San Mateo 16 - DIOSPA QHELQACHISQAN DEUTEROCANONICAL

Fariseokuna t'ukunata ruwananta ninku

¹ Uj kuti fariseokuna, saduceokunawan ima imaynallapipis Jesusta pantachiyta munaspa, payman qayllaykorqanku. Chantá runaj mana jayk'aj rikusqan t'ukunata ruwananta mañallarqankutaj, jinapi Diosmanta jamusqanta yachanankupaj.

² Jesustajrí kuticherqa: Ch'isiyaykushajtin, qankuna ninkichej: Q'aya sumaj p'unchay kanqa, imaraykuchus janajpi phuyu pukata antawaramushan, nispa.

³ Tutamantataj ninkichej: Kunanqa sinch'ita paranqa, imaraykuchus janajpi puka yanata phuyuykamushan, nispa. Puraj uya, qankunaqa phuyuta qhawarispa, yachankichej imayna p'unchaychus kananta. Chantá imaraykutaj kunan tiempopi imachus kananmanta señalkunata mana rejsinkichejchuri?

⁴ Qankunaqa millayta ruwajkuna, qhenchachakoj runaj miraynintaj kaspa, runaj mana jayk'aj rikusqan t'ukunata ruwanayta niwankichej. Chaywanpis mana ima t'ukuna señaltapis rikuchisqaykichejchu, manachayqa Jonaswan imachus karqa, chayllata, nispa. Chantá paykunata k'akillata saqespa, Jesús riporqa.

Fariseokunaj levadurankumanta rijch'anachina

⁵ Jesuspa yachachisqankunaqa qocha chimpaman chayaspa, t'antata mana apamusqankuta repararqanku.

⁶ Chaypachallataj Jesús nerqa: Allinta qhawakuspa, karunchakuychej fariseokunaj levadurankumanta, saduceokunajmantawan, nispa.

⁷ Yachachisqankunataj paykunapura ninakorqanku: Kaytaqa t'antata mana apamusqanchejraykuchá nishawanchej, nispa.

⁸ Jesustajrí imatachus ninakusqankuta yachaspa, paykunata ujtawan k'amerqa: Imaraykutaj mana t'anta kasqanrayku siminakushankichejri? Qankunaqa pisillataraj noqapi atinikunkichej.

⁹ Manarajchu entiendenkichej, nitajchu yuyarikunkichej imaynatachus phishqa t'antallawan 5.000 runakunata mikhuchisqayta, puchoj t'antatataj qankuna mashkha canastatachus oqharisqaykichejta?

¹⁰ Jinallataj qanchis t'antamanta, 4.000 runakunaman mikhuchejtiy, manachu yuyarikunkichej mashkha canasta junt'atachus puchoj t'antata oqharisqaykichejta?

¹¹ Imajtintaj mana entiendenkichejchu mana t'antamantachu qankunaman parlashasqayta? Noqa ujtawan niykichej: Allinta qhawakuychej fariseokunaj levadurankumanta, saduceokunajmantawan, nispa.

¹² Chaymantaña yachachisqankunaqa yuyayninkuman churakorqanku Jesusqa mana t'anta ruwana levaduramantachu parlashasqanta, manachayqa fariseokunaj, chantá saduceokunaj yachachisqankumanta.

Pedroqa Jesús Diospa kachamusqan Cristo kasqanta nin

¹³ Maypachachus Jesús Filipoj kamachisqan Cesarea llajta qayllaman chayarqa chaypacha, yachachisqankunata taporqa: Runakunaqa Runaj Churin pi kasqantataj ninkuri? nispa.

¹⁴ Paykunataj kuticherqanku: Wakinkunaqa Bautizaj Juan kasqaykita ninku, wajkunataj Elías kasqaykita, wakinkunataj Jeremías, chayrí Diospa ñawpa sut'inchajkunamanta ujnin kaj, nispa.

¹⁵ Jesús tapullarqataj: Qankunarí, pi kasqaytataj ninkichejri? nispa.

¹⁶ Chantá Simón Pedro kuticherqa: Qanqa Diospa kachamusqan Cristo kanki, kawsaj Diospa Churin, nispa.

¹⁷ Chaymanta Jesús nerqa: Kusikuyniyojmin kanki Simón, Jonaspa churin. Chaytaqa mana runachu sut'inchasunki, manachayrí, janaj pachapi kashaj Tata Diosniy chayta sut'inchasunki.

¹⁸ Noqataj niyki: Qanqa Pedro kanki, kay chhanka patapitaj iglesiayta sayarichisaj. Ukhu pachaj atiyninpis mana iglesiaytaqa atipayta atenqachu.

¹⁹ Noqataj qanman qosqayki Diospa janaj pacha kamachiyninman yaykunapaj llavekunata. Imatachus kay pachapi mana ruwanachu nispa ninki chayqa, janaj pachapipis chay nisqayki jinallataj kanqa. Imatachus kay pachapi ruwana walejlla nispa ninki chayqa, janaj pachapipis nisqaykiman jinallataj kanqa, nispa.

²⁰ Chaymantataj Jesusqa yachachisqankunata mayta kamacherqa amapuni pimanpis willanankuta pay Diospa kachamusqan Cristo kasqanta.

Jesús wañunanmanta willan

²¹ Chaymantapacha Jesusqa yachachisqankunaman willayta qallarerqa Jerusalenman rinanpuni kasqanta, chaypitaj kurajkuna, Diospa kamachisqanmanta yachachejkuna, kuraj sacerdotekuna ima anchatapuni payta ñak'arichinankuta, wañuchinankuta ima. Chantá nillarqataj kinsa p'unchaymanta wañusqamanta kawsarimpunanta.

²² Jinapi Pedroqa Jesusta sapallanta waj cheqanejman pusaspa, k'amiyta qallarerqa: Tukuyta Kamachej Jesús, amapuni Dios chayta munachunchu. Ama chayta parlallaypischu, nispa.

²³ Jesustajrí kutirikuspa, Pedrota nerqa: Riy kaymanta, Supay Satanás. Qanqa mana Diospa munasqanman jinachu yuyashanki, manachayqa runa jinalla, nispa.

²⁴ Chaymanta Jesús yachachisqankunata nerqa: Pillapis yachachisqay kayta munajqa munasqanman jinalla purinanta saqechun, cruzninta oqharispataj, qhepayta jamuchun.

²⁵ Pichus noqata kasunawanmanta nisqa kawsaynin aswan kasqanta qhawajqa mana wiñay kawsayman yaykonqachu. Chaywanpis pichus noqarayku kawsayninta mana may kasqanta qhawanchu, chay runaqa wiñay kawsayman yaykonqa.

²⁶ Ima allintaj runapaj kanman, sichus kay pachaj tukuy kapuyninta jap'ispapis mana wiñay kawsayman yaykunmanchu chayqa? Manachayqa, imatataj pipis paganman wiñay kawsayniyoj kananpajri?

²⁷ Aswan qhepaman Runaj Churenqa Tatanpa jatun kayninpa lliphipiyninpi jamonqa, angelninkunawan khuska. Chaypachataj pay sapa ujman ruwasqanman jina qoponqa.

²⁸ Kayta sut'ita niykichej: Kaypi kajkunamanta wakin mana wañonqankuchu, Runaj Churinta kamachinanpaj jamushajta rikunankukama, nispa.