu, ama suwankichu, ama llulla testigomantapis sayankichu.

¹⁹ Chantá tataykita, mamaykitapis jatunpaj qhaway, jinallataj runa masiykitapis qan kikiykita jina munakuy, nispa.

²⁰ Chay runataj nerqa: Noqa chaykunata junt'aniña. Imatawanraj ruwanay tiyanri? nispa.

²¹ Chantá Jesús payta nerqa: Sichus maychus kajta Diospa munayninta junt'ayta munanki chayqa, tukuy kapuyniykita vendemuspa, wajchakunaman chay qolqeta rak'iray. Ajinamanta janaj pachapi tukuy imayoj kanki. Chaymantataj kutimuspa, yachachisqay kanaykipaj noqata qhatiway, nispa.

²² Chay runarí Jesuspa nisqanta uyarispa, may llakisqa riporqa, imaraykuchus pay may jina qhapaj karqa.

²³ Chantá Jesús yachachisqankunata nerqa: Kayta sut'ita niykichej: Qhapaj runaqa ñak'ayllata Diospa janaj pacha kamachiyninman yaykonqa.

²⁴ Ujtawan niykichej: Astawanqa camelloraj yarwej ninrinta yaykuyta atinman, Diospa kamachiyninman qhapaj runa yaykunanmantaqa, nispa.

²⁵ Chayta uyarispa, Jesuspa yachachisqankuna maytapuni t'ukorqanku, nerqankutaj: Jina chayqa, pitaj qhespichisqa kayta atinmanri? nispa.

²⁶ Jesustaj paykunata qhawarispa, nerqa: Runapajqa chay mana atikunchu, Diostajrí tukuy imata ruwayta atin, nispa.

²⁷ Jinapi Pedroqa Jesusta nerqa: Noqaykoqa qanwan purinaykupaj tukuy kapuyniykuta saqerparerqayku. Chayta ruwasqaykurayku imatataj noqayku jap'isqaykuri? nispa.

²⁸ Chantá Jesús paykunata nerqa: Kayta sut'ita niykichej: Tukuy ima mosojman tukojtin, noqa Runaj Churin kamachinay jatun tiyanapi tiyaykukusaj. Chaypachataj noqawan purisqaykichejrayku, qankunapis chunka iskayniyoj kamachina tiyanapi tiyaykukullankichejtaj, Israelpa chunka iskayniyoj jatun ayllukunata juzganaykichejpaj.

²⁹ Pillapis noqata qhatinawanrayku wasinta saqerparin, wawqenkunata, panankunata, chayrí tatanta, mamanta, warminta, jinallataj wawankunata, jallp'ankunata ima, chay runamanqa Dios pachaj kutita qoponqa, chay runataj wiñay kawsayniyoj kanqa.

³⁰ Chaywanpis pikunachus kunan jatunpaj qhawasqa kanku, chaykunaqa qhepaman pisipaj qhawasqa kanqanku. Pikunachus kunan pisipaj qhawasqa kajkunarí, chay p'unchaypi jatunpaj qhawasqa kanqanku, nispa.