San Mateo 15 - DIOSPA QHELQACHISQAN DEUTEROCANONICAL

Imachus runaj sonqonta ch'ichichan

¹ Wakin fariseokuna, Diospa kamachisqanmanta yachachejkuna ima Jerusalenmanta jamorqanku. Chantá Jesusman qayllaykuspa, taporqanku:

² Imaraykutaj yachachisqaykikuna ñawpa tatakunaj usunkuta mana ruwankuchuri? Paykunaqa makinkuta mana mayllakuspalla mikhunata mikhunku, nispa.

³ Jesustajrí tapurerqa: Imaraykutaj qankuna Diospa kamachisqanta p'akinkichej, usuykichejta ruwanaykichejraykuri?

⁴ Dios kamacherqa: Tataykita, mamaykitawan jatunpaj qhawanki, nispa. Nillarqataj: Pichus tatanta, chayrí mamanta maldicejqa wañuchisqa kachun, nispa.

⁵ Qankunarí ninkichej: Pillapis tatanta, chayrí mamanta niyta atin: Imawanchus qankunata yanapanay karqa, chayqa Diospaj t'aqasqaña, nispa.

⁶ Jinaqa manaña tatanta, nitaj mamantapis jatunpaj qhawaspa yanapanqachu. Ajinamanta qankunaqa Diospa kamachisqanta manakajman tukuchinkichej ñawpa usuykichejrayku.

⁷ Qankuna puraj uya kankichej. Qankunamanta Diosmanta sut'inchaj Isaías maychus kajta sut'inchaspa, kay jinata nerqa:

⁸ Dios nin: Kay runakunaqa simillankuwan jatunchawanku, sonqonkupitajrí ni noqamanta yuyarikullankupischu.

⁹ Qhasillata yupaychawanku. Paykunaqa runaj wakichisqallanta yachachinku noqaj kamachisqaypis kanman jina, nispa.

¹⁰ Chantá Jesús runakunata wajyaspa, nerqa: Tukuyniykichej uyariwaychej, sumajtataj entiendeychej:

¹¹ Mana imapis runaj siminman yaykojqa payta Diospa ñawpaqenpi ch'ichichanchu. Manachayqa imachus runaj siminmanta llojsimun, chaymá runataqa Diospa ñawpaqenpi ch'ichichan, nispa.

¹² Jinapi yachachisqankunaqa qayllaykuspa, Jesusta tapurerqanku: Yachankichu chay nisqaykita uyarispa, fariseokuna phiñarikusqankuta? nispa.

¹³ Jesustaj kuticherqa: Ima yurallapis janaj pacha Tataypa mana mallkisqanqa saphinmantapacha t'irasqa kanqa.

¹⁴ Paykunata saqeychej, imaraykuchus ñawsakuna kanku, waj ñawsakunata pusaykachajtaj. Sichus ñawsa runa waj ñawsata pusaykachanman chayqa, iskayninku t'oqoman urmaykonqanku, nispa.

¹⁵ Chaymanta Pedroqa Jesusta nerqa: Ama jina kaspa, chay rijch'anachinawan imatachus niyta munashasqaykita sut'inchawayku ari, nispa.

¹⁶ Jesustajrí kuticherqa: Manarajchu qankunapis entiendenkichej?

¹⁷ Manachu reparankichej tukuy imapis siminejta yaykojqa wijsallaman risqanta, chaymantataj llojsisqanta?

¹⁸ Simimanta imachus llojsejrí runaj sonqonmanta rikhurin. Chaymá runataqa Diospa ñawpaqenpi ch'ichichan.

¹⁹ Runaj sonqon ukhumanta kay imakuna llojsimunku: Millay yuyaykuna, runa wañuchiykuna, khuchichakuspa qhenchachakuykuna, khuchichakuykuna, suwakuykuna, llullakuykuna, Diospa contranta rimaykuna ima.

²⁰ Chay tukuy millay ruwaykunamá runaj sonqonmanta llojsimuspa, Diospa ñawpaqenpi chay runata ch'ichichan. Mana mayllasqa makiwan mikhuyrí mana runata ch'ichichanchu, nispa.

Cananea warmeqa Jesuspi atinikun

²¹ Chantá Jesús Genesaretmanta puririspa, Tiro llajta, Sidón llajta chaynejman rerqa.

²² Chaymantataj mana judío warmeqa Jesusman qayllaykuytawan, jatunmanta parlaspa mañakorqa: Wiraqochíy, Davidpa Churin, khuyarikuway ari. Ususiyta uj supay anchataña ñak'arichin, nispa.

²³ Jesustajrí chay warmiman mana imata kuticherqachu. Chantá Jesuspa yachachisqankuna payman qayllaykuspa, mañarikorqanku: Chay warmita kachapuy, imaraykuchus qhaparispallapuni qhepanchejta jamushan, nispa.

²⁴ Jinapi Jesusqa warmita nerqa: Tata Diosneyqa Israel ayllullata yanapanaypaj kachamuwan, imaraykuchus paykuna chinkasqa oveja jina kashanku, nispa.

²⁵ Chaywanpis chay warmi qayllaykuspa, Jesuspa ñawpaqenpi pampakama k'umuykorqa, chantataj nerqa: Wiraqochíy, ama jina kaspa, yanaparillaway ari, nispa.

²⁶ Jesustajrí kuticherqa: Mana allinchu wawakunamanta t'antankuta qhechuspa, alqokunaman qaranaqa, nispa.

²⁷ Chay warmitajrí nerqa: Arí, Wiraqochíy, chaywanpis alqokunaqa mesa urapi uywajninkoj t'anta t'akasqankuta mikhullankutaj, nispa.

²⁸ Jinapi, Jesús payta nerqa: Warmisita, sinch'itapuni noqapi atinikunki. Chayrayku munasqaykiman jina ruwasqa kachun, nispa. Chaymantapachataj chay warmej ususenqa qhaliyaporqa.

Jesús ashkha onqosqakunata qhaliyachin

²⁹ Jesús chaymanta llojsispa, Galilea qocha kantuman rerqa. Chantá, orqoman wicharispataj, chaypi tiyarikorqa.

³⁰ Ashkha runataj, maypichus Jesús kasharqa, chayman qayllaykorqanku. Paykuna suchukunata pusamorqanku, jinallataj ñawsakunata, opakunata, ñuk'ukunata, waj ashkha onqosqakunatawan ima. Jesuspa ñawpaqenman onqosqakunata qayllachejtinkutaj, Jesús paykunata qhaliyacherqa.

³¹ Jinapi runakunaqa mayta t'ukorqanku opakunata parlajta rikuspa, ñuk'ukunata jaywarejta, suchukunata purirejta, ñawsakunatataj rikojta ima. Chantá paykuna Israelpa Diosninta yupaycharqanku.

Jesús 4.000 runakunaman mikhuchin

³² Chantá Jesús yachachisqankunata wajyaspa, nerqa: Kay runakunamanta khuyarikuni, imaraykuchus kinsa p'unchaytaña noqawan kashanku, manataj imapis mikhunankupaj kanchu. Mana munaymanchu paykunata mana mikhusqata kachapuyta, imaraykuchus ñanpi llawch'iyankuman, nispa.

³³ Yachachisqankunatajrí nerqanku: Kay ch'inpi maypitaj t'antata tarisunman, kay chhika runakunaman mikhuchinanchejpajri? nispa.

³⁴ Jesustaj paykunata taporqa: Mashkha t'antataj kapusunkichejri? nispa. Paykunataj kuticherqanku: Qanchis t'antalla, pisi challwitakunawan ima, nispa.

³⁵ Chantá Jesús runakunata pampapi tiyarakunankuta kamacherqa.

³⁶ Chaymantataj chay qanchis t'antata, challwakunata ima jap'ispa, Diosman pachis nerqa. T'antakunata partiraspataj, yachachisqankunaman jaywarqa runakunaman rak'iranankupaj. Paykunataj ajinata ruwarqanku.

³⁷ Ajinamanta chay tukuy runakuna sajsakunankukama mikhorqanku, yachachisqakunataj puchojta qanchis canasta junt'ata oqharerqanku.

³⁸ Chaypacha mikhojkunaqa 4.000 jina qharikuna karqanku, mana warmikunata, nitaj wawakunata ima yupaspa.

³⁹ Chantá Jesús chay runakunata kacharparipuytawan, boteman wicharispa, Magdala llajta chaynejman rerqa.