San Lucas 6 - DIOSPA QHELQACHISQAN DEUTEROCANONICAL

Samarina p'unchaymanta churanakunku

¹ Uj kuti samarina p'unchaypi Jesusqa trigo chajraj chawpinta risharqa, yachachisqankunataj trigo umata p'itispa, makinkuwan qhaqoytawan mikhorqanku.

² Fariseokunatajrí paykunata taporqanku: Imaraykutaj samarina p'unchaypi mana ruwanata ruwashankichejri? nispa.

³ Jesustaj kuticherqa: Manachu jayk'ajpis ñawirerqankichej David, chantá paywan kajkuna ima yarqhachikuspa imatachus ruwasqankumanta?

⁴ Davidqa Diospa wasinman yaykuytawan, Diospaj t'aqasqa t'antata oqharispa mikhorqa, paywan kajkunamanpis mikhuchillarqataj, chay t'anta sacerdotekunallapaj kashajtinpis.

⁵ Chayta niykichej, imaraykuchus Runaj Churenqa samarina p'unchaypi imatachus ruwana kasqanta ninanpaj atiyniyojmin, nispa.

Jesús makin ch'akisqa runata qhaliyachin

⁶ Waj samarina p'unchaypi tantakuna wasiman yaykuspa Jesús yachachisharqa. Chaypi paña makin ch'akisqa uj runapis kashallarqataj.

⁷ Chaypacha Diospa kamachisqanmanta yachachejkuna, fariseokunawan ima Jesusta wateqasharqanku, samarina p'unchaypi runata qhaliyachejtin ch'ataykunankupaj.

⁸ Jesustajrí imatachus yuyasqankuta yachaspa, makin ch'akisqa runata nerqa: Jamuy, kaypi kajkunaj chawpinpi sayariy, nispa. Runataj jatarispa, ñawpaqenkupi sayarqa.

⁹ Chantá Jesús chay runakunata nerqa: Ujta tapurisqaykichej: Samarina p'unchaypi imatataj ruwana: Allin kajtachu, chayrí mana allin kajtachu? Mayqentaj aswan walej kanman: Runata qhespichinachu, chayrí wañupojta saqenachu? nispa.

¹⁰ Chantá Jesús muyuyninta qhawarispa, makin ch'akisqa runata nerqa: Makiykita jaywariy, nispa. Jaywarejtinkamataj, Jesusqa makinta qhaliyacherqa.

¹¹ Kurajkunarí chaymanta mayta phiñarikuspa, paykunapura parlarqanku imatachus Jesuswan ruwanankuta.

Jesús chunka iskayniyoj kuraj kachankunata ajllan

¹² Chantá Jesús uj orqoman rerqa Dioswan parlarikoj, chaypitaj sut'iyanankama Dioswan parlarikorqa.

¹³ Sut'iyamojtintaj, Jesús yachachisqankunata wajyaspa, paykunamanta chunka iskayniyojta ajllarqa kuraj kachankuna kanankupaj.

¹⁴ Kaykuna karqanku: Simón, pitachus Pedro nispa suticharqa, Simonpa wawqen Andrés, chantá Santiago, Juan, Felipe, Bartolomé.

¹⁵ Jinallataj karqanku Mateo, Tomás, Alfeoj churin Santiago, Simón Zelote nisqawan.

¹⁶ Chantapis kallarqankutaj waj Santiagoj churin Judas, chantá Judas Iscariote, pichus Jesusta jap'ichinan karqa, chay ima.

Jesús ashkha runaman yachachin

¹⁷ Jesuswan, chay chunka iskayniyoj kuraj kachankunawan ima orqomanta urayk'amuspa, uj pampaman chayarqanku. Chaypitaj payta suyasharqanku yachachisqankuna, waj ashkha runapis tukuy Judea jap'iymanta, Jerusalén llajtamanta, qocha kantupi Tiro qayllapi llajtakunamanta, Sidón qayllapi llajtakunamanta ima.

¹⁸ Paykuna jamusqanku Jesusta uyarinankupaj, onqoyninkumantapis qhaliyachisqa kanankupaj. Supaykunawan ñak'arejkunatapis Jesús kacharichillarqataj.

¹⁹ Tukuyninkutaj Jesusta llankhariyta munarqanku, imaraykuchus paymanta llojsej atiynin tukuyta qhaliyacherqa.

Diospa ñawpaqenpi kusikuyniyoj

²⁰ Chantá Jesús yachachisqankunata qhawarispa, nerqa: Kusikuyniyojmin kankichej qankuna wajchakuna, imaraykuchus Diospa kamachiynenqa qankunapaj.

²¹ Kusikuyniyojmin kankichej kunan yarqhachikojkunaqa, imaraykuchus sajsachisqa kankichej. Kusikuyniyojmin kankichej kunan waqajkunaqa, imaraykuchus qankunaqa qhepaman kusirikunkichej.

²² Kusikuyniyojmin kankichej pikunachus Runaj Churinrayku waj runakuna chejnisojtiykichej, paykuna ukhumanta qharqosojtiykichej, rimasojtiykichej, millay runakunata jina qhesachasojtiykichej ima.

²³ Chaypacha jatun kusiywan kusikunkichej, imaraykuchus janaj pachapi t'inkaykichejqa may jatun kanqa. Ñawpa runakunapis kikillantataj Diosmanta sut'inchajkunata ñak'aricherqanku.

²⁴ Ay, qhapaj runakuna, qankunawanqa imallachus kanqapis, imaraykuchus kusikuyniykichejqa kunallanpaj kay pachallapi kanqa.

²⁵ Ay, mikhunawan sajsasqa kajkuna, qankunawanqa imallachus kanqapis, imaraykuchus qhepaman sinch'ita yarqhachikunkichej. Ay, kunan asikojkuna, qankunawanqa imallachus kanqa, imaraykuchus qhepaman sinch'ita llakikunkichej, waqankichejtaj.

²⁶ Ay, runaj jatunchanan kajkuna, qankunawanqa imallachus kanqapis. Ñawpa tataykichejkuna kikillantataj llulla sut'inchajkunata jatuncharqanku, nispa.

Awqakunata munakuna

²⁷ Jesús nillarqataj: Qankuna uyariwajkunaman noqa niykichej: Awqaykichejkunata munakuychej, qankunata chejnisojkunapajtaj allin kajta ruwaychej.

²⁸ Jinallataj qankunata maldicejkunapaj Diospa sutinpi saminchaychej, qhasimanta qankunata tumpajkunapajtaj Diosmanta mañapuychej.

²⁹ Pipis uyaykipi laq'asojtenqa, uj lado uyaykitawan rikuchiy. Pipis qhatakunaykita qhechusojtenqa, camisaykitawan qopuy.

³⁰ Pichus imatapis mañakusojmanqa qoriy. Qanpata kajta apakapojmantapis amaña mañakapuychu.

³¹ Imaynatachus runa qankunapaj ruwanankuta munankichej, ajinallatataj qankunapis paykunapaj ruwaychej.

³² Sichus qankunata munakojkunallata munakunkichej chayqa, ima aswan allintataj ruwankichejri? Chaytaqa juchasapakunapis ruwallankutaj.

³³ Sitajchus qankunata allinta ruwajkunallapaj allinta ruwankichej chayqa, imaynatataj Dios chaymanta t'inkachisunkichejmanri? Chaytaqa juchasapakunapis ruwallankutaj.

³⁴ Kutichipusunaykichejta suyaspalla imatapis mañarinkichej chayqa, imaynatataj Dios chaymanta t'inkachisunkichejmanri? Juchasapakunapis imatapis mañarinakunku, imaraykuchus purajmanta mask'anku uj jinatawan jap'iyta.

³⁵ Qankunarí awqaykichejkunata allinta ruwaspa munakuychej. Manuspapis, ama suyaychu imatapis kutichipusunankuta. Jinamanta t'inkaykichej jatun kanqa, qankunataj Patapi Kaj Diospa wawankuna kankichej. Diosqa paymanta mana yuyarikojkunata, millay sonqoyojkunata ima khuyarin.

³⁶ Chayrayku qankunapis khuyakuyniyoj kaychej ari, imaynachus Tataykichejpis khuyakuyniyoj, ajina.

Mana wajkunata juchachanachu

³⁷ Ama pitapis juchachaychejchu ama juchachasqa kanaykichejpaj, nitaj juzgaychejchu ama juzgasqa kanaykichejpaj. Wajkunaj juchankutapis pampachay, Diostaj juchaykichejtapis pampachallanqataj.

³⁸ Wajkunaman allin kajta jaywariychej, Diostaj qankunamanpis jaywarillasonqachejtaj wayaqaykichejpi phullchirishajta, mat'i winasqata, thalaykurisqata ima. Imaynatachus wajkunaman qonkichej, ajinallatataj Dios qankunaman kutichisonqachej, nispa. Ajinata Jesús nerqa.

³⁹ Jesús uj rijch'anachinatawan nillarqataj: Ñawsa runa atinmanchu waj ñawsa runata pusaykachayta? Manachu iskayninku mayqen t'oqomanpis urmaykunkuman?

⁴⁰ Pichus yachakojqa mana yachachejninmanta aswan kurajchu. Chaywanpis sumajta yachaqakuspaqa, pay yachachejnin jina kanqa.

⁴¹ Imaraykutaj wawqeykej ñawinpi q'opata qhawanki, qanpa ñawiykipitaj kurkuta mana reparakunkichuri?

⁴² Qanpa ñawiykipi chhikan kurku kashajtin, imaynatataj wawqeykita niwaj: Wawqéy, ñawiykimanta q'opata orqhojta saqeway, nispa. Puraj uya, ñawiykimantaraj ñawpajta kurkuta orqhokuy. Chantá allinta qhawarispa, wawqeykej ñawinmanta q'opata orqhoyta atinki.

Sach'aj poqoyninmanta rijch'anachina

⁴³ Mana sumaj sach'a kanchu mana walejta poqojqa, nitaj kanchu mana walej sach'a sumajta poqojqa.

⁴⁴ Sapa sach'ata poqosqanpi rejsinchej. Higotaqa mana khiñimantachu pallanchej, nillataj uvatapis thaqokunamantachu.

⁴⁵ Jinallataj sumaj runaqa allinta parlan, imaraykuchus sonqonqa allin imakunawan junt'a kashan. Millay runarí mana allin kajta parlan, imaraykuchus sonqonqa mana allinkunawan junt'a. Imawanchus runaj sonqon junt'a kashan, chayman jina parlan.

Iskay wasikunamanta rijch'anachina

⁴⁶ Imaraykutaj: Tukuyta Kamachej kanki, nispa niwankichej, manataj nisqayta ruwankichejchuri?

⁴⁷ Sichus pipis noqaman jamuspa, yachachisqayta uyarin, nisqaytataj ruwan chayqa, chay runa pimanchus rijch'akusqanta nisqaykichej.

⁴⁸ Chay runa rijch'akun, pichus wasinta ruwayta qallarinanpaj, ñawpajta sumaj ukhuta allasqa chhankata taripanankama, chayman. Chantá chay patapi rumimanta cimientota churasqa. Chaymanta sinch'ita parajtin, mayoqa wasarispa wasiman wajtakamusqa. Chaywanpis waseqa mana imanakusqachu, chhanka patapi ruwasqa kasqanrayku.

⁴⁹ Sichus pipis nisqayta uyarispa mana ruwanchu chayrí, pay rijch'akun pampa patallapi wasita ruwakojman. Mayoqa wasarispa, wasiman wajtakamusqa, urmachispataj raqayllaman tukurparichisqa, nispa. Ajinata Jesús yachacherqa.