San Lucas 8 - DIOSPA QHELQACHISQAN DEUTEROCANONICAL

Jesusta yanapaj warmikuna

¹ Chaymanta Jesús tukuy llajtaman, tukuy ranchoman ima rerqa, Diospa kamachiyninmanta sumaj willayta yachachispa. Paywan khuskataj chunka iskayniyoj kuraj kachankunapis rillarqankutaj.

² Jinallataj wakin warmikunapis paywan khuska rerqanku. Chay warmikunamantaqa Jesús supaykunata qharqosqa, onqoykunamantataj qhaliyachisqa. Chaykuna karqanku: María Magdalena, pimantachus Jesús qanchis supaykunata qharqosqa, chay.

³ Chuzaj warmin Juanapis kallarqataj. Chuza sutiyojqa Herodespa mayordomon karqa. Chantá Susana, waj ashkha warmikuna ima Jesuswan rispa, kapuyninkuwan payta yanapaj kanku.

Tarpoj runamanta rijch'anachina

⁴ Uj kutipi ashkha runakuna tukuy llajtamanta Jesusman jamorqanku. Tantakojtinkutaj, Jesús uj rijch'anachinata paykunaman yachacherqa.

⁵ Pay nerqa: Uj runa tarpoj llojsisqa. Grano mujuta qhallishajtintaj, wakin muju ñannejman urmasqa, chaypitaj purejkuna sarurasqanku. P'isqokunataj jamuspa, mikhukapusqanku.

⁶ Wakin mujutaj rumirara pisi jallp'ayojman urmasqa, p'utumuspataj, ch'akipusqa jallp'a pisi kasqanrayku.

⁷ Wakin mujutaj khishkarara chawpiman urmasqa, chay khishkakunataj chajrawan khuska wiñaspa, p'utumojta p'ampaykusqanku.

⁸ Wakin mujutajrí sumaj jallp'aman urmasqa, p'utumuspataj, poqosqa pachajta sapa mujumanta, nispa. Jesús chayta niytawantaj, aswan jatunmanta nerqa: Pichus nisqayta jap'ikuyta munajqa allinta uyarichun, nispa.

Imapajtaj kay rijch'anachinari?

⁹ Chantá yachachisqankuna Jesusta taporqanku: Ima niytataj munan chay rijch'anachinari? nispa.

¹⁰ Paytaj nerqa: Qankunamanqa Dios kamachiyninmanta pakasqa yachayta rejsichisunkichej. Wajkunamanrí rijch'anachinakunawan parlan, Diospa Qhelqachisqanpi nin jina: Qhawashaspapis, mana rikonqankuchu. Uyarishaspapis, manataj entiendenqankuchu, nispa.

Jesusqa tarpoj runamanta sut'inchan

¹¹ Chantá Jesús nerqa: Chay rijch'anachina kayta niyta munan: Mujoqa Diospa simi nisqanwan ninakun.

¹² Wakin runakuna ninakunku ñan patapi t'akasqa mujuman. Paykuna Diospa simi nisqanta uyarinku. Chaywanpis Kuraj Supay jamuspa, sonqonkumanta Diospa simi nisqanta qhechurparin ama Diospi atinikunankupaj, nitaj qhespichisqa kanankupaj.

¹³ Rumirara jallp'api t'akasqa mujurí ninakun, pikunachus Diospa simi nisqanta uyariytawan kusiywan jap'inku, chaykunaman. Chaywanpis paykuna mana allin saphichasqa kasqankurayku, pisi p'unchayllata Diospi atinikunku, llakiy qhatejtintaj, qhepaman kutiripunku.

¹⁴ Khishkarara jallp'api t'akasqa mujupis uyarejkunawan ninakullantaj. Chaywanpis paykuna kay kawsaymanta phutikuykunawan, qhapaj kayta munanawan, sonqonkoj munayninta ruwayta munanawan ima atipachikunku. Chayraykutaj mana poqonankukama wiñankuchu.

¹⁵ Sumaj jallp'api t'akasqa mujurí ninakun, pikunachus tukuy sonqowan, cheqan yuyaywantaj Diospa simi nisqanta uyarinku, chaykunawan. Paykuna sonqonkupi Diospa simi nisqanta sumajta jap'ikuspa, chaymanta ch'ipakunku. Chantá pacienciawan sumajta poqoj planta jina kanku, nispa.

Lamparamanta rijch'anachina

¹⁶ Jesús nillarqataj: Mana pipis lamparata jap'ichispa, wich'iwan k'umpuykunchu, nitaj puñuna uraman churaykunchu. Aswanpis pataman churan, wasiman yaykojkuna k'anchayniyoj kanankupaj.

¹⁷ Tukuy pakasqa kajpis jinallataj mana sut'inchasqa kajpis sut'inchakonqapuni. Nitaj pakasqallapuni kayta atinchu mana yachakuspaqa, manachayqa sut'inchakonqapuni.

¹⁸ Chayrayku, allinta uyariwaychej ari: Kapuyniyojmanqa Dios astawanraj qonqa. Mana kapuyniyojmantatajrí kapusqanta yuyasqantapis Dios qhechonqa, nispa.

Jesuspa maman, wawqenkunawan

¹⁹ Maypichus Jesús kasharqa, chay cheqaman maman chantá wawqenkuna ima jamorqanku. Chaywanpis mana qayllaykuyta aterqankuchu runakuna k'iski kasqankurayku.

²⁰ Jinapi Jesusman willacherqanku: Mamayki, wawqeykikunawan ima jawapi mask'ashasunku, qanwan tinkukuyta munaspa, nispa.

²¹ Jesustajrí kuticherqa: Mamaywan, wawqeykunawan ima kanku, pikunachus Diospa simi nisqanta uyarinku, ruwankutaj, chaykuna, nispa.

Jesús sinch'i wayrata, phiñarikoj qochatawan thañichin

²² Uj p'unchay Jesús yachachisqankunawan khuska boteman yaykuspa, nerqa: Jakuchej qocha chimpaman, nispa. Jinataj botepi kachaykukorqanku.

²³ Rishajtinkutaj, Jesús puñurikaporqa. Jinallapi mama qochapi manchay sinch'i wayra oqharikorqa, yakutaj boteta chinkaykuchisharqaña.

²⁴ Jesuspa yachachisqankunataj payman qayllaykuspa, rijch'aricherqanku: Yachachej, Yachachej, chinkaykushanchejña, nispa. Chantá Jesús rijch'ariytawan, wayrata k'amerqa, yaku oqharikojtawan. Jinallapi wayra thañerqa, yakupis tiyaykaporqa.

²⁵ Chaymantataj yachachisqankunaman nerqa: Maytaj noqapi atinikusqaykichejri? nispa. Paykunatajrí mancharikuspa, t'ukorqanku, paykunapurataj tapunakorqanku: Pitaj kay runa kanmanri wayratapis, yakutapis kamachejtin kasunankupajri? nispa.

Gerasamanta supayniyoj runa

²⁶ Ajinamanta Galilea qocha chimpapi Gerasa jap'iyman chayarqanku.

²⁷ Jesús botemanta urayk'usqantawantaj, Gerasa llajtayoj uj runa jamuspa, payman qayllaykorqa. Payqa unayña supayniyoj kasqa. Chayrayku mana p'achallikojchu, nitaj wasinpipis sayajchu, manachayqa panteonpi tiyakoj.

²⁸ Jinapi Jesusta rikuytawan, pay ñawpaqenman wijch'uykukorqa, qhaparispataj nerqa: Ima ruwanayki tiyan noqawan, Patapi Kaj Diospa Churin Jesús? Mañakuyki ama ñak'arichinawaykita, nispa.

²⁹ Chantá Jesusqa supayta kamacherqa chay runamanta llojsinanta. Supayqa sapa kuti chay runawan munayninta ruwaj. Runakunataj chay runaj chakinta, makintawan ima cadenawan wataj kanku. Chaywanpis pay cadenata p'itiraj, supaytaj ch'innejman ayqechej.

³⁰ Chantá Jesús chay supayta taporqa: Imataj sutiyki? nispa. Supaytaj kuticherqa: Suteyqa Tropa, nispa. Chayta nerqa chay runaman ashkha supaykuna yaykusqankurayku.

³¹ Chay supaykunatajrí Jesusmanta mañakorqanku ama paykunata ukhu pachaman kachaykunanta.

³² Chaypacha qaylla lomapi wakin runakuna ashkha khuchita michisharqanku, supaykunataj mañakorqanku chay khuchikunaman yaykojta saqenanta. Jesustaj yaykunankuta saqerqa.

³³ Chantá, supaykuna runamanta llojsispa, khuchikunaman yaykorqanku. Khuchikunataj imata jina phawaspa, qaqanta mama qochaman wijch'uykukorqanku, jeq'eqaspataj wañurarqanku.

³⁴ Khuchikunata michejkunataj chayta rikuspa, ayqerqanku, rispataj llajtapi, campopi ima runakunaman imatachus rikusqankuta willamorqanku.

³⁵ Jinapi runakuna rerqanku imachus kasqanta rikoj, Jesusman qayllaykuspataj, ñawpaqenpi chay runata tiyashajta rikorqanku, pimantachus supaykuna llojsisqanku, chayta. Jinataj chay runata p'achallisqata, yuyayninpitaj kashajta rikuspa, manchachikorqanku.

³⁶ Jesuspa ruwasqanta rikojkunapis willallarqankutaj chay runa imaynatachus supaykunamanta kacharichisqa kasqanta.

³⁷ Chantá Gerasa cheqapi tiyakojkuna anchatapuni manchachikuspa, maytapuni Jesusta mañarqanku chay cheqamanta ripunanta. Jesustaj ripunanpaj boteman yaykorqa.

³⁸ Jinapi supaykunamanta kacharichisqa runaqa Jesusmanta mañakorqa: Saqeway qanwan rejta, nispa.

³⁹ Jesustajrí payta kachapuspa, nerqa: Wasiykiman kutipuy, chaypitaj willaray imatachus Dios qanpaj ruwasqanta, nispa. Chantá pay ripuspa, llajtantinpi tukuyman willararqa imatachus Jesús paypaj ruwasqanta.

Jesusqa Jairoj ususinta kawsarichin, yawar apayniyoj warmitapis qhaliyachin

⁴⁰ Ujtawan Jesús qocha chimpaman kutirejtin, ashkha runakuna kusiywan taripaj rerqanku, imaraykuchus tukuyninku payta suyasharqanku.

⁴¹ Chantá Jairo sutiyoj uj runa jamorqa. Payqa tantakuna wasipi kamachej karqa. Jesuspa ñawpaqenpi qonqoriykukuspataj, wasinman rinanta mañarikorqa,

⁴² imaraykuchus uj k'ata ususin, pichus chunka iskayniyoj watayoj jina karqa, pay wañunayasharqaña. Jesús chayman rishajtintaj, ashkha runakuna maytapuni payman k'iskikamorqanku.

⁴³ Paykuna ukhupi uj warmi karqa, chunka iskayniyoj wataña yawar apaywan onqosqa. Payqa maytapuni jampikamayojkunawan jampichikuspa kapuyninta tukuchisqa, manataj pipis qhaliyachiyta atisqachu.

⁴⁴ Jinapi chay warmeqa Jesusman qhepallanmanta qayllaykuspa, p'achanpa kantunta llankhaykorqa. Llankhaykusqantawantaj, warmej yawar apaynin ch'akiporqa.

⁴⁵ Chantá Jesús nerqa: Pitaj llankhaykuwanri? nispa. Chay runakunamanta ni pi nerqachu payta llankhaykusqanta. Chayraykutaj Pedro nerqa: Yachachej, runakuna k'iskikamuspa tukuynejmanta ñit'imushasunku, qantaj nishanki: Pitaj llankhaykuwanri? nispa.

⁴⁶ Jesustajrí kuticherqa: Pipunichá llankhaykuwan, imaraykuchus noqamanta atiy llojsisqanta reparakuni, nispa.

⁴⁷ Chantá chay warmi mana pakakuyta atispa, Jesusman kharkatitispa qayllaykorqa. Ñawpaqenman qonqoriykukuspataj, tukuy runaj ñawpaqenpi sut'incharqa, imaraykuchus Jesusta llankhaykusqanta, imaynatatajchus llankhaykusqantawan, onqoyninmanta qhaliyasqanta ima.

⁴⁸ Chantá Jesús nerqa: Wawáy, noqapi atinikusqaykirayku qhaliyachisqa kanki. Kunantaj sonqo tiyaykusqa ripuy, nispa.

⁴⁹ Jinata Jesús parlashajtillanraj, tantakuna wasipi kamachej Jairoj wasinmanta ujnin kamachin jamuspa, nerqa: Ususiyki wañupunña. Amaña Yachachejta jamunanta niychu, nispa.

⁵⁰ Jesustajrí chayta uyarispa Jairota nerqa: Ama llakikuychu, manachayqa noqapi atinikullay, wawaykitaj kawsarenqa, nispa.

⁵¹ Jairoj wasinman chayajtinku, Jesusqa Pedrota, Juanta, Santiagota, ch'iriskaj tatanta, mamantawan imalla wasiman yaykojta saqerqa, wajkunatatajrí mana.

⁵² Chaypitaj ashkha runakuna sonqo nanayta ch'iriskamanta waqasharqanku. Chantá Jesús paykunata nerqa: Amaña waqaychejchu, ch'iriskaqa manamin wañunchu, puñushallan, nispa.

⁵³ Chayta uyarispa, runakuna Jesusmanta asikorqanku, chay ch'iriska wañusqapuni kasqanta yachasqankurayku.

⁵⁴ Jesustajrí ch'iriskata makinmanta jap'iykuspa, jatunmanta nerqa: Imillita, sayariy, nispa.

⁵⁵ Jinapi ch'iriska kawsarimuspa, chay ratopacha sayarerqa. Jesustaj nerqa mikhunata payman jaywanankuta.

⁵⁶ Ch'iriskaj tatankunarí, maytapuni t'ukorqanku. Chaywanpis Jesús paykunata nerqa ama pimanpis chaymanta willanankuta.